Ձեր վստահելի աղբյուրը

«Չափազանց կարևոր է, որ այդ բոլոր սահմանափակումները գործնականում լինեն խիստ համաչափ հետապնդվող նպատակին»,-նշել է ՄԻՊ Արման Թաթոյանն այսօր ԱԺ-ում քննարկվող օրինագծերի վերաբերյալ հրապարակած կարծիքում։

ՄԻՊ աշխատակազմից Panorama.am-ին տրամադրել են Պաշտպանի հիմնական կարծքն ու լրացուցիչ նկատառումները։

Արման Թաթոյանն ընդգծել է, որ նախագծերով սահմանված մարդու (հանրության) առողջության վրա շրջակա միջավայրի գործոնների՝ վնասակար ազդեցության նվազեցման, դրանց կանխարգելման, բացառման, ինչպես նաև վարակիչ ու ոչ վարակիչ հիվանդությունների առաջացման և տարածման կանխման ու վերացման նպատակով կանխարգելիչ և հակահամաճարակային միջոցառումների սահմանում և դրանց իրականացումը հանգեցնում է մարդու իրավունքների և ազատությունների սահմանափակման (ազատ տեղաշարժվելու, հավաքներին ազատորեն մասնակցելու և դրանք կազմակերպելու, անձնական տվյալների պաշտպանության և այլ իրավունքները):

«Հարկ է ընդգծել, որ թեև մեկուսացման, ինքնամեկուսացման, հավաքների ազատության, տնտեսական գործունեության արգելքի կամ մարդու իրավունքներին և ազատություններին միջամտություն ենթադրող այլ միջոցառումների իրավական հիմքերը սահմանված են, այնուամենայնիվ, այստեղ չափազանց կարևոր է, որ այդ բոլոր սահմանափակումները գործնականում լինեն խիստ համաչափ հետապնդվող նպատակին: Բացի այդ, իրավունքների և ազատությունների սահմանափակում առաջացնող միջամտությունների շարունակականությունն ավելի է մեծացնում պետության իրավական բեռը՝ երաշխավորելու սահմանափակող միջոցառումների հիմնավորվածությունն ու համաչափությունը։

Երկրում ստեղծված վիճակից ելնելով և հաշվի առնելով, որ արտակարգ դրության փոխարեն նախատեսվում է սահմանել կարանտինի իրավական ռեժիմ՝ իր բոլոր իրավական հետևանքներով և անձանց համար որոշակի սահմանափակումներով՝ կարևոր է ընդգծել, որ պետությունը պետք է իրավակիրառող տարբեր իրավասու մարմինների համար իրականացնի կարողությունների զարգացմանն ուղղված գործողություններ, վերապատրաստումների կամ այլ գործիքների միջոցով ապահովի վերջիններիս կողմից պատշաճ իրավակիրառումը, իրավունքների նկատմամբ սահմանափակման ճիշտ չափանիշների իմացությունը և կիրառությունը՝ առաջին հերթին ոչ թե հակադրելով մարդու իրավունքներն ու ազատությունները հանրային շահին, այլ ապահովելով դրանց համալիր պաշտպանությունն ու հավասարակշռումը:

Հարկ է նաև նկատի ունենալ, որ նախագծերով ներդրվող սահմանափակումներն իրենց ողջ համակցության մեջ կարող են անձի իրավական կարգավիճակի վրա ունենալ նույն հետևանքներն ու ազդեցությունները, ինչը որ արտակարգ դրություն պայմաններում: Ստացվում է, որ Նախագծի ընդունմամբ և դրանով նախատեսվող կարգավորումների կյանքի կոչմամբ՝ ամիսներ շարունակ սահմանափակումները շարունակաբար կարող են նույնությամբ պահպանվել արտակարգ իրավիճակի հիմք հանդիսացող համաճարակով պայմանավորված կարանտին սահմանվելու պարագայում, այնպես, ինչպես արտակարգ դրության պայմաններում է: Հետևաբար չափազանց կարևոր է, որ ցանկացած դրույթ մեկնաբանվի և կիրառվի մարդու իրավունքների պաշտպանության ընդհանուր սկզբունքներին խիստ համահունչ»,-մասնավորապես ասված է ՄԻՊ կարծիքում։
 
Դիտարկելով Նախագծերի կարգավորումների հետևանքով հիմնական իրավունքների և ազատությունների սահմանափակումը և դրանց ներգործության ծավալը՝ ՀՀ մարդու իրավունքների պաշտպանը նախատեսվող օրենսդրական կարգավորումների կիրառման նկատմամբ իրականացնելու է մշտադիտարկում՝ հաշվի առնելով նաև արտակարգ դրության պայմաններում այդ բոլոր սահմանափակումների կիրառմանն առնչվող արձանագրված մի շարք համակարգային խնդիրները: