Ձեր վստահելի աղբյուրը

Երևան քաղաքի ընդհանուր իրավասության դատարանը՝ նախագահությամբ դատավոր Արթուր Մկրտչյանի, մերժեց գործով մեղադրող դատախազ Գևորգ Սարգսյանին բացարկ հայտնելու մասին ՀՀ ֆինանսների նախկին նախարար Գագիկ Խաչատրյանի և նրա եղբորորդու՝ ՊԵԿ ներքին անվտանգության վարչության նախկին ղեկավար Կարեն Խաչատրյանի  պաշտպանների միջնորդությունը։ Այս մասին հայտարարեց դատավորը խորհրդակցական սենյակից վերադառնալուց հետո։

Դատական նիստին քննում է Գագիկ Խաչատրյանի կալանավորման օրինականության և հիմնավորվածության հարցը։

Դատախազը հայտարարեց, որ Գագիկ Խաչատրյանի նկատմամբ ընտրված խափանման միջոց կալանավորումը հիմնավոր է, փոփոխելու հիմքեր չկա։

Պաշտպան Երեմ Սարգսյանն ասաց, որ մեղադրանքի կողմը պաշտպանության կողմին զրկել է գործի ամբողջ նյութերի հիման վրա պաշտպանություն  նախապատրաստելու, պաշտպանական մարտավարությունը որոշելու իրական հնարավարությունից։  Ըստ պաշտպանի, Գագիկ Խաչատրյանի վերաբերյալ  շուրջ 120 հատոր քրեական գործից, իրենց տեղեկություններով, կամայականորեն առանձնացրել են 37 հատոր նյութ, որոնք, իրենց համոզմամբ, հիմնականում մեղադրող բնույթ ունեն, իսկ արդարացնող, հիմնավոր կասկածը հերքող,  կալանավորման հիմքերի բացակայությունը հաստատող փաստական տվյալները չեն ընդգրվել քրեական գործում։

«Ինչո՞ւ ընդգրկվեն, եթե դրանով պետք է հակառակը  հաստատվի, իսկ նպատակն այլ է»,- նշեց նա։

Ե.Սարգսյանն ընդգծեց, որ պետք է ներկայացվեր գործի հետ պահվող իրեղեն ապացույցները և քննչական գործողությունների արձանագրություններին կցված հավելվածները։

«Կցկտուր նյութեր են ներկայացրել, ինչ որ բացատրության մի մասը կա, մյուսը չկա։ Ցանկ կա, թե նյութերում ինչ պետք է լինի, դրանց հիմնական մասը չկա։ Կարևորագույն անձանց ինչ որ հարցումների պատասխանները չկան։ Հարուցման օրինականության հարցն ինչպե՞ս վիճարկենք, իսկ սա կալանավորման պայմաններից մեկն է։ Այսինքն ակնհայտ է, որ այդ նյութերը խիստ էական նշանակություն ունեն  քրեական գործի հարուցման օրինականությունը ստուգելու, գործի հանգամանքների  լրիվ, բազմակողմանի հետազոտման համար, սակայն այդ նյութերը ևս քերական գործում առկա չեն։

Այսինքն, վարութ իրականացնող մարմինը իր ցանկությամբ, առանց որևէ պատճառաբանության քրեական գործը մի քանի անգամ կրճատել է, ընդգրկել է միայն իր համար ձեռնտու, մեղադրական բնույթի նյութերը։ Նման վարքագիծը չի բխում  Քրեական դատավարության օրենսգրքի դրույթներից, սկզբունքից, խախտում է մեղադրյալների  արդար դատաքննության իրավունքը, պաշտապնության իրավունքը, մրցակցության, օրինականության սկզբունքները, ինչն էլ հանգեցնում է քրեադատավարական նորմերի էական խախտումների, որոնք միանշանակ ազդելու են սույն քրեական գործի ելքերին»,- ասաց Երեմ Սարգսյանը։

Նա նշեց, որ ամբստանյալների արդար դատաքննության, պաշտպանության իրավունքի, օրինականության, մրցակցության սկզբունքներն ապահովելու նպատակով դատարանին միջնորդում են մեղադրանքի կողմից պահանջել  քրեական գործով որպես իրեղեն ապացույց ճանաչված,  գործից առանձին ԱԱԾ-ում պահվող փաստաթղթերը, նաև սկավառակները, ֆայլեր ներկայացել պաշտպանության կողմից։

Երեմ Սարգսյանն ասաց, որ այս պահին են կարևոր այդ փաստաթղթերը, քանի որ գործում տեսնում են ակնհայտ խախտումներ, որոնք ամբողջ պրոցեսն  անօրինական են դարձնում, սակայն այս պահին չեն բարձրաձայնում։

«Եթե բարձրաձայնենք, այս ամբողջ պրոցեսը, այս գործն էլ  անօրինական է լինելու»,-նշեց պաշտպանը։ 

Դատարանն արձանագրեց, որ ներկայացված միջնորդությունը ոչ թե անհիմն է, այլ ոչ ժամանակին արված, ուստի այդ հիմքով մերժում է միջնորդությունը։ Դատավորն ասաց, որ այդ միջնորդությունը նաև կարող է ներկայացվել դատաքննության փուլում ապացույցները ներկայացնելիս։

Գագիկ Խաչատրյանը գործով դատական նիստին ներկա չէ։ Նա առողջական խնդիրներ ունի,  դիմում է ներկայացրել դատարան, որպեսզի նիստը շարունակվի առանց իր ներկայության։

Կարեն Խաչատրյանին մեղադրանք է առաջադրվել  ՀՀ ՔՕ 179-րդ հոդվածի 3-րդ մասի 1-ին կետով (յուրացնելը կամ վատնելը` առանձնապես խոշոր չափերով) եւ 314-րդ հոդվածի 1-ին մասով (պաշտոնեական կեղծիք):

Գագիկ Խաչատրյանին մեղադրանք է առաջադրվել  ՀՀ ՔՕ 308-րդ հոդվածի 2-րդ մասի 3-րդ կետով (պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ), 179-րդ հոդվածի 3-րդ մասի 1-ին կետով (յուրացնելը կամ վատնելը` առանձնապես խոշոր չափերով), 38-179-րդ հոդվածի 3-րդ մասի 1-ին կետով, 311-րդ հոդվածի 4-րդ մասի 2-րդ կետով (կաշառք ստանալը), 38-190-րդ հոդվածի 3-րդ մասի 1-ին կետով եւ 314-րդ հոդվածի 1ին-մասով (պաշտոնեական կեղծիք):