Ձեր վստահելի աղբյուրը

Եռաբլուրում այսօր առավոտյան ծաղիկների խոնարհման և խնկարկման արարողություն էր՝ ի հիշատակ Արցախի հերոս կապիտան Արմենակ Ուրֆանյանի և քառօրյա պատերազմի բոլոր հերոսների։ Միջոցառումը կազմակերպել է «Հայրենյաց պաշտպան» հիմնադրամը։

Միջոցառմանը ներկա լինելու համար Եռաբլուր այցելած մարդիկ, հերոսների հարազատներն ու ծնողները տեսել են՝ Արցախի հերոսներ Արմենակ Ուրֆանյանի ու Ռոբերտ Աբաջյանի շիրմաքարերը պղծված։ Պատահածը զայրացրել ու ցավ է պատճառել ներկաներին։

«Ռոբերտի գլխի հատվածից վերև, իսկ Արմենակի հենց դեմքի վրա մոմի կամ ինչ-որ այլ բանի հետքեր կային։ Նախորդ անգամվա պես էր, այն ժամանակ, հիշում եք, բոլոր գերեզմանաքարերն էին պղծվել։ Այս անգամ միայն երկուսինն էին, ես չգիտեմ, դա կա՞պ ունի այն բանի հետ, որ նրանք Արցախի հերոս են»,- ասաց Ուրֆանյանի մոր՝ տիկին Համեստի մտերիմ ընկերուհի Արփի Թագոյանը։

Հարազատները տեղի ունեցածի մասին ահազանգել են ոստիկանությանը, ինչից հետո ոստիկաններ են ժամանել Եռաբլուր։

Ապրիլյան պատերազմի մասնակից Հրանտ Սարկիսովն էլ գրել է. 

«Վիժվածքները ապրում են մեզ զուգահեռ...

Ուրեմն մարդկությանն ու հայրենիքին որեւէ արժեք չտված ինչ֊որ հեյվաններ, արդեն երկրորդ անգամ պղծում են Ապրիլյան մարտական գործողությունների մասնակիցների շիրիմաքարերը։ Այս անգամ՝ Արցախի 《Ոսկե արծիվ》 շքանշանի ասպետներ Արմենակ Ուրֆանյանինը եւ Ռոբերտ Աբաջյանինը։

Թքեմ ես Ձեր երեսին՝ հաշվի առնելով կոնտենտը դրա համար եմ սենց ասում։

ՀՀ ոստիկանություն / Police of the Republic of Armenia Կարծում եմ անելիք ունեք, քանի մեր Պետությունում վանդալներ կան»։ 

Հիշեցնենք, որ սա առաջին դեպքը չէ։ Նախորդ դեպքը գրանցվել էր 2019-ի օգոստոսին։
Ոստիկանություն բերված Երևանի բնակիչ 51-ամյա կինը պատմել էր, որ այրված մոմ է լցրել շիրմաքարերին՝ անեծքը հանելու համար։ Հետո իրավապահ մարմնից հայտնեցին՝ կինը հոգեկան խնդիրներ ունի։

Լուսանկարները Panorama.am-ին տրամադրել է Արփի Թագոյանը։