Ձեր վստահելի աղբյուրը

Բարձր տեխնոլոգիական արդյունաբերության  նախարար Հակոբ Արշակյանն ասուլիսում հայտնեց, որ Տավուշի սահմանային գործողություններից հետո հետաքրքրության որոշակի աճ կա Հայաստանի ռազմարդյունաբերության արտադրանքի հանդեպ: Նրա խոսքով, մինչ այդ էլ միջազգային ցուցահանդեսներին մասնակցելու արդյունքում նույնպես  բարձրացել էր արտաքին շուկայի հետաքրքրությունը:

«Մենք պատրաստվում ենք Հայաստանի ռազմարդյունաբերության արտադրանքի ոլորտում թե´ ստանդարտների, թե´ որակի վերահսկողության տեսանկյունից ավելի ինստիտուցիոնալ որոշակի գործիքակազմ օգտագործել»,- հայտնեց նախարարը և շեշտեց, որ դրանից հետո էլ ավելի կակտիվացվեն արտաքին շուկաներ դուրս գալու մեխանիզմները:

Բարձր տեխնոլոգիական արդյունաբերության  նախարարը հայտնեց, որ ռազմարդյունաբերության համալիրում գերակշիռ մեծամասնությունը ոչ թե պետական, այլ մասնավոր ընկերություններ են և գիտահետազոտական, փորձակոնստրուկտորական աշխատանքներ պատվիրելու ժամանակ պետությունն ընկերությունների աշխատակիցների աշխատավարձերը չի սահմանափակում, վերջիններս իրենց  կոմերցիոն աշխատավարձերով են առաջնորդվում: Ըստ նրա, ռազմարդյունաբերական պետական գործարաններում նույնպես չեն գործում պետական աշխատողի կամ քաղծառայողի աշխատավարձերը, դրանք ՓԲԸ-ներ  են և աշխատակիցների եկամուտներն ուղիղ կապ ունեն ընկերության արդյունավետ աշխատանքի հետ: 

Նախարարն արդարացված համարելով ոլորտի ընկերություններին արտոնությունների տրամադրումը՝ նկատեց.  «Գիտենք, որ բարձր տեխնոլոգիաների ոլորտից բացի չկա մի ավելի արդյունավետ ոլորտ, որտեղ կարելի է ծախսել և հետ ստանալ: Այս պահին մեր գնահատականներն այդպիսին է: Եթե կա նման ոլորտ, ուրեմն, հավանաբար, մեր ուշադրություններից վրիպել է»:

Հակոբ Արշակյանի խոսքով, 2019 թվականին Հայաստանի ՀՆԱ-ում բարձր տեխնոլոգիաների ոլորտի մասնաբաժինը 2.14 տոկոս է կազմել, իսկ այս տարվա առաջին կիսամյակի թվերով արդեն իսկ հատել է 3 տոկոսի շեմը: