Ձեր վստահելի աղբյուրը

«2020 թվականի առաջին կիսամյակի տնտեսության գնահատականները տալիս պետք է երկու բան հաշվի առնել. առաջին՝ կորոնավիրուսի համավարակի ազդեցությունը տնտեսական ակտիվության վրա, որի պատճառով 4.7% անկում է գրանցվել, և երկրորդ՝ ներքին ֆենոմենների ազդեցությունը»,- այսօր լրագրողների հետ հանդիպմանն ասաց Եվրասիական փորձագիտական ակումբի համակարգող, քաղաքական վերլուծաբան Արամ Սաֆարյանը՝ անդրադառնալով 2020 թվականի առաջին կիսամյակում Հայաստանի տնտեսության վիճակին։

Նրա խոսքով,  կորոնավիրուսային համավարակը ՀՀ սոցիալ- տնտեսական համակարգի վրա ունեցել է ահռելի ազդեցություն, բայց և այնպես, կան երևույթներ, որոնք մեր տնտեսությանը տարեկան կտրվածքով կկարոանան լավատեսություն ներշնչել և լավ լուծումներ առաջարկել։

«Մենք կարծում ենք, որ արդյունաբերական արտադրության հետևողական աճը վերջին երեք տարիներին, խոսում է այն մասին, որ այս ոլորտը պետական քաղաքականության ուշադրության կենտրոնում է։ Բայց այս երևույթը խոսում է նաև այն մասին, որ մենք սկսել ենք լավագույնս մտածել մեր տնտեսության արդիականացման մասին՝ օգտագործելով ԵԱՏՄ-ի ընձեռած պատեհությունները։ Այս տարի գյուղատնտեսթյան ոլորտում արձանագրված աճը ևս լավատեսության հիմք է տալիս։ Նախորդ տարիներին արդյունաբերական ծավալների անկում էր գրանցվել՝ նույնիսկ գյուղատնտեսական ապրանքների արտահանման ֆոնին, բայց այս տարի մենք ուրախությամբ արձանագրում ենք, որ մեր գյուղատնտեսության ոլորտում որոշակի աճ է նկատվում»,- նշեց բանախոսը։

Արամ Սաֆարյանը հայտնեց, որ տնտեսութան մյուս բոլոր ոլորտներում անկում է գրանցվել։ Այն հատկապես տեսանելի է տրանսֆերտների ծավալների  30% անկմամբ. «Այս ծանր անկումն իր ազդեցությունը ցույց է տալու։  Բայց մենք դեռ ունենք առաջին եռամսյակի տվյալները, որոնք ցույց են տալիս, որ 2020 թվականի առաջին եռամսյակում արձանագրվել է ավանդների որոշակի աճ»։

Ըստ տնտեսական վերլուծաբանի, նույնիսկ ընդհանուր ցուցանիշների անկման պարագայում ԵԱՏՄ-ում արտահանման ու ներկրման ցուցանիշները հույս են ներշնչում։

Աճել է Հայաստանից ապրանքների արտահանումը դեպի Բելառուս և Ղազախստան.«Դեպի Ռուսաստան արտահանման երեք տարվա աճից հետո այս տարի մենք ունենք արտահանման անկում, բայց միաժամանակ ունենք ներկրման 18% ավելացում։ Նշենք նաև, որ Բելառուսից ևս ներկրման ծավալներն ավելացել են։ Ներկրման ծավալների որոշակի անկում կա Ղազախստանից, բայց միևնույն է,  հնարավոր է ակնկալել երկրորդ կիսամյակում արտահանման 2-5% աճ, ինչը խոսում է այն մասին, որ ճիշտ էինք մենք, երբ նախորդ տարի պնդում էինք, որ ԵԱՏՄ շրջանակներում հնարավոր է արտահանման կայուն աճ ապահովել»։

Արամ Սաֆարյանը նշեց, որ արտահանման կառուցվածքն ուսումնասիրելիս, պարզ է դարձել, որ երեք անգամ ավելի ներկրում իրականացնող երկրում շատ կարևոր է արտահանման ծավալների ավելացումը։ Դրա համար գյուղատնտեսական և արդյունաբերական արտադրանքի աճի մեծացում է անհրաժեշտ։

«Միայն արտահանման ծավալների ավելացմամբ է հնարավոր ապահովել ՀՆԱ-արտահանում այնպիսի հարաբերակցություն, որը Հայաստանի տնտեսությունն ավելի առողջ ու կայուն կդարձնի։ Մեր արտահանումը զուսպ ընթացքով դիվերսիֆիկացվում է։ Եթե ԵԱՏՄ-ում մեր անդամակցության առաջին տարում բացարձակ գերակշռում էին ալկոհոլային և ոչ ալկոհոլային խմիչքները, ապա հիմա մեր արտահանման ծավալներում մեծացել են և՛ գյուղմթերքի, և՛ վերամշակվող արտադրանքի ծավալները։ Գյուղատնտեսական արտադրության մեջ մեծացել է և՛ մրգերի և՛ թե բանջարեղենի աճը։ 51%-ով ավելացել է կաթնամթերքի արտահանման ծավալը ԵԱՏՄ շուկա»,- ասաց բանախոսը։