Ձեր վստահելի աղբյուրը

Երևան քաղաքի ընդհանուր իրավասության դատարանի Կենտրոն նստավայրում, դատավոր Արթուր Մկրտչյանի նախագահությամբ, մեկնարկել է ՀՀ ֆինանսների նախկին նախարար Գագիկ Խաչատրյանի եղբորորդու՝ ՊԵԿ ներքին անվտանգության վարչության նախկին ղեկավար Կարեն Խաչատրյանի գործի քննության՝ խափանման միջոցի վերաբերյալ նիստը։

Մեղադրող դատախազ Էդգար Արսենյանն ասաց, որ հաստատված մեղադրական եզրակացության մեջ շարադրված են Կարեն Խաչատրյանի մեղադրանքի հիմքում դրված ապացույցները,  որոնց նույնիսկ մակերեսային ուսումնասիրությամբ կարելի է արձանագրել, որ դրանք ավելի քան բավարար են  Խաչատրյանին  առաջադրված մեղադարանքում  հիմնավոր կասկածի շեմը հաղթահարելու  համար։  Դատախազի խոսքով, քրեական գործով ձեռք բերված նյութերը բավարար հիմք են տալիս ենթադրելու, որ Կարեն Խաչատրյանը  հայտնվելով ազատության մեջ, կարող է թաքնվել վարույթն իրականացնող մարմնից,  խուսափել  քրեական պատասխանատությունից և  նշանակված պատիժը կրելուց, խոչընդոտել դատարանում  գործի քննությանը՝ քրեական դատավարությանը մասնակցող անձնաց վրա անօրինական ազդեցության գործելով։

Նա ընդգծեց, որ Կարեն Խաչատրյանի կողմից  քննությունից թաքնվելու հավանականությունը շատ բարձր է՝ հաշվի առնելով այն հանգամանքը, որ  վերջինս եղբայրը՝ Արամ Խաչատրյանը, երկու  ազգականները՝ Գուրգեն և Արտյոմ Խաչատրյանները, արդեն իսկ թաքնվել են քննությունից և գտնվում են հետախուզման մեջ։ Էդգար Արսենյանի խոսքով, Կ. Խաչատրյանին կալանավորելու որոշումը հիմնավոր է և այն փոխելու հիմքեր չկան։

Կարեն Խաչատրյանի պաշտպան Ամրամ Մակինյանն ասաց, որ ընդհանրապես չեն ցանկանում անդրադառնալ հիմնավոր կասկածին։ Նա նշեց, որ դատարանն անցյալ դատական նիստին՝ Գագիկ Խաչատրյանի  կալանավորման իրավաչափության հարցը քննելիս, այդ հարցին անդրադաձել և գնահատել է։

«Շատ անկեղծ, իրատեսական չենք համարում, որ դատարանը կարող է  այլ որոշում կայացնել, քանի որ Գագիկ Խաչատրյանը  պաշտոնական դիրքով ավելի հեռուն է կանգնած  այն իրադարձություններին, որոնք մեղսագրվում են Կարեն  Խաչատրյանին, քան հիմնավոր համարելով  նաև Կարեն Խաչատրյանին վերագրված արարքի հիմնավոր կասկածը»,- ասաց Ա. Մակինյանը։

Նա ընդգծեց, որ Կարեն Խաչատրյանին մեղսագրվող արարքն իրականությունից շատ հեռու է, հավաքված ապացույցները  խոսում են ոչ թե Կարեն Խաչատրյանի մեղավորության մասին, այլ անմեղության։

Պաշտպանը նշեց, որ ապացույցների հավաքման փուլն ավարտվել է, Կ.Խաչատրյանը որևէ կերպ ապացույցների հավաքմանը չի կարող խոչընդոտել։ Ինչ վերաբերում է Կարեն Խաչատրյանի՝ քննությունից թաքնվելուն մասին դատախազի հայտարարությանը, Ամրամ Մակինյանն ասաց, որ Կ. Խաչատրյանը երկու անգամ   գտնվել է ազատության մեջ, ինքնակամ ներկայացրել է  վարույթ իրականացնող մարմնին։ 

Նա նշեց, որ արդեն մեկ տարի է դատախազության դեպոզիդ հաշվին վճարվել է պատճառված վնասը. «Չկա դատական պրակտիկայում երկրորդ մի դեպք, ում մեղսագրվում է 179-րդ հոդվածի 3-րդ մասի 1-ին կետով  նախատեսված արարք, ով վնասը հատուցած կլինի պետությանը ու դատարաններին թյուրիմացության մեջ գցելով՝ շարունակաբար կպահվի կալանքի տակ»։ 

Մակինյանը նշեց, որ այս գործով անցնող Գագիկ Խաչատրյանն  առողջական խնդիրների պատճառով չի կարող մասնակցել դատական նիստերին, և այս գործը Կարեն Խաչատրյանի մասով փակուղի կմտնի, քանի որ հնարավորություն չեն ունենա դատական նիստ հրավիրել առանց մյուս ամբաստանյալի։ Ըստ նրա, այս դեպքում Կարեն Խաչատրյանը շարունակաբար մնալու է կալանքի տակ։

Պաշտպանն ասաց, որ Կարեն Խաչատրյանին կալանքի տակ պահելու որևէ իրավաչափ հիմք չկա, խնդրեց նրա նկատմամբ կիրառել կալանավորման հետ չկապված այլընտրանքային խափանման միջոց։

Հիշեցնենք, որ Կարեն Խաչատրյանը մեղադրվում է առանձնապես խոշոր չափով վատնում կատարելու մեջ՝ ՀՀ ՔՕ 179-րդ հոդվածի 3-րդ մասի 1-ին կետով (յուրացնելը կամ վատնելը` առանձնապես խոշոր չափերով) և 314-րդ հոդվածի 1-ին մասով (պաշտոնեական կեղծիք): Նույն քրեական գործի շրջանակներում մեղադրանք է առաջադրվել նաև նրա ֆինանսների նախկին նախարար Գագիկ Խաչատրյանին:

Դատական տեղեկատվական համակագում նշված է. «Կարեն Խաչատրյանին մեղադրանք է առաջադրվել այն բանի համար, որ նա 2008թ. հուլիսի 1-ից մինչև 2014թ. մարտի 12-ը զբաղեցնելով ՀՀ կառավարությանն առընթեր մաքսային պետական կոմիտեի հատուկ բաժնի պետի, իսկ 2014թ. մարտի 12-ից մինչև 2014թ. մայիսի 23-ը ՀՀ կառավարությանն առընթեր պետական եկամուտների կոմիտեի ներքին անվտանգության վարչության պետի պաշտոնները, այնուհետև՝ 2014թ. մայիսի 23-ից մինչև 2016թ. հոկտեմբերի 21-ը՝ ՀՀ ֆինանսների նախարարության օպերատիվ հետախուզության և ներքին անվտանգության գլխավոր վարչության ներքին անվտանգության վարչության պետի պաշտոնը, մշտապես իրականացնելով իշխանության ներկայացուցչի գործառույթներ և լինելով պաշտոնատար անձ, անձնական և խմբային շահերից ելնելով և նախնական համաձայնության գալով իր ազգական՝ 2008թ. հունիսի 4-ից մինչև 2008թ. օգոստոսի 20-ը ՀՀ կառավարությանն առընթեր մաքսային պետական կոմիտեի նախագահ, այնուհետև՝ 2008թ. օգոստոսի 20-ից մինչև 2014թ. ապրիլի 26-ը, ՀՀ կառավարությանն առընթեր պետական եկամուտների կոմիտեի նախագահ, իսկ 2014թ. ապրիլի 26-ից մինչև 2016 թվականի սեպտեմբերի 8-ը ֆինանսների նախարար Գագիկ Խաչատրյանի հետ, հաստատապես տեղեկացված լինելով իր ղեկավարած ստորաբաժանման օպերատիվ աշխատակիցների՝ մաքսային տեսուչներ Տիգրան Գնունու Մամիկոնյանի, Կարեն Ռաֆայելի Հակոբյանի, Արմեն Աշխարհաբեկի Մկրտչյանի, Վարդան Լորիկի Արշակյանի, Կարեն Վաչիկի Խաչատրյանի և Մկրտիչ Ռոբերտի Վարդանյանի աշխատանքի չհաճախելու, օրենսդրությամբ իրենց վերապահված պարտականությունները չկատարելու և փոխարենը ՀՀ քաղաքացի Արմեն Ավետիսյանի անվտանգության ապահովմամբ, զբաղվելու վերաբերյալ, 2008- 2016թթ. ծառայության շահերին հակառակ պաշտոնեական պարտականությունները դիտավորությամբ չկատարելով, չի ապահովել կարգապահական խախտումների արձանագրումը և համապատասխան պատասխանատվության միջոցների կիրառումը, ավելին, նույն ժամանակահատվածում մաքսային տեսուչներ Տիգրան Գնունու Մամիկոնյանի, Կարեն Ռաֆայելի Հակոբյանի, Արմեն Աշխարհաբեկի Մկրտչյանի, Վարդան Լորիկի Արշակյանի, Կարեն Վաչիկի Խաչատրյանի և Մկրտիչ Ռոբերտի Վարդանյանի աշխատանքի չհաճախելու, աշխատանքային պարտականությունները չկատարելու հանգամանքը թաքցնելու անձնական և խմբային շահերից ելնելով, ինչպես նաև չաշխատած օրերի դիմաց աշխատավարձի գումարների դուրսգրման կեղծ հիմքեր ստեղծելու շահադիտական դրդումներից ելնելով, մեկ միասնական դիտավորությամբ, անձամբ ստորագրել է ՀՀ ՊԵԿ իրականացված կառուցվածքային փոփոխություններով պայմանավորված նշված անձանց պաշտոնի նշանակելու, արձակուրդ տրամադրելու և հատուկ կոչումներ շնորհելու վերաբերյալ առաջարկներ և դիմումներ, հաստատել և վճարման է ներկայացրել ՀՀ կառավարության 2005թ. օգոստոսի 25-ի N 1471-Ն որոշմամբ սահմանված իրավաբանական նշանակություն ունեցող փաստեր հավաստող և իրավահարաբերությունների վրա ազդող պաշտոնական փաստաթուղթ հանդիսացող բովանդակությամբ կեղծ՝ աշխատաժամանակի հաշվարկի տեղեկագրերում նրանց հաճախումների վերաբերյալ տեղեկագրեր, որի արդյունքում իր ղեկավարած ստորաբաժնում հրամանագրված հիշյալ անձանց համար հաշվարկվել, պետական բյուջեից դուրս գրվել և պետական միջոցների հաշվին անհիմն վճարվել է աշխատավարձի գումարներ»: