Հանրապետության տարածքով մեկ կարանտին հայտարարելը շատ վատ ուղերձ է. Մարուքյան
«Ասում եք կարանտինը արտակարգ դրություն չէ, բայց այս նախագծով պարտադրվող պայմանները որևէ կերպով չեն տարբերվում արտակարգ դրության սահմանած պայմաններից»,- այսօր խորհրդարանում ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը՝ անդրադառնալով Կառավարության ներկայացրած օրենքի նախագծին, որով սահմանվում է՝ որ դեպքերում կարանտին կհայտարարվի երկրում, կամ առանձին համայնքներում։
Նրա խոսքով, ավելի ճկուն գործիքակազմ էր պետք, որպեսզի սահմանափակումներն ու իրավիճակը ավելի մեղմվեին, բայց այս դեպքում, միայն անունն է փոխվում, բայց իրավական կարգավորումները նույնն են մնում։
«Այս դեպքում կարծես թե նաև խորհրդարանի դերն է նվազեցվում, ավելի ճիշտ, խորհրդարանին այս գործընթացից ջնջում եք ընդհանրապես»,- նշեց Անի Սամսոնյանը։
Նա նշեց, որ օրենքով սահմանվում է, որ մեկուսացման վայրում անձին տրամադրվում են բավարար պայմաններ, խորհրդատվություն և սնունդ։ Պատգամավորին հետաքրքրում էր՝ ինչո՞ւ ինքնամեկուսացման պայմաններում անձին նույն հնարավորությունները չեն տրվում։
«Այս ընթացքում շատ մարդիկ են եղել, որ զանգել ասել են՝ ինձ պարտադրել են ինքնամեկուսանալ, և ես զրկվել եմ իմ աշխատանքից, կամ միայնակ եմ ապրում և որևէ աջակցություն չեմ ստանում։ Երկրորդը, պետական կառավարման լիազոր մարմինը, տեսչական մարմինները, տեղական ինքնակառավարման մարմինները..., հնարավորություն են ստանում անձի բժշկական գաղտնիքին ծանոթանալու։ Ինչպե՞ս կարող է սա տեղի ունենալ մարդու իրավունքների պաշտպանությունը հարգող երկրում։ Բացի այդ, ինձ հետաքրքրում է՝ կարո՞ղ է արդյոք Կառավարությունը ենթաօրենսդրական ակտ ընդունի և որոշի, որ էլեկտրոնային տեղորոշումը նորից գործելու է»,- ասաց պատգամավորը։
ԱԺ «Լուսավոր Հայաստան» խմբակցության ղեկավար Էդմոն Մարուքյանն էլ, անդրադառնալով օրակարգային նախագծին, նշեց, որ նախագիծը շատ հակասահմանադրական դրույթներ ունի՝ կապված մարդու իրավունքների հետ։
«Հանրապետության տարածքով մեկ կարանտին հայտարարելը շատ վատ ուղերձ է։ Ես մտավախություն ունեմ, որ այն երկրները, որոնք պատրաստվում էին Հայաստանի քաղաքացիների համար սահմանները բացել սեպտեմբերի 12-ից հետո, հնարավոր է, որ կարանտինի հիմքով էլի շարունակեն մեր երկրի հետ սահմանները փակ պահել, որից տուժելու է մեր տնտեսությունը։ Կարելի է էլի քննարկել, տարբերակներ գտնել։ Միջազգային առողջապահության կազմակերպության մոտեցումներն էլ պետք է վերանայվի։ Հինգ ամիս ունեինք այս նախագծի վրա աշխատելու, բայց հիմնական զեկուցողը հինգ րոպեում զեկուցեց այս նախագիծը։ Ինչո՞ւ այս ռեժիմով պետք է քննարկեինք այս նախագիծը։ Բնականաբար, «Լուսավոր Հայաստան»-ը դեմ կքվեարկի այս նախաձեռնությանը»,- շեշտեց Էդմոն Մարուքյանը։
Հարակից հրապարակումներ`
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
