Ձեր վստահելի աղբյուրը

«Այսօր «Սորոսի» գրասենյակի կողմից իրականացվող հանցագործության մասին հաղորդմում ենք ներկայացնելու ԱԱԾ»,- այսօր հրավիրված մամուլի ասուլիսում ասաց հասարակական գործիչ, «ՎԵՏՕ» շարժման նախաձեռնող Նարեկ Մալյանը։

Նրա խոսքով, գոյություն ունի իրավական ճանապարհ «Սորոսի» գրասենյակի գործունեությունը Հայաստանում կասեցնելու վերաբերյալ։ Ըստ Մալյանի, վերջին մեկ տարվա ընթացքում բավականին լայն դժգոհություններ կան վերոնշյալ հիմնադրամի «բարեգործությունների» հետ կապված, որոնք հիմնականում արտահայտվում են ցույցերի միջոցով, սակայն այսօր սկսվելու է նաև առաջին իրավական գործընթացը՝ ընդդեմ «Սորոսի» գրասենյակի։

«Ուրեմն այսպես, ՀՀ-ում ապրում է  ազգությամբ եզդի մի մարդ՝ Սաշիկ Սուլթանյան, որը մինչև 2018 թվականի ապրիլ-մայիս ամիսները հրապարակային հայտարարում էր, որ Հայաստանում շատ լավ հարաբերություններ են հայ և եզդի ազգությունների միջև։  Նա նույնիսկ կոչ էր անում Հայատանի նոր իշխանություններին՝ շարունակել նույն քաղաքականությունը, որը եղել է նախկինում։ Սակայն, 2019 թվականի սեպտեմբերին Սաշիկ Սուլթանյանի կյանքում հայտնվում է «Սորոսի» գրասենյակը. նա  ստանում է իր առաջին գրանտը՝ 10 հազար դոլարի չափով։ Դրանից հետո նա միանգամից փոխում է իր կարծիքը հայ և եզդի ժողովուրդների համակեցության մասին։ Այս ամենի կապը, իհարկե, ԱԱԾ-ն ավելի մանրամասն կպարզի…, բայց 2020 թվականին Սաշիկ Սուլթանյանը եզդիերենով հարցազրույցներ է տվել ezdinews.com կայքին, որտեղ հայտարարել է հետևյալը.

«Եզդիների իրավունքները Հայաստանում պաշտպանված չեն, Հայստանը չի կատարում իր ստանձնած միջազգային պարտավորությունները ազգային փոքրամասնությունների,այդ թվում՝ եզդիների իրավունքների պաշտպանության հարցում։ Հայաստանում չի դասավանդվում եզդիերենը, լեզուն չունի որևէ առաջընթաց, եզդիները Հայաստանում կորցնում են իրենց մշակույթը»։ Այս վերջին երկու կետի մասով ասեմ, որ աշխարհում կա մի երկիր, որ եզդիերեն գրքեր է հրատարակում, այդ երկիրը ՀՀ-ն է»,- ներկայացրեց Նարեկ Մալյանը։

Նա նշեց նաև, որ հարցազրույցում Սաշիկ Սուլթանյանն ասել է, թե եզդիներին ունեզրկում են՝ ազգային պատկանելության պատճառով, նրանք վստահ չեն Հայասատանում իրենց վաղվա օրվա համար. ««Հայ օլիգարխները եզդիներին զրկում են իրենց հողամասերից, առկա է 30-40 դեպք, թեև Սուլթանյանը չի կարողացել որևէ օրինակ ներկայացնել։ Եվ ամենակարևոր կետը. նա նշել է, որ 1988-ին Հայաստանում եղել է շովինիստական շարժում, որի պահանջն է եղել, որ Հայաստանում բնակվեն միայն հայերը, եզդիներին գնդակահարել են և վռնդել իրենց տներից»։ Խոսքը Ղարաբաղյան շարժման մասին է։ Այսինքն՝ Սորոսից գումար վերցնելուց հետո Ղարաբաղյան շարժումը ներկայացնում են՝ որպես շովինիստական շարժում»։

Ըստ Նարեկ Մալյանի, մինչև Սորոսից գումար ստանալը Սաշիկ Սուլթանյանը գովերգել է հայ-եզդիական հարաբերությունները, իսկ գումար ստանալուց հետո փոխվել է նրա մոտեցումը։

«Իսկ ի՞նչ օգուտ կարող է ունենալ սրանից «Սորոսի» գրասենյակը։ Այս գրասենյակն առաջնորդվում է հետևյալ ձևով. նրանք վերցնում են մի փոքրիկ լոկալ խնդիր, փորձում են ուռճացնել այն։ Եվ մեկ-երկու տարի անց այս խնդրի շուրջ փորձելու են հայ և եզդի ժողովուրդների մեջ թշնամանք հրահրել, և ստեղծել այնպիսի ատելության մթնոլորտ, որ փոխադարձ հաշվեհարդարներ սկսվեն փողոցներում։ Սա գրանտավորված մի կաթիլ մեղր է, որը քայլ է՝ ոչնչից դեպի քաղաքացիական պատերազմ։ Այն, որ Սորոսը գումար է տալիս հանցագործներին ու մարդասպաններին, արդեն պարզ է։ Նրանք բռնություն են հրահրում։ Եվ մենք պահանջում ենք ԱԱԾ-ից՝ ճշտել Սաշիկ Սուլթանյանի ստացած գրանտի իրական նպատակները, դրա հիման վրա էլ գնալու ենք հիմնադրամի լուծարման պահանջին, քանի որ հիմնադրամի գործունեությունը ազգամիջյան թշնամանք է հրահրում»,- շեշտեց Նարեկ Մալյանը։