Ձեր վստահելի աղբյուրը

Այսօր ժամը 14:30-ին Երևան քաղաքի ընդհանուր իրավասության դատարանը կհրապարակի ՀՀ ֆինանսների նախկին նախարար Գագիկ Խաչատրյանի դատաքննության ընթացքում խափանման միջոցի փոփոխման վերաբերյալ որոշումը։

Խաչատրյանների փաստաբանական խումբը տարածել է հայտարարություն, որում նշված է. «Երեկ մոտ 6 ժամից ավելի տևած առաջին նիստում (դատավոր՝Արթուր Պետիկի Մկրտչյան) կողմերը քննարկեցին դատավորի ինքնաբացարկի հավանականության հարցը, դատախազի բացարկի միջնորդությունը, ԱԱԾ-ից լրացուցիչ ապացույցներ պահանջելու միջնորդությունը: Խաչատրյանի պաշտպանական կողմը բարձրաձայնեց նախաքննական մարմնի բազմաթիվ խախտումների մասին, նաև նշեց, որ մեղադրող կողմն իրենց զրկել է գործի ամբողջ  նյութերին ծանոթանալու, պաշտպանական իրավունքը ամբողջովին իրացնելու հնարավորությունից, չի տրամադրվել գործի բոլոր նյութերը, աուդիո և վիդեո ֆայլերը։ Խաչատրյանի պաշտպանական կողմը պնդում է, որ կալանավորման հիմքերն առկա չեն։ Հատկանշական է, որ դատարանի բակում հավաքվել էին Խաչատրյանի ընկերները՝ ենթադրելով, թե կարող են տեսնել Գագիկ Խաչատրյանին դատարանում»։

Պաշտպանները հիշեցնում են, որ Գագիկ Խաչատրյանը 2015թ.-ից ի վեր վիրահատվել է երեք անգամ ողնաշարի ստենոզի շտկման համար։ 2019թ.-ին գտնվելով Գերմանիայում՝քննիչի առաջին իսկ հեռախոսային կանչով ընդհատել է հետվիրահատական պարտադիր բուժումը և վերադարձել ՀՀ ու ներկայացել վարույթն իրականացնող մարմնին իր ներկայությամբ ամբողջական և օբյեկտիվ ննության իրականացման համար։ 2016թ.-ից ի վեր Գագիկ Խաչատրյանը երբեևէ հանրային ելույթ չի ունեցել, հարցազրույցներ չի տվել։