Ձեր վստահելի աղբյուրը

Երևանում շահագործվում է 450 գազել, որոնք արդեն 15 տարեկան են և պետք է այս ամռանը գծերից դուրս  հանված լինեին։ Ասուլիսում ասաց Երևանի ավագանու «Լույս» խմբակցության ղեկավար Դավիթ Խաժակյանը։

Նա հիշեցրեց, որ դեռ 2019 թ. փետրվարին Երևանի քաղաքապետ Հայկ Մարությանը ասում էր՝ 450 գազելներ պետք է ցանցից դուրս մնան։

«Այս 450 մաշված գազելները 15 տարեկան են, պետք է այս ամռանը գծերից դուրս մնացած լինեին, որովհետև արդեն 15 տարին լրացել է։ Փաստացի այս պահին ունենք իրավիճակ, երբ խախտված է կառավարության համապատասխան որոշումը։

Ո՞րն է ներքին հրահանգը, որ տրվել է՝ եկեք պահենք այս 15 տարին լրացած գազելները, մինչև տեսնենք՝ ինչ է լինելու, քանի խմբաքանակ կգա։  Հասկանալի է, որ եթե 450-ը գծերից դուրս մնան, կստեղծվի կոպալսային իրադրություն։

Ես պնդում եմ, որ այս կառավարության որոշումը գործող է, այն թույլ չի տալիս իրականացնել շահագործում։ Գիտեք, թե ինչպիսի  տարբեր միջադեպեր են տեղի ունեցել 15-ամյա գազելների հետ, Փաշինյանի ասած՝  մահված գազելների հետ, որոնք գերմաշված են։ Եթե այդ գազելներից որևէ մեկը վնասվի, պայթյուն տեղի ունենա, վթար լինի, Աստված մի արասցե՝ զոհեր ունենանք, քրեական գործ է հարուցվելու, պետք է գտնեն այն շարքային աշխատողին, ով պետք է հսկեր 15 տարին լրացած-չլրացած լինելը, բնականաբար, ենթարկեն քրեական պատասխանատվության, այնինչ ներքին հրահանգը նրանք են տվել»,- ասաց նա։

Դ. Խաժակյանի պնդմամբ, կամ պետք է այս 450 գազելները գծերից դուրս գան, քաղաքացիների կյանքերը չվտանգեն, կամ կառավարությունն այս որոշումը փոփոխի, լրացում կատարի, իր վրա վերցնի պատասխանատվությունն այն մասով, որ 15-ամյա գազելները պետք է շահագործվեն ցանցում։

«Դուրս եկող 450 մեքենայի հետ կապված, կարծում եմ, այդ բեռն ամբողջությամբ կառավարությանն է, քաղաքապետարանինը, որովհետև երկու տարի բան չեն արել, կամ մնան ու վտանգեն քաղաքացիների կյանքը, կամ դուրս գան, տրանսպորտային  կոլապս ստեղծվի։

Առաջարկում  եմ՝ այս պահից սկսած թողնել մեծամիտ վերաբերմունք այս գործին, ներգրավել  մասնավոր ներդրողների, միասնական օպերատորի, ցանկալի է երկու ամբողջ  քաղաքի սպասարկման համար, տալ երաշխիքներ, որ չեն վարվի այնպես, ինչպես շատ ներդրողների հետ են վարվել, այդ կազմակերպությունները բերեն նոր ավտոբուսներ։ Իհարկե, ժամանակ է տանելու, բայց գոնե այս պահից սկսենք։ Եթե հիմա էլ չսկսենք, ապագան ո՞րն է լինելու, չգիտեմ»,- ասաց Դավիթ Խաժակյանը։

Հարցին՝ արդյո՞ք Երևանի ավագանու առաջիկա նիստում քննարկվելու է փոխքաղաքապետի հարցը, նա դրական պատասխան տվեց. 

«Թեկնածուն արդեն մամուլում շրջանառվել էր, անունը չեմ հիշում, բայց Ազգային ժողովի «Իմ քայլը» խմբակցության անդամ Երջանիկ Հակոբյանի օգնականն է։

Չգիտեմ՝ ինչ մասնագիտական ունակություններ ունի։ Քաղաքային ոլորտը բավականին բարդ է։ Զարմանում եմ, որ իրենց ներսից, խմբակցության ներսից մարդ չհատկացրեցին, որովհետև կային մարդիկ, ովքեր ակտիվ ավագանու անդամներ էին, հարցազրույցներ էին տալիս, նրանց տարան շատ ավելի ցածր պաշտոնների, բայց հանեցին ավագանուց»,- ասաց նա։

Դավիթ Խաժակյանի պատկերացմամբ, հաջորդ փոխքաղաքապետը պետք է լինի ավագանու անդամ, որը գոնե ոլորտը երկու տարի վիզուալ պատկերացնում է։

«Բայց տեսնենք, կանխակալ չմոտենանք»,- ասաց Երևանի ավագանու «Լույս» խմբակցության ղեկավարը։

Հիշեցնենք՝ ներկայացված դիմումի համաձայն, Երևանի քաղաքապետ Հայկ Մարությանի կարգադրությամբ, փոխքաղաքապետ Հայկ Սարգսյանը հուլիսի 15-ից ավարտել է պաշտոնավարումը։