Ձեր վստահելի աղբյուրը

Ինչպես արդեն Panorama.am-ը հայտնել է՝ ԵՊՀ ռեկտորի ժամանակավոր պաշտոնակատար Գեղամ Գևորյանն այսօր մամուլի ասուլիս է հրավիրել՝ ներկայացնելու իր պաշտոնավարման ընթացքում բուհի ձեռքբերումները, ուսման վարձերի հետ կապված խնդիրը ինչպես նաև դասապրոցեսի կազմակերպման հիմնական սկզբունքները։

Ստորև ներկայացնում ենք ԵՊՀ ռեկտորի ԺՊ-ին ներկայացված հարցերն ու դրանց պատասխանները։

Հարց- Արյդո՞ք կորոնավիրուսի համավարակի հետևանքով ստեղծված տնտեսական այս իրավիճակում բարոյական է ուսման վարձավճարների բարձրացումը։ Հատկապես այն պարագայում, երբ ուսումնական պրոցեսի արդյունավետությունը հիմա հարցականի տակ է։

Գ. Գևորգյան-  Կրթության արդյունավետությունը կամաց-կամաց կդադարի հարցականի տակ լինել, քանի որ այն թերությունները, որ կային անցած կիսամյակ, այս տարի շտկվելու են։ Այն առարկաները, որոնք պահանջում են առկա շփում, լինելու են առկա՝ բոլոր կուրսերում անխտիր։ Բացի այդ, ուսման վարձը այնպիսի բան է, որ չի կարելի ամեն օր փոխել։ Ինչ վարձավճարով ուսանողն ընդունվում է, դրանով էլ ավարտում է։ Այսինքն՝ այսօր բարձրացած վարձերը վերաբերում են միայն առաջին կուրսեցիներին։ Կխնդրեմ նաև բարոյական խրատներ չտալ, պետք է խոսել օրենքներով։ Եկեք, դուք նշեք, թե ի՞նչն է էժանացել այս ընթացքում։

Եթե նշենք, որ մարդիկ այս ընթացքում կորուստներ են կրել, ապա ես էլ կարող եմ թվարկել համալսարանի կորուստները։ Ուրեմն, մոտավորապես 180 մլն չստացված գումար ունենք։ Այս կիսամյակ, նախորդ տարվա նույն ընթացքի համեմատ 40 մլն ավելի զեղչ ենք արել։ Ծաղկաձորի բազայում էլ ենք ծախսեր արել, թեև այն տրամադրվել էր կորոնավիրուսի դեմ պայքարին։ Այդտեղ մոտավորապես 5 մլն դրամի կոմունալ ծախս է եղել, բայց այդ գումարը մենք պետությունից չենք պահանջել։ Բացի այն, որ 5 մլն էլ ենք տվել համավարակի դեմ պայքարի ֆոնդին։ Նաև տարածքի վարձակալության, ուսանողական հանրակացարանի վարձի գումարները չենք ստացել։ Բացի այդ, ուսանողական հանրակացարանում ապրողներից մի քանիսը վարձը չեն վճարել, մարտից գնացել են տուն։ Հիմա ասում են, որ չեն ապրել, լավ, վարձը չեն տվել, դա մի կողմ, բայց մենք էլ պետությանը ասել ենք՝ այսքան վարձ ենք հավաքելու, դրա համար էլ պիտի դեռ հարկ տանք։

Հարց- ԵՊՀ-ի դեմ 22 դատական հայց կա, որից 16-ը աշխատանքաին վեճեր են։ Որևէ տեղաշարժ կա՞ այդ առումով։

Գ. Գևորգյան - Ձեր ասած թիվը հնացած է, հիմա արդեն երկու անգամ ավելի շատ են մեր դեմ եղած հայցերը։ Վերջերս նաև մենք ենք հայցերով դիմել դատարան՝ մոտ երեսուն հայց։ Դրանք կապ ունեն «Պատիվ ունեմ» ծրագրի հետ, երբ մարդիկ դիմել էին, հետո դուրս մնացել համալսարանից։ Բայց, ըստ պայմանագրի, նրանք պետք է կրկնակին հետ տային բուհին։ Բայց, չգիտես խի, էդ գումարը հետ ստանալու պարտավորությունը դրել են համալսարանի վրա։

Իմ դեմ հարուցված գործեր ևս կան, որ հենց իմ անձին են առնչվում։

Հարց - Արդյո՞ք ռեկտորի պաշտոնում առաջադրվելու եք։

Գ. Գևորգյան- Ես չեմ առաջադրվել, չեմ էլ առաջադրվի։ Պատճառները շատ են, բայց դրանցից ամենակարևորն այն է, որ ես կարծում եմ՝ ռեկտորը պետք է լինի նշանակովի։ Այժմ ռեկտորի հինգ թեկնածու կա։ Այս տարի հունվարի 31-ին հոգաբարձուների խորհուրդը հայտարարեց ընտրություն, և մարտի 23-ին պետք է կայանային ընտրություններ։

Դիմել են Ռուսաստանից Պավել Գևորգյանը (ֆիզմաթ գիտությունների դոկտոր, պրոֆեսոր),  Աշոտ Սաղյանը (Ինֆորմացիայի ինստիտուտի տնօրեն, ակադեմիկոս), Ռուբեն Մելքոնյանը (Արևելագիտության ֆակուլտետի դեկան), Վահրամ Դումանյանը (Ինֆորմատիկայի, կիրառական մաթեմատիկայի ֆակուլտետի դեկան) և Վահե Հովհաննիսյանը (Քաղաքացիական իրավունքի ամբիոնի վարիչ)։

Հարց-  Դուք գիտեի՞ք, որ Ձեր պաշտոնավարման դեպքում օրենք է խախտվում, քանի որ չէր կարելի համատեղել Հիմնադրամի կառավարչի և «Էվոկաբանկի» խորհրդի փոխնախագահի պաշտոնները։

Գ. Գևորգյան- Ինձ թվում է, որ իմ առաջադրման ժամանակ ոչ միայն ես, այլ նաև գործին ներկաներից որևէ մեկը չգիտեր։ Եվ եթե տեղյակ լինեի, անշուշտ կասեի, քանի որ դա թաքցնելու բան չի։ Ավելին ասեմ, ես «Պրոմեթեյ» բանկի խորհրդի անդամ եմ 2006 թվականից։ Այն ժամանակ բանկը թույլտվություն է խնդրել համալսարանից, որ վերջինս չի առարկում՝ ես լինեմ բանկի խորհրդի անդամ։ Ես համալսարանից ռեկտորի ստորագրությամբ թուղթ եմ տարել, որ համալսարանը չի առարկում։ Դրանից հետո այդ ինֆորմացիան տեղադրվել է «Էվոկաբանկի» կայքում։ Դեռ դատական վարույթ չկա, բայց, դրա պատասխանատուն ես չեմ, խորհուրդն է ընտրել։