Ձեր վստահելի աղբյուրը

«Հունիսին մենք այս տարվա համար կանխատեսում էինք 2.3% տնտեսական անկում։ Այս պահին մենք մշակում ենք հաջորդ եռամսյակի վերլուծությունը, որտեղ, նախնական տվյալներով, մեր գնահատականը տարվա կտրվածքով մոտավորապես 4.3-4.5%-ի չափ է»,- այսօր «Տարեվերջին տնտեսական ինչ վիճակ կլինի ՀՀ-ում» թեմայով քննարկման ընթացքում ասաց «Ամերիա» խորհրդատվական ընկերության տնօրեն Տիգրան Ջրբաշյանը։

Նրա խոսքով, իրենք երկրորդ եռամսյակի համար ավելի մեծ տնտեսական անկում են կանխատեսել, քան եղել է, բայց միաժամանակ կանխատեսում էին նաև ավելի արագ աճ, քան այսօր կա։

«Մեզ մոտ երկրորդ եռամսյակի կտրվածքով անկումը եղավ ավելի նվազ, բայց շարունակվեց մինչև երրորդ եռամսյակի որոշակի մաս։ Այնպես որ, մենք կարծում ենք, որ անկման ավելի նվազ լինելը և ավելի երկար տևելը ունենալու է իր ազդեցությունը, և մեր կանխատեսած արագ աճը, որ պետք է լիներ չորրորդ եռամսյակում, չի լինի։ Եվ կարծում ենք, որ անկումը կհասնի մինչև 4.3%-ի։ Դա այն կանխատեսումն է, որը դրված է մեր մակրոտնտեսական վերլուծության հիմքում»,- նշեց Տիգրան Ջրբաշյանը։

Անդրադառնալով այսօրվա տնտեսական իրավիճակին՝ նա նշեց, որ այս պահին ՀՀ-ում կա միջին աշխատավարձի աճ՝ բոլոր ոլորտներում։ Օրինակ, պետական ոլորտում միջին աշխատավարձը 107 հազար ՀՀ դրամ է կազմում։

«Բացի այդ, անցած տարվա հունվար-հուլիս ամիսների համեմատ, այս տարի նույն ժամանակահատվածում ունենք էլեկտրաէներգիայի սպառման աճ։ 3.4%-ով ավելի շատ էլեկտրաէներգիա ենք սպառել այս տարվա նույն ժամանակահատվածում։ Միաժամանակ ունենք սպառողական գների գրեթե մեռած իրավիճակ։ Նախորդ տարվա նկատմամբ 101.1% է կազմում սպառողական գների ինդեքսը, որը նույնպես բավականին հետաքրքիր ֆենոմեն է։

Հակառակ ուղղությամբ մեր ամենամեծ խնդիրը տնտեսության մեջ՝ ծառայությունների ոլորտում առկա 78.4% ինդեքսն է՝ առանց առևտրի։ Ունենք նաև շինարարական ոլորտում առկա խնդիր, բայց  վերջին ամիսներին շինարարական ոլորտը առաջանցիկ վերականգնողական փուլում է գտնվում, բայց խնդիրն այն է, որ մենք ապրիլ-մայիս ամիսներին ունեցել ենք խայտառակ իրավիճակ, և վերականգնումը դեռ չի հասել բարձր մակարդակի։ Ունենք նաև խնդիր արդյունաբերական ծավալի հետ կապված։ Այստեղ հիմնականում, իհարկե, խնդիրը կապված է բազայի հետ»,- մանրամասնեց Տիգրան Ջրբաշյանը։

Նա նշեց նաև, որ վերջին 6 ամիսներին ՀՆԱ-ի 5.71% անկում է եղել։ Ըստ նրա, եթե ծախսային տեսակետից ենք նայում, ապա հիմնականում այդ անկումը 1,50%-ով պայամանավորված է շինարարության անկմամբ.

«Պարզվում է, որ պանդեմիան մեծագույն հարված է հասցրել շինարարական ոլորտին։ Երկրորդ տուժած ճյուղը մեծածախ և մանրածախ առևտուրն է, երրորդը՝ անշարժ գույքի հետ կապված գործարքները։ Դրանք միասին գեներացնում են այդ 5.71%-ի 3.2%-ը։ Այդ ոլորտներում է ճգնաժամ հայտնվել։ Իհարկե, տուրիստների հետ կապված ծառայությունների ոլորտում ևս լրջագույն անկում կա՝ 0.77%»: