Ամեն օր ամրապնդվում է մեր առաջնագիծը, ամեն օր փոխվում է մեր բանակի սպառազինության աստիճանը. Արայիկ Հարությունյան
Արցախում Հայասանի բջջային կապի որակին համարժեք կապ է ներդրվելու։ Այսօր հրավիրված մամուլի ասուլիսի ընթացքում ասաց Արցախի Հանրապետության նախագաh Արայիկ Հարությունյանը՝ արդրադառնալով իր պաշտոնավարման 100 օրերին։
«Իմ՝ պետնախարարի պաշտոնից ազատվելուց օրեր առաջ եղել եմ Լիբանանում, հանդիպել եմ «Ղ տելեկոմի» միակ սեփականատեր Պիեռ Պատուշի հետ:
Համատեղ մշակել ենք ճանապարհային քարտեզ, որը թույլ է տալու Արցախում ունենալ բարձրակարգ կապ և մատչելի սակագներ: Ես հայտարարել եմ, որ ունենալու ենք Հայաստանի կապին համարժեք կապ: Վաղվանից 7 օրվա մեջ Արցախի հիմնական տարածքում ունենալու ենք բարձրակարգ 3G համակարգ, իսկ Ստեփանակերտում և մյուս խոշոր բնակավայրերում 4G համակարգ նախատեսվում է արդեն հաջորդ տարի»,- տեղեկացրեց Արցախի նախագահը։
Նա շեշտեց, որ Արցախում լինելու է Հայաստանում եղած կապի որակին և գնին համարժեք կապ որակի: Գների նվազումն էլ, ըստ Արայիկ Հարությունյանի, լինելու է սահուն, առաջին նվազեցումը հունվարի 1-ից, երկրորդը ամռանը, իսկ 2022-ին արդեն գինը կլինի Հայաստանի գներին համարժեք. «Մեր նպատակն է գործող օպերատորի հետ գալ համաձայնության»։
Հարց։ Անվտանգության խորհրդի մեծացման հետ կապված մարդիկ տեսնում են երկիշխանության վտանգ։ Ո՞րն է այս առնչությամբ Ձեր մեկնաբանությունը։
Ա. Հարությունյան։ Բացառվում է, որ Արցախում երկիշխանություն ստեղծվի: Անվտանգության խորհրդի աշխատողների քանակի ավելացման առաջարկությունը եղել է իմ կողմից, խորհրդի հանձնարարակաները տալիս եմ ես: Ծավալուն հանձնարարականներ եմ տվել պետական կառավարման համակարգի օպտիմալացման, տարբեր ծառայությունների արդյունավետության, ռազմավարական ծրագրերի ուսումնասիրման և քննարկման վերաբերյալ: Քանի որ երկրի նախագահը միանձնյա ղեկավար է, խորհրդատվական մարմին է լինելու նաև անվտանգության խորհուրդը, որ շատ հարցերում զսպող մեխանիզմը լինի։
Հարց։ Դուք բազմիցս հայտարարել եք պաշտպանության ոլորտում արվելիք բարեփոխումների մասին։ Եթե կարելի է՝ որոշակի տեղեկատվություն տրամադրեք այդ բարեփոխումների մասին։
Ա. Հարությունյան։ Իհարկե, պաշտպանության ոլորտի առումով մանրամասներ չենք ներկայացնի, բայց այն, որ հաճախակի են Ղարաբաղում լինում Հայաստանի վարչապետը, ԳՇ պետը, Պնախարարը, և մենք խորհրդակցություններ ենք ունենում, միասին գնում ենք առաջնագիծ, PR-ի համար չէ արվում։ Մենք կոնկրետ քայլեր, կոնկրետ առաջարկություններ ու կոնկրետ աշխատանքներ ենք անում։ Այն ինչ տեսնում եք՝ սնունդ, հագուստ, ջրամատակարարում, դրանք հասանելի են, բայց մյուս առումներով էլ ուզում եմ վստահեցնել, որ ամեն օր ամրապնդվում է մեր առաջնագիծը, ամեն օր փոխվում է մեր բանակի սպառազինության աստիճանը, ամեն օր հզորանում է մեր բանակը։ Երևի կգա ժամանակ, երբ ավելի շատ փակագծեր կբացենք։
Հարց։ Հիփոթեքային ծրագրով բնակարան ձեռք բերելու ուղղությամբ ի՞նչ քայլեր են արվելու, երիտասարդ ընտանիքների կողմից մեծ ակնկալիքներ ու սպասումներ կան։
Ա. Հարությունյան։ Հունվարի մեկից գործելու է «Յուրաքանչյուր ընտանիք՝ առանձին բնակարան» ծրագիրը։ Գիտեք, աջակցության գործիքակազմն այնքան մեծ է..., բոլորին հասանելի է լինելու, սկզբունքն այն է, որ Արցախում յուրաքանչյուր ընտանիք առանձին բնակարան պետք է ունենա։ Կլինի հիփոթեքով, լավ, չէ՞, ուրեմն սոցիալական այլ ծրագրեր կգործեն։ Բայց դրա համար նախ բնակարանաշինության հարցը պետք է լուծվի։
Հայտարարել եմ՝ Մարտունիում 500 բնակարան ենք կառուցելու։ Ու սկսում են քննադատությունները։ Բայց մենակ 150 սպա հերթագրվել է Մարտունիում բնակարան ստանալու համար։ Մոտ 100 վթարային շենք ունենք։ Դրա համա ակտիվ բնակարանաշինություն ենք սկսել Մարտունիում, Ասկերանում, Կարմիր շուկայի մոտ, Հադրութում ու Ստեփանակերտում ենք նախատեսում սկսել, Շուշիում ևս։ Եվ սրան զուգահեռ, Արցախում ցանկացած ընտանիք բնակարանի հնարավորություն պետք է ունենա։ Սա է մեր քաղաքականությունը։
Հարակից հրապարակումներ`
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
