Ազգային արժեհամակարգի պահպանումը ուղիղ համեմատական է պետության անվտանգության հետ. Ռուբեն Մելքոնյան
«Ազգային արժեհամակարգը դարերի ընթացքում եղել է հայ ժողովրդի դիմադրելու, պայքարելու, հաջողության հասնելու կարևոր գրավականներից մեկը»,- լրագրողների հետ հանդիպմանն ասաց «Ազգային արժեքների պաշտպանություն» նախաձեռնությունը համակարգող խմբի անդամ, Պատմական գիտությունների դոկտոր, պրոֆեսոր Ռուբեն Մելքոնյանը։
Նրա խոսքով, պատմությամբ ապացուցված է՝ այն պահին, երբ հայ ժողովուրդը հավատարիմ է եղել ազգային արժեհամակարգին, հավաքական ոգին ավելի մեծ հաջողություններ է արձանագրել, դիմագրվել է տարբեր փորձությունների։
Ռ. Մելքոնյանն ասաց, որ այս նախաձեռնությանն անդամակցել է որպես արևելագետ, թուրքագետ, որովհետև իր համար ոչ թե ասեկոսեների մակարդակով, այլ խորքային առումով հայտնի են, որ թուրքական կամ ադրեբեջանական թիրախներից են նաև մեր ազգային արժեհամակարգի տարբեր հիմնասյուներ, այդ թվում՝ եկեղեցին, ընտանիքը, դաստիարակությունը, կրթությունը և այլն։
«Ուստի, կարծում եմ, արտաքին տարբեր սպառնալիքներին, մարտահրավերներին դիմագրավելու համար մենք պետք է էլ ավելի մեծ կարևորություն տանք մեր ազգային արժեհամակարգին։ Այո, նաև օրենքի մակարդակով փորձենք ամրագրել, որպեսզի այդ արժեհամակարգի նկատմամբ տարբեր ոտնձգություններ չկարողանան կենսունակ լինել։ Վստահեցնում եմ, որ թուրքական ուղղակի և անուղղակի հարձակումների քաղաքականության մեջ ազգային արժեհամակարգն ունի կարևոր դեր, դրան պետք է դիմագրվենք՝ հասկանալով Թուրքիայի ուղիղ քայլերը, որոնք ուղղված են, օրինակ, մեր մշակույթի ոչնչացմանը, նաև անուղղակի, քողարկված վտանգները, որոնցով թուրքական, ադրբեջանական և այլ հակառակորդ պետություններ, շրջանակներ գործում են մեր ազգի, պետության դեմ։ Ուստի կարծում եմ, որ ազգային արժեհամակարգի պահպանումը ուղիղ համեմատական է մեր ազգի, պետության, պետականության անվտանգության հետ, ինձ համար ազգային արժեհամակարգն ու պետականությունը նույն հորիզոնականում են»,- ասաց Ռ.Մելքոնյանը։
Նախաձեռնության համակարգող խմբի անդամ, իրավաբանական գիտությունների դոկտոր Գևորգ Դանիելյանի խոսքով, այն արժեքները, որոնց պաշտպանության համար այս կամ այն չափով արտահայտվում են, սահմանադրաիրավական արժեք ունեն։
«Հաճախ դատողություններ ենք անում լեզվի, Հայ Առաքելական եկեղեցու կարգավիճակի, ընտանեկան արժեքների մասին, բայց դիտարկում ենք զուտ նպատակահարմարության տեսանկյունից՝ անտեսելով, որ դրանք նախ և առաջ սահմանադրաիրավական արժեք ունեն։ Պետությունը պարտավոր է այս առչնությամբ կոնկրետ քայլեր ձեռնարկել։ Երբ այդ քայլերը ձեռնարկված լինեն, ընդամենը կառաջանա գնահատական տալու խնդիր, բայց ոչ նպատակահարմարության կամ արդյունավետության տեսանկյունից դատողություններ անելու անհրաժեշտություն»,- ասաց նա։
Նախաձեռնության համակարգող խմբի անդամ, դոցենտ Կարինե Նալչաջյանը նշեց, որ այսօր գնալով ավելի ու ավելի տեսանելի է դառնում, որ ոտնձգություններ են իրականացվում ազգային արժեհամակարգի նկատմամբ։
«Արժեհամակարգի գրեթե բոլոր տարրերը թիրախավորված են։ Ազգի, պետության գոյության հիմնասյուներն են՝ եկեղեցի, ընտանիք, մշակույթ, լեզու, տեսնում ենք՝ այսօր խորքային փոփոխություններ կատարելու միտում կա հենց թիրախավորվելով այդ ոլորտները։ Եթե սրանք չպահպանվեն, ազգի գոյաբանական, ազգի, պետության գոյության խնդիր է առաջանում։ Իսկապես սպառնալիք է, եթե քայլեր չձեռնակվեն, անհրաժեշտ է դիմադրել, համախմբվել այս ամենի շուրջ, այլապես կարող ենք որոշ ժամանակ անց բախվել լուրջ փաստերի հետ»,- ասաց Կ. Նալչաջյանը։
Հոգեբանի խոսքով, եթե երեխաների դաստիարկության մեջ մտցնում են այնպիսի տարրեր, որոնք ի սկզբանե խեղում են նրանց ոչ միայն զուտ անհատական, հոգեկան առողջությունը, նույնիսկ վտանգում են երեխայի ներդաշնակ հոգեկան զարգացումը, զրկում են երեխային մեր ազգի ներկայացուցիչ լինելու իր իրավունքից, թիրախավորվում է էթնիկական սոցիալականացումը, ավանդույթների ավանդումը հաջորդ սերունդներին։
«Այս ամենը միասին՝ շատ լուրջ վտանգ են ստեղծում, կարծում եմ, մենք պետք է համախմբվենք։ Սրանք այն արեժքներն են, որոնց վրա հենվելով՝ կարող են բազմաթիվ այլ տարաձայնություններ հաղթահարել, ազգային համախմբումն իրականություն դարձնել»,- ընդգծեց Կ.Նալչաջյանը։
Նախաձեռնության համակարգող խմբի անդամ, ռազմական փորձագետ, պահեստազորի գնդապետ Հայկ Նահապետյանի խոսքով, Հայաստանի նկատմամբ իրականացվում է տեղեկատվական պատերազմ, որի առաջին թիրախներից է մեր ինքնությունը, արժեհամակարգը, հավատը, այն ավանդույթները, որոնք ժառանգել ենք նախորդ սերունդներից։
«Այն կոնվենցիաները, իրավական ակտերը, որոնք փորձ է արվում և ընդունվում են նախկինում և հիմա, իրականում նպատակ են հետպանդում թիրախավորել մեր ինքնությունը, արժեհամակարգը, հավատը, որը Հայաստանի և հայ ժողովրդի համար անկյունաքարային է իր գոյատևման ողջ պատմության ընթացքում»,- ասաց նա։
Հարակից հրապարակումներ`
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
