Ձեր վստահելի աղբյուրը

«Համաձայն տեղեկությունների այսօր գիշերը «Լիդիան Արմենիա» ընկերության կողմից վարձված նոր պահնորդական կազմակերպության ծառայողները հարձակվել են Ամուլսարի պաշտպանների վրա և ծեծի ենթարկել նրանց: Համաձայն ականատեսների բռնություն է գործադրվել նաև ոստիկանի վրա»,- ֆեյսբուքյան էջում գրել  է ԱԺ «Լուսավոր Հայաստան» խմբակցության անդամ Անի Սամսոնյանը: 

Նա հայտնում է, որ նախորդ օրը գործընկերոջ` Գևորգ Գորգիսյանի հետ եղել են Ամուլսարում, զրուցել են պաշտպանների հետ:

«Դիրքերում հերթապահություն էր իրականացնում նաև ՀՀ Ոստիկանությունը, ինչը շատ անհրաժեշտ է, բայց հերթապահող երկու ոստիկանի դիմաց կային պահնորդական 5-6 ծառայողներ: Նշեմ նաև, որ մասնավոր պահնորդները մեր այնտեղ գտնվելու ամբողջ ընթացքում մեզ տեսանկարահանել են, ինչի թույլտվությունը և իրավունքը չունեին:

Երբ անհրաժեշտ է բերման ենթարկել քաղաքացիներին, ոստիկանությունը կուտակում է բավարար ուժեր, բայց երբ անհրաժեշտ է պաշտպանել և կանխել բախումները, երկու ոստիկանը բավարար է համարվում: Սա սխալ է:

ՀՀ ոստիկանություն / Police of the Republic of Armenia-ը պետք է օբյեկտիվորեն քննի բոլոր հանգամանքները, իսկ մեղավորները պիտի ենթարկվեն պատասխանատվության»,- գրել  Անի Սամսոնյանը:

Ջերմուկի բնակիչ, Ամուլսարի պահապաններից Շիրակ Բունիաթյանը իր ֆեյսբուքյան էջում տեսանյութ է հրապարակել՝ նշելով, որ տեղեկություն են ստացել, որ «Լիդիանի» նոր պահնորդական  ծառայությունը հարձակվել է պոստում հերթափոխող քաղաքացիների  վրա, դաժան ծեծի են ենթարկել: 

«Բանից պարզվում է՝ այս մարդիկ ավելի սադրիչ են, քան նախկինները: Դուրս է գալիս, որ Լիդիանը վարձելով այս մարդկանց՝ հստակ առաջադրանք է է տվել՝ համայնքի բնակիչների դեմ ուժ կիրառել: Ոստիկանապետն ասաց, որ ունեն օպերատիվ նկարահանումներ, նույնիսկ ոստիկանի են հարվածել այդտեղ, մարդկանց քարշ տալով մտցրել են ներս, դաժան ծեծի ենթարկել լուրջ վնասվածքներ ունեն»,- ասում է Բունիաթյանը: