Ձեր վստահելի աղբյուրը

ԱՄՆ նախագահի թեկնածու Ջո Բայդենի նախընտրական շտաբին ծառայություններ մատուցող խորհրդատվական ընկերությունը վերջին ամիսներին հարձակման է ենթարկվել հաքերների կողմից, որոնք ենթադրաբար աշխատել են Ռուսաստանից: Ավելի վաղ ընկերության ղեկավարությունը, «Microsoft» ամերիկյան կորպորացիայի մասնագետների աջակցությամբ, ծանուցել էր ենթադրյալ հարձակումների մասին:

«ՏԱՍՍ»-ը գրում է, որ ենթադրյալ կիբերհարձակումների թիրախը Վաշինգտոնում տեղակայված «SKDK» ընկերությունն է, որը ծառայություններ է մատուցում Բայդենի նախընտրական շտաբներին և դեմոկրատ այլ հայտնի քաղաքական գործիչներին: Ըստ ընկերության հայտարարությունների՝ վերջին երկու ամիսներին իր վրա ֆիշինգային հարձակումներ են իրականացվել:

«Ռոյթերս»-ի աղբյուրները նշում են, որ ըստ «Microsoft» փորձագետների, նրանց թիկունքում կարող են լինել Ռուսաստանի իշխանությունների հետ կապված հաքերները:

Միևնույն ժամանակ, գործակալության աղբյուրները չեն նշում, թե ինչպիսի տեղեկատվություն էին փորձում ձեռք բերել հաքերները: Անհայտ է նաև, թե ով է ենթադրյալ հարձակումների թիրախը՝ ԱՄՆ նախագահի թեկնածո՞ւն, թե՞՝ խորհրդատվական ընկերության այլ հաճախորդներ:

«Ռոյթերս»-ի աղբյուրներից մեկը շեշտել է,  որ հաքերները չեն կարողացել ներխուժել «SKDK»- ի անվտանգության մեխանիզմներ:

ԱՄՆ-ը և այլ արևմտյան երկրներ նախկինում ևս բազում տեղեկատվություններ են տարածել ռուս հաքերների կողմից կիբերհարձակումների մասին: Մոսկվան բազմիցս հերքել է նման մեղադրանքները: