Ձեր վստահելի աղբյուրը

Ռուսաստանը կարող է իրեն թույլ տալ վերաֆինանսավորել Բելառուսի 1 միլիարդ դոլարի պարտքը. երկրի ոսկու և արտարժույթի պաշարների մասշտաբում այդ գումարը «կաթիլ է օվկիանոսում»,- գրում է «Ռիա Նովոստի»-ն՝ վկայակոչելով փորձագետ Վասիլի Կարպունինի խոսքը։

Երեքշաբթի օրը Ռուսաստանի նախագահի մամուլի խոսնակ Դմիտրի Պեսկովը հայտարարել է, որ Ռուսաստանը կքննարկի Բելառուսի պարտքը վերաֆինանսավորելու առաջարկը, եթե լինի այդպիսին: Դրանից առաջ Բելառուսի նախագահ Ալեքսանդր Լուկաշենկոն հանձնարարել էր զեկուցել արտաքին պարտքի վերաֆինանսավորման անհրաժեշտության մասին:

Ըստ Բելառուսի ֆինանսների նախարարության, երկրի արտաքին ազգային պարտքը հուլիսի 1-ի դրությամբ կազմել է 18 միլիարդ դոլար:

Հինգշաբթի օրը Լուկաշենկոն ասել է, որ քննարկել է բելառուսական 1 միլիարդ դոլարի պարտքը վերաֆինանսավորելու հարցը Ռուսաստանի առաջնորդ Վլադիմիր Պուտինի հետ:

ՌԴ ֆինանսների նախարարության մամուլի ծառայությունից էլ հայտնել են, որ վերաֆինանսավորման խնդրանք ստանալուց հետո, նախարարությունն այն կքննարկի՝ համաձայն կառավարության հրահանգների:

«Դա Ռուսաստանի Դաշնության համար աննշան գումար է: Երկրի ոսկու և արտարժույթի պահուստների մասշտաբով, որը կազմում է 590 միլիարդ դոլար, 1 միլիարդ դոլարը կաթիլ է թվում օվկիանոսում»,- մեկնաբանել է Կարպունինը:

Նա նշել է, որ վերաֆինանսավորումը ենթադրում է պարտքային պարտավորությունների երկարացում՝ նոր պայմաններով:

«Սա նոր պարտք չէ», - հավելել է փորձագետը: