Ռոբերտ Քոչարյան. Բանակում չծառայած մարդուն պետք է արգելել պետական պաշտոն զբաղեցնել
«Ես համակրում էի «Ազգ-բանակ» ծրագրին, ցավոք, այն չիրականացվեց»,- «Հաղթանակած 2020» երիտասարդական հավաքի մասնակիցների հետ հանդիպմանն ասել է Արցախի հերոս, Հայաստանի երկրորդ նախագահ Ռոբերտ Քոչարյանը։
Ինչ վերաբերում է աշխարահազորի ստեղծման նախաձեռնությանը, ապա ՀՀ երկորրդ նախագահը նշել է, որ դրանում իր համար անհասկանալի բաներ դեռ կան։
«Մի բան էր զարմանալի ինձ համար, երբ պաշտպանության նախարարի տեղակալը վերջերս իր ելույթներից մեկում ասաց՝ ծանոթ չէ «Ազգ-բանակ» հայեցակարգին։ Եթե հիմա խոսում են աշխարհազորից, ապա իմ կարծիքով, պետք էր նախ ծանոթանալ «Ազգ-բանակ» ծրագրին ու հասկանալ, միգուցե դա՞ էր ճիշտ ճանապարհը, այլ ոչ թե մերժել այդ գաղափարը միայն այն պատճառով, որ դա իրենցը չէ, այսպես ասենք, որ այն ծնվել է մեկ այլ պաշտպանության նախարարի պաշտոնավարման ժամանակահատվածում։ Սա ինձ համար անհասկանալի մերժողական բան է, երբ ճիշտ մոտեցումը, գաղափարը կարող է մերժվել միայն այն պատճառով, որ այն քո փայլուն գլխից դուրս չի եկել, սա ուղղակի ճիշտ չէ»,-ասել է ՀՀ երկորրդ նախագահը՝ ավելացնելով, որ ճիշտ էր գնալ այդ համապարփակ լուծմանը, քանի որ տարածաշրջանում Հայաստանի ուժն ու կշիռը կկրկնապատկվի, եթե կարողանան նման պետություն կառուցել։
Ռոբերտ Քոչարյանի խոսքով, այսօր ժողովրդի շրջանում պետական ինստիտուտներից ամենաբարձր վարկանիշն ու վստահությունն ունի բանակը։
«Սա արդեն բավական լավ արդյունք է։ Միշտ է այդպես եղել։ Դա պայմանավորված է մի քանի հանգամանքներով։ Իրական վտանգը միշտ բերում է նրան, որ բոլորը նույնիսկ բնազդով հասկանում են, որ բանակից է կախված իրենց ու երկրի անվտանգությունը։ Ինչքան պետականության նկատմամբ հարգանքը մեծ լինի, այնքան զինվորական զգեստ հագած մարդու նկատմամբ վստահությունն է աճելու, քանի որ այդ պետության, պետականության պաշտպանողն առաջին հերթին բանակն է»,-նշել է նա։
ՀՀ երկրորդ նախագահի կարծիքով, պետությունը որոշ քայլեր պետք է անի խրախուսելու համար բանակում ծառայելը, օրինակ մարդիկ պետք է հասկանան, որ պետական համակարգում չեն կարող աշխատանք գտնել, եթե բանակում չեն ծառայել։
«Բանակում ծառայելը պետք է արտոնություններ տա բուհական համակարգում սովորելու համար։ Այսինքն, մի շարք արտոնություններ պետք է լինեն, որոնք կխրախուսեն բանակում ծառայելու ցանկությունը։ Բացի դրանից, պետությունը պետք է ցույց տա, որ այդ հարցն իր համար այնքան կարևոր է, որ բանակում չծառայած մարդուն արգելվում է պետական պաշտոն զբաղեցնել։ Եթե դա մեզ համար գերակա խնդիր է, ապա նման քայլեր են պետք, ու շատ սահմանափակումներ այն մարդկանց համար, ովքեր խուսափել են ծառայել։ Մեզ մոտ ցավոք, դա չկա։ Մի ժամանակ փաստացի անում էինք, օրենքներով ամրագրված չէր, բայց փաստացի այդպես էր։ Հիմա լրիվ այլ պատկեր ունենք, նույնիսկ տպավորությունն այնպիսին է, որ բանակում ծառայելը խանգարում է պետական համակարգում կարիերայի աճ ապահովելուն»,-նշել է Ռոբերտ Քոչարյանը։
Երիտասարդների հետ հարց ու պատասխաններն ամբողջությամբ տեսանյութում։
Հարակից հրապարակումներ`
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
