Ձեր վստահելի աղբյուրը

Գերմանիայի արտգործնախարարությունը Բելառուսի դեսպանին հրավիրել է Բեռլին՝ զրույցի ՝ գերմանական ԶԼՄ-ների լրագրողներին հավատարմագրումից զրկելու պատճառով: Այս մասին  հայտարարել է Գերմանիայի արտաքին գործերի նախարարության ներկայացուցիչ Քրիստոֆեր Բուրգերը, փոխանցում է «ՏԱՍՍ»-ը։

«Ինչպես գիտեք, ուրբաթ և շաբաթ օրերին Բելառուսում մի շարք լրագրողներ ձերբակալվել են առանց որևէ պատճառաբանության և զրկվել են իրենց հավատարմագրումներից։ Այս կապակցությամբ Բելառուսի դեսպանին այսօր շտապ հրավիրել են զրույցի Գերմանիայի արտգործնախարարությունում», - ասել է Բուրգերը:

Նշվում է, որ Բելառուսում տեղի ունեցած ահռելի իրադարձությունների ֆոնին, գերմանա-բելառուսական ռազմավարական խորհրդատվական խմբի գերմանացի անդամները որոշել են դադարեցնել իրենց մասնակցությունը խմբում։

Ըստ ԱԳՆ ներկայացուցչի,  վերոնշյալ խմբի նպատակը երկկողմ հարաբերությունների ակտիվացումն է քաղաքականության, տնտեսության, մշակույթի և քաղաքացիական հասարակության ոլորտներում։ Եվ այդ նպատակն իրագործելն առայժմ անհասանելի է։

ԳԴՀ կառավարության պաշտոնական ներկայացուցիչ Շտեֆեն Սայբերտն էլ մատնանշել է՝ կան վստահելի զեկույցներ, որոնք հաստատում են խաղաղ ցուցարարների հերթական ձերբակալությունները Բելառուսում: Դրանք խոսում են նորընտիր նախագահ Ալեքսանդր Լուկաշենկոյի կողմից գործադրվող  բռնաճնշումների մասին։