Ձեր վստահելի աղբյուրը

Երևանի ընդհանուր իրավասության դատարանի Էրեբունու նստավայրում այսօր շարունակվելու է «մարտի 1»-ի զոհերի իրավահաջորդներն ընդդեմ արցախյան պատերազմում զոհված ազատամարտիկների իրավահաջորդների դատական հայցի քննությունը։

Հիշեցնենք, որ մարտի մեկի իրադարձությունների հետևանքով սպանվածներից մի քանիսի ծնողները՝ Սարգիս Քլոյանը, Վաչագան Ֆարմանյանը, Ռուզաննա Հարությունյանը, Ալլա Հովհաննիսյանը, Էդիկ Հարությունյանը, Մարիամ Հովհաննիսյանը,  Լիլիա Մինասյանը, Ջեմմա Վարդումյանը. Վարդուհի Բաղդասարյանը հայց են ներկայացրել դատարան՝ պատվին և արժանապատվությանը պատճառված վնասի հատուցման պահանջով։ Կառավարության որոշումով «մարտի 1»-ի իրադարձությունների ժամանակ սպանվածների ընտանիքներին տրամադրվել էր 30 մլն դրամ, խաղաղ պայմաններում զոհված զինծառայողների ընտանիքների անդամներին որոշումն անարդար էր թվացել։

Այս գործով որպես պատասխանող հանդես եկող  «Զինվորի մայր» ՀԿ-ի նախագահ Մարգարիտա Խաչատրյանն այսօր դատարան չբարձրացավ: Լրագրողների հետ զրույցում նա ասաց, որ սա դատական երրորդ նիստն է, սպասում է, որ «մարտի 1«-ի զոհերից Գոռ Քլոյանի հայրը՝ Սարգիս Քլոյանը, 30 միլիոնը կբերի ու կշպրտի իր երեսին:

«Տիկին Մարգարիտն 23 տարի բանակի կողքին կանգնած է: Ուրախությամբ  կվերցնեմ այդ  շպրտած գումարը, կբաժանեմ իմ պայմանագրայինների ընտանիքներին, որոնք 26 հազար ստացել էին ու կառավարությունը մեր  պայմանագրայիններից այդ 26 հազարը գումարները հետ էր պահանջել: Շատ ամոթ է, որ սահման չպահող, զինվորի  գին չիմացող  դասալիքներն այսօր պետք է որոշեն՝ դատի տա՞ն տիկին Մարգարիտային, թե՞ ոչ»,- նշեց Մ. Խաչատրյանը:

Հարցին, թե ի՞նչ 26 հազարի մասին է խոսքը, նա պատասխանեց.  «Կառավարությունը միջոցառումների ծրագիր իրականացրեց,  պայմանագրային զինծառայողների ընտանիքներին տրամադրեց 26 հազար 500 դրամ: Վարձով ապրող ընտանիքը դիմեց ինձ, թե տիկին Մարգարիտա մեզ հաշվեհամար են փոխանցել, որ այդ գումարը հետ ուղարկենք, հակառակ դեպքում, աշխատավարձից բռնագանձում կկատարեն։ Եվ կատարվեց դա: Իրենք չմուծեցին և պայմանագրայիններին ստիպեցին այդ գումարը հետ վերադարձնեն։ Հետևելու ենք, թե որ չափորոշիչը կիրառեցին՝ «մարտի 1»-ի ժամանակ քաղաքում ցույց անողներին իրենք վճարեցին, իսկ պայմանագրայինների 26 հազարը հետ պահանջեցին: Շատ ամոթ է, մենք պատրաստ ենք Քլոյանի նմաններին 30 միլիոն տալ, իսկ պայմանագրայինների 26 հազար դրամը հետ պահանջել»:

Նա ասաց, որ այսօր կարդացել է՝ «մարտի 1»-ի զոհերի իրավահաջորդներն ու նրանց նրանց ներկայացուցիչներն չեն մասնկացելու ՀՀ երկրորդ նախագահ Ռոբերտ Քոչարյանի և մյուսների գործով դատերին:

«Հարգարժան պարոնայք, այդ 30 միլիոնները  վերջացել է, ձեր դասալիքներին ասեք՝ թող նորից ֆինանսավորեն, դուք էլ նորից գնացեք, մասնակցեք Քոչարյանի դատին, քանի որ գիտեք՝ դա թատրոն է, դա դատական նիստ չէ»,- ասաց նա:

Նա նշեց, որ երբևէ  չի պատրաստվում ներողություն խնդրել այն մարդկանցից, որոնք  իրենց որդիներին կորցրեցին ոչ թե հայրենիքի պաշտպանության համար, այլ կորցրեցին ոտնձգությունների, աթոռակռվի համար. «Ես իրենց ինքնասիրությունը, արժանապատվությունը չեմ վիրավորել: Եթե մեկը տիկին Մարգարիտային կապացուցի, որ չի եղել ոտնձգություն, խանութի թալան, դրամաշորթություն, պարգևներ, ինքնս ներողություն կխնդրեմ, բայց ներկա պահին քանզի «մարտի 1-ի» դեպքերով անմեղները պետք է պատասխան տան, մեղավորները չեն պատժվում, ներողություն խնդրելու բան չունեմ»:

Մարգարիտա Խաչատրյանն ընդգծեց, որկառավարության պատվերն է՝ «տիկին Մարգարիտային վարքաբեկեն ինչքան կարող եք»:

«Գիտեք՝  ես որ դեպքում իրենց կհարգեի, որ ասեին՝  գտել եք մեր որդիների սպանողին, պահանջում ենք բավարարել քաղհայցը: Քանզի եթե  դատական պրոցեսում  իսկական սպանողը չի գտնվել, իրենց քաղհայց տալու իրավունք  չունեին: Չափորոշիչը չեն կարողանում հիմնավորել, թե որ չափորոշիչն են կիրառել, որ այդ ընտանքիներին տրվել է 30 միլիոն: Անձնապես իրենց հետ խնդիր չունենք, իսկ եթե փողոցի կռիվների համար զոհերին տալիս ենք 30 միլիոն, բարի լինենք մնացած կոտորածների համար էլ տանք՝  հացադուլ անողը սպանվեց, «Սասնա ծռերի» դեպքով ոստիկանների սպանությունները»,- նշեց նա:

Դատարանից դուրս գալով՝ ասացին, որ այսօրվա դատական նիստը հետաձգվեց այն պատճառաբանությամբ, որ ծանուցում չեն ստացել:

Հացին՝ սա ի՞նչ է նշանակում, Մ.Խաչատրյանն ասաց. «Եթե կառավարությունից նորից 30  միլիոն տան, այս դատին էլ կգան, Ռոբերտ Քոչարյանի դատին է կգնան»: