Ձեր վստահելի աղբյուրը

«Արդեն ավելի քան մեկ տարի է՝ ԵՊՀ-ի ռեկտորի պաշտոնակատար եմ, այդ ընթացքում արվել են գործեր, որոնք արժի ներկայացնել հանրության ուշադրությանը, թե չէ անընդհատ ինչ-որ բացասական երևույթների մասին է միայն խոսվում..., կառավարման ճգնաժամի և համալսարանում եղած կոլապսի մասին»,- այսօր հրավիրված մամուլի ասուլիսի ընթացքում ասաց ԵՊՀ ռեկտորի ժամանակավոր պաշտոնակատար Գեղամ Գևորգյանը։

Նրա խոսքով, վերջին մեկ շաբաթում ամենաշատ տրվող հարցը վարձավճարների չափերի մասին է։ Բացի այդ, մարդկանց շատ է հետաքրքրում համավարակի պայմաններում դասընթացների կազմակերպման հարցը։

«Նախորդ տարի հոկտեմբերից սկսել ենք քննարկումները՝ վարձերի մասով։ Իսկ ահա այս տարվա մարտի 12-ի գիտական խորհրդի նիստում արդեն համարյա միաձայն, երկու ձեռնպահ ձայներով որոշվել են այս վարձաչափերը։ Երբ այդ ժամանակ ինձ հարցնում էին՝ բա չե՞ք վախենում, որ դիմորդ չի լինի, ես ասում էի՝ կլինի։ Բայց անկեղծ, ինձ մոտ էլ կար կասկած, թե կարո՞ղ է հանկարծ չլինեն դիմորդներ։ Բայց մայիս ամսվա վերջին արդեն 4060 դիմում է եղել՝ նշված վարձավճարներով ընդունվելու համար։ Ընդ որում, դիմումների կեսը ամենաբարձր վարձ ունեցող մասնագիտությունների գծով էր։

Եվ հիմա, երբ կատարվել է ընդունելությունը, ու մարդիկ ստորագրում են այդ վարձով սովորելու պայմանագրերը, մի շարք ԶԼՄ-ներ, քաղաքական ուժեր, պատգամավորներ սկսում են խոսել վարձերի բարձր լինելու մասին։ Ես համաձայն եմ, որ վարձավճարները շատերի համար բարձր են, բայց կա երկու կողմ՝ մեկը ծառայություն է մատուցում, մյուսն էլ՝ օգտվում է դրանից։ Մեր բոլոր մասնագիտությունների գծով կան առաջարկներ՝ թե՛ ավելի էժան, թե՛ ավելի թանկ։ Մարդիկ կարող են ընտրել։ Եթե այս գնով այս մասնագիտությունն են ընտրել, ուրեմն դա իրենց ձեռք է տալիս, իրենք այդպես են ուզում»,- պարզաբանեց ԵՊՀ ռեկտորի ժամանակավոր պաշտոնակատարը։

Իսկ ահա զեղչերի մասով Գեղամ Գևորգյանը նշեց, որ ԵՊՀ-ն 20-50 %-ի չափով զեղչ է հատկացնում մեծ թվով ուսանողների: Նա նշեց, որ որոշ դեպքերում զեղչերը հասնում են մինչև 100%-ի.

«Կա կատեգորիա, որ 100% զեղչ ունենք, օրինակ, քառօրյա պատերազմի մասնակիցների դեպքում։ Բայց, եթե մենք ուսանողների 10%-ից ավելիի ուսման վարձերը զեղչենք, ապա դա լինելու է ուսանողի համար եկամուտ, և մենք որպես հարկային գործակալ, պարտավորվելու ենք նաև վճարել նրա հարկերը։ Եթե, օրինակ, 100 մլն-ից ավելի զեղչ ենք անում, ապա դրա դիմաց մոտավորապես 30 մլն վճարում ենք պետական բյուջե։ Եվ, որ ասում են՝ զեղչ արեք, դա նշանակում է, որ պետք է նաև բացի զեղչը այլ ծախսեր էլ անենք»,- նշեց նա։

Անդրադառնալով վերջին մեկ տարում եղած ձեռքբորումներին Գեղամ Գևորգյանը նշեց, որ նախ սահմանվել են դասախոսների կոմպետենցիաները, այսինքն՝ դասընթացը ձևակերպելիս ոչ միայն ծրագրի մասին է նշվում, այլ նաև այն մասին, թե որ դասախոսն իրավունք ունի տվյալ առարկան դասավանդելու։

«Բացի այդ ներառվել է օգնության կարիք ունեցող ուսանողին օգնություն ցուցաբերելու ինստիտուտ։ Այսինքն՝ եթե մեկն ունի տեսողության խնդիր, կամ շարժողականության հետ կապված խնդիր, ապա մենք նրան հատկացնում ենք օգնող, որը վարձատրվում է։ Երկար տարիների խոսակցություններից հետո կարողացել ենք անցկացնել լավագույն դասախոս մրցանակաբաշխություն։ Նաև արագացված տեմպերով իրականացրինք հեռավար ուսուցման կազմակերպում։ Այժմ անցկացնելու ենք օնլայն կուրսեր, որպեսզի ուսանողները նույնպես սովորեն օգտվել հեռավար ուսուցման գործիքներից։

Այս կիսամյակ մենք ունիֆիկացնում ենք հեռավար դասընթացների անցկացման հարթակը։ Հիմա միայն համալսարանական e-learning հարթակով են անցկացվելու հեռավար դասերը։ Անցած տարի շահագործման է հանձնվել հանրակացարանը, Ծաղկաձորի բազան ևս թարմացվել է, Բյուրականի բազայում էլ սկսվել են վերանորոգման աշխատանքները»,- ներկայացրեց նա։

ԵՊՀ ռեկտորի պաշտոնակատարը հատկապես ընդգծեց, որ այս տարի ընդունելության կարգը ևս այլ է եղել. ընդունվել են ավելի քիչ թվով ուսանողներ։

Նրա խոսքով, նախորդ տարվա համեմատ, այս տարի երկու անգամ պակասել է տասը և պակաս միավորներով ընդունվածների թիվը։ Դա, ըստ Գեղամ Գևորգյանի, համալսարանի համար դրական միտում է։