Ձեր վստահելի աղբյուրը

«Արայիկ հեռացի՛ր», «Հայրենիքդ ուրացար, Արայի՛կ», «Կրոնդ ուրացար, Արայի՛կ, հեռացի՛ր» վանկարկումներով մեկնարկեց ԿԳՄՍ նախարար Արայիկ Հարությունյանի հրաժարականի պահանջով բողոքի ակցիան։

Ակցայի մասնակիցներին չի գոհացնում նախարարի վարած քաղաքականությունը։ Նրանք պդնում են, որ Արայիկ Հարությունյանն իրավունք չունի դիպչելու հայ ազգի պատմությանն ու կրոնին։

Սա առաջին անգամը չէ, ինչ «Կամք» ՀԿ-ի անդամները ակցիա են կազմակերպում՝ պահանջելով ԿԳՄՍ նախարարի հրաժարականը։ Ինչպես նրանք են նշում, իրենց պայքարը վերքաղաքական է, այն միտված է հայի տեսակը պահպանելուն։ Միևնույն ժամանակ, Արայիկ Հարությունյանն էլ արձագանքել է, որ ակցիայի մասնակիցներն ու իր հրաժարականը պահանջողները կա՛մ հանրակրթության և դրա չափորոշիչների մասին գիտելիք չունեն, կա՛մ էլ կեղծում են, թե անտեղյակ են։

Ակիցայի մասնակիցները չեն բացառում, որ ԿԳՄՍ նախարարի հրաժարականի պահանջը կարող է ավելի ընդլայնվել, և նրանք կարող են պահանջել, իրենց խոսքով, ողջ ապաշնորհ Կառավարության հրաժարականը։

Ակցիայի կազմակերպիչներից Տիգրան Չոբանյանը նախ հորդորեց, որ քաղաքացիները պահպանեն սոցիալական հեռավորությունը, դրա համար արվել են վարդագույն նշաններ։
Բացի այդ, նրա խոսքով, ոստիկանության հետ առաջացած ցանկացած հարցից առաջ պետք է ակցիայի մասնակիցներն իրեն դիմեն՝ զերծ մնալու ցանկացած խնդրից և բախումից։

«Խնդրում եմ, առավել հարգանքով վերաբերել ոստիկաններին, մենք պարտավոր ենք հարգել նրանց ուսադիրները։ Ոստիկանը մերն է, նա էլ իր պարտքն է կատարում։ Եվ, եթե դիմակներ չկրեք, ապա ոստիկաններն իրենց օրինական պահանջն են կատարելու, ու մենք չենք միջամտելու։ Ովքեր չունեն դիմակ, թող դիմեն, մենք կտրամադրենք»,- շեշտեց Տիգրան Չոբանյանը։

Վերջինիս խոսքն ընդհատեցին ակցիայի մասնակիցները՝ վանկարկելով՝ «Արայի՛կ, հեռացիր»։

Մյուսներն էլ շարունակեցին. «Արայի՛կ, քո տեղն աղբանոցում է, մենք այդ տեղն արդեն որոշել ենք»։

Ակցիայի մասնակիցները ևս մեկ անգամ հիշեցրին, որ իրենց պայքարը քաղաքական չէ, մեկ անձի դեմ չէ, այն ազգային արժեքների պահպանման խնդրի շուրջ է, այն նվիրված է օրհասական մի շարք խնդիրներին, որոնք ծառացած են հայ ժողովրդի առաջ։

«Իշխանության անփորձ, կամ օտար շահերին ծառայող մի շարք անդամներ, իշխանության գալու հաջորդ օրվանից լծվեցին օտարածին արժեքներ ներմուծելու ազգադավ գործին։ Նրանցից աչքի ընկավ ԿԳՄՍ սուպերնախարար Արայիկ Հարությունյանը, որը շարքային դասախոսությունից բացի չունենալով որևէ փորձառություն, ընդամենն աչքի է ընկել որպես քայլով։ Նա ջանք չի խնայում ամենաստոր եղանակներով կազմալուծելու մեր ինքնությունը ներկայացնող ազգային արժեքները։ Նրանք ընդունում են որոշումներ, որոնք ուղղակի միտված են քայքայելու, խաթարելու և այլասերելու մեր ամբողջ կրթական համակարգը՝ սկսած հանրակրթական դպրոցներից մինչև բուհեր»,- նշեց նրանցից մեկը։

Նրանք նախ ներկայացրին դասագրքերում եղած նյութերը, որոնք, ըստ ակցիայի մասնակիցներ, աղբ են.««Հայրիկը սկսում է ոռնալ..., մայրիկը սկսում է ծեծել հայրիկին..., հայրիկը տրուսիկի միջից ճմռթված 1000 դրամ է հանում...». ահա այսպիսի նյութով են պղծում մատաղ սերնդին, սա 11-րդ դասարանի դասագրքում է գրվելու։ Ո՞վ պիտի այս ամենի պատասխանատվությունը կրի։
Հաջորդը, որ մի շատ կարևոր բանաստեղծություն՝ «Ոսպ մը, ոսպ մը, ոսպ մը քար, ոսպ մը, ոսպ մը, քար մը...»։ Ահա այսօրվա բանաստեղծության տեսակը։ Կամ սա՝ «Արթնացա, տակս թաց էր, բայց չիշիկ չէր...»։ Սա է մեր այսօրվա գրականության դասագրքի նյութը»։

Ըստ ակցիայի մասնակիցների, ներկայիս Կառավարությունը միտված է հայ ազգային արժեքների ոչնչացմանը։

«Օգտվելով պաշտոնից՝ Արայիկ Հարությունյանը ջանք չի խնայում կազմալուծելու նաև մեր և մեր պետությունը ներկայացնող այնպիսի ոլորտներ, ինչպիսիք են մշակույթը, գիտությունը և սպորտը։ Մենք անհապաղ պահանջում ենք Արայիկ Հարությունյանի հրաժարականը, քանի որ նա որևէ կապ չունի հայկական արժեհամակարգի հետ»,- շեշտում են ակցիայի մասնակիցները։