Ձեր վստահելի աղբյուրը

Բելառուսում բողոքի ցուցերի 17-րդ օրը ևս ուղեկցվել է քաղաքացիների ձերբակալություններով, գրում է «Գազետա.ռու»-ն։

«Ձերբակալություններն իրականացվում են որպես վարչական գործընթացների մաս», - ասել է քաղաքային ոստիկանության ներկայացուցիչը: Սակայն ձերբակալվածների թիվը անհայտ է:

Բողոքի գործողությունները տեղի են ունեցել ոչ միայն Մինսկում, այլև հանրապետության այլ քաղաքներում: Ըստ «Belsat» հեռուստաալիքի, բացի Մինսկից, մյուս քաղաքներում ևս քաղաքացիների մի մասը կալանավորվել է, իսկ Հրոդնայում անվտանգության ուժերը նույնիսկ արցունքաբեր գազ են կիրառել ցուցարարների դեմ:

Նշվում է, որ ակցիայի մեկնարկից կես ժամ անց ցույցերի ցրման համար օգտագործվող հատուկ տրանսպորտային միջոցների սյունը մոտեցել է ցուցարարներին: Այնուամենայնիվ, ոստիկանությունն ուժ չի գործադրել ցույցը ցրելու համար. անվտանգության ուժերի հայտնվելուց մեկ ժամ անց ցուցարարները կամավոր ցրվել են։

Ըստ աղբյուրի, ընդդիմության կողմնակիցներին զուգահեռ գործող կառավարության կողմնակիցները ևս դուրս են եկել փողոց: Մինսկում նրանց հանդիպման վայրը Կոմարովսկու շուկայի հարևանությամբ գտնվող հրապարակն է: Ակցիային մասնակցել են ավելի քան հազար մարդ, որոնք վանկարկել են՝ «Լուկաշենկոյի համար»:

Բացի այդ, օգոստոսի 25-ին ևս մեկ խոշոր փողոցային ակցիա են անցկացրել ուսուցիչները, որոնք վրդովված են Ալեքսանդր Լուկաշենկոյի կողմից նախօրեին հնչած սպառնալիքից։ Նա սպառնացել էր՝ աշխատանքից հեռացնելու այն ուսուցիչներին, որոնք համաձայն չեն պետական քաղաքականության հետ: Մինսկում ԿԳՆ շենքի մոտ հավաքվել էր մոտ 500 մարդ՝ բողոքական կարգախոսներով պաստառներ պահելով՝ ի պաշտպանություն «ազնիվ ուսուցիչների»: