Ձեր վստահելի աղբյուրը

«Առաջիկայում այս դինամիկան խախտելու մեր ամենամեծ ռիսկը հանրակրթական դպրոցների բացումն է»,- կառավարության նիստում հայտարարեց վարչապետ Նիկոլ Փաշինյանը՝ արձանագրելով, որ վերջին 20 օրում ամենօրյա ռեժիմով արձանագրվում է 200-ից պակաս նոր դեպքեր:

Ըստ վարչապետի, բարելավման մյուս ցուցանիշը ակտիվ դեպքերի թվի էականորեն նվազելն է, որը ցածր է 3000-ից:

Նիկոլ Փաշինյանը հայտարարեց, որ ամենօրյա թեստերի թիվն աննախադեպ բարձր է և հայտնաբերման դրական տոկոսը ցածր՝  5-ից 8 տոկոս, որը համարվում է հայտնաբերման բարձր ցուցանիշ:

Վարչապետը նկատեց, որ դպրոցների բացման կապակցությամբ  կայացվել են որոշումներ, որոնք հանրությունը հասկանալիորեն միանշանակ չի ընդունել:

Դրանք, ըստ նրա, վերաբերում են դպրոցում երեխաների դիմակներ կրելուն: Վարչապետը շեշտեց, որ  կան մեկնաբանություններ, որոնք զարմացնում են իրեն: 

«Այն որոշումները, որոնք կայացնում ենք, վերաբերում են ոչ միայն ուրիշների, այլ մեր երեխաներին նույնպես:  Մեր երեխաները ոչ դպրոցներում, ոչ մանկապարտեզներում և որևէ այլ տեղ արտոնյալ չեն»,- հայտարարեց վարչապետը:

Նա հավաստիացրեց, որ  մոնիթորինգ կանեն և անհրաժեշտ որոշումները կկայացնեն, որ երեխաները լիարժեքորեն շնչեն: