Ձեր վստահելի աղբյուրը

«Զգացի էներգիա, տրամադրություն, տեսա շատ հմայիչ ու հետաքրքրիր դեմքեր»,- խարույկի շուրջ  «Հաղթանակած 2020» երիտասարդական հավաքի մասնակիցների հետ հանդիպմանն ասել է Արցախի հերոս, Հայաստանի երկրորդ նախագահ Ռոբերտ Քոչարյանը։

Նա խոստովանել է՝ պաշտոնավարման տարիներին հաճախ էր հանդիպում ուսանողների, երիտասարդների հետ, դրանք իր համար եղել են ամենից հետաքրքիր հանդիպումները։

«Բավական ժամանակ է անցել, գիտնականներն ասում են՝ երիտասարդները էականորեն փոխվել են, տեխնոլոգիաները շատ են փոխել նրանց։ Գիտնականները հետաքրքիր բաներ են ասում, օրինակ, մի բանի վրա կենտրոնանալու դժվարություններ ունի, ունի կլիպային մտածողություն։ Ես կարող եմ մի համեմատություն անել, դպրոցում մեզ լավաշներով անգիր էին տալիս, քանի որ այն ժամանակ գիտելիքը որոշվում էր, թե ինչ ծավալի ինֆորմացիա ես կարողանում քո մեջ պահել։ Այսօր բոլորը սմարթֆոներ ունեն, և այդ ինֆորմացիան ուղեղում պահելու կարիքը չկա։ Ձեր սերունդը շատ լավ գիտի, թե որտեղ կարող է գտնել ինֆորմացիան ու վայրկյանների ընթացքում տիրապետում է ինֆորմացիային»,- նշել է ՀՀ երկորրդ նախագահը։

Նա նկատել է, որ դա իր հերթին էապես փոխում է երիտասարդների մտածելակերպը։

«Սա պետք է ազդի ուսումնական ծրագրերի վրա, ցավոք, մեզ մոտ դեռ արտացոլում չի գտել։ Մի հետաքրքրիր բան էլ են ասում գիտնականները, դա դուք կարող եք հաստատել կամ չհաստատել։ Սոցցանցերում հարուրավոր ընկերներ ունենալով՝ էապես փոխվում է պատկերացումը ընկերության մասին այս ու ավելի ավագ սերնդի մոտ։ Եթե մեկը որևէ բան այնպես չի արել, ապա ֆրենդներից ջնջում ես, ու վերջացավ։ Մեր սերունդն այլ կերպ էր պատկեացնում, չես կարող քո ֆրենդներից ջնջել մարդուն, որի հետ երկար ճանապարհ ես անցել, քանի որ անձնական շփումն էլ ամրապնդում է ընկերությունը»,- ասել է Ռոբերտ Քոչարյանը՝ նկատելով, որ ընկերություն բառը որոշակի տրանսֆորմացիայի է ենթարկվել։

Երիտասարդներից մեկի հարցին, թե Ռոբերտ Քոչարյանի նախագահության ընթացքում ո՞րն է եղել ձեռնարկված ամենակարևոր քայլը երկրի համար,  ՀՀ երկրորդ նախագահը պատասխանել է.

«Երևի ամենից  կարևորն այն ժամանակ ես համարեցի տնտեսական քաղաքականությունը։ Մենք ունեցել ենք մի երկիր՝ ընդամնեը 300 մլն բյուջեով, ՀՆԱ-ն եղել է 1 մլրդ 800 մլն։ Մեկ շնչին ընկնում էր մոտավորապես 560 դոլարի չափ։ Նման աղքատության պայմաններում խոսել բարձր բաների՝ ժողովրդավարության, ազատությունների մասին... Խնդիրը առաջին հերթին եղել է կերակրել ժողովրդին, կենսամակարդակը հասցնել մի աստիճանի, որից հետո ընկալելի կլինեն այլ քայլեր»։

Հավաքին մասնակից մի երիտասարդ աղջիկ էլ հետաքրքրվեց, ինչպե՞ս է գնահատում երկրի նախկին ղեկավարը, երբ իրենց զրկում են եկեղեցու պատմությանը դպրոցում ծանոթանալու իրավունքից։

«Մենք այնպիսի տարածաշրջանում ենք ապրում, մեծ ազգ չենք քանակով, մեծ ենք մշակույթով, հավատով, այդ պատճառով համոզված եմ, որ մեր մեջ պետք է լինի ազգայնական հզոր կոմպոնենտ, դա պետք է լինի նաև գոյատևման համար։ Հատկապես դա պետք է, երբ շրջապատված ես Թուրքիայի ու Ադրբեջանի նման երկրներով, որոնց հետո ունես դժվար պատմություն ու փաստացի պատերազմի մեջ ես։ Մենք ազգային կոմպոնենտը կորցնելու իրավունք չունենք, իսկ եկեղեցին մեր ինքնության զգալի մասն է, տվյալ դեպքում չեմ համարում, որ դա ճիշտ քայլ է»,- ասել է Ռոբերտ Քոչարյանը։

Ներկաներից մեկի հարցին ի պատասխան ՀՀ երկրորդ նախագահն անընդունելի է համարել, երբ պաշտոնյաները հաղորդագրությունները տարածում են իրենց անձնական ֆեյսբուքյան էջերով.

«Դա նշանակում է, որ այդ մարդիկ ուղղակի չեն հասկանում, թե ինչ է պետությունը և ինչ է նշանակում պետական որոշումը, չի կարելի դրանք խառնել։ Պաշտոնական հաղորդագրությունը նշանակում է պետական քաղաքականության իրականացում այս կամ այն ոլորտում։ Կրկնում եմ, դա նշանակում է, որ մարդիկ ուղղակի չեն հասկանում, թե ինչ է նշանակում պետական կառավարումը»։

Ինչպե՞ս է տեսնում Ռոբերտ Քոչարյանը հայ-ադրբեջանական կոնֆլիկտի կարգավորումը, հարցին էլ ի պատասխան, Արցախի առաջին, Հայաստանի երկրորդ նախագահը պատասխանել է.

«Անկեղծ ասած, մոտակա ժամանակներում լուծման որևէ տարբերակ չեմ տեսնում։ Վերջերս հարցազրույցում ստիպված էի դրա մասին ասել, որովհետև Ադրբեջանը վերջին երեսուն տարվա իրողությունը ժխտում է։ Մենք չենք կարող կայացած փաստերը հաշվի չառնել։ Ստիպված եմ կրկնել, որ Ղարաբաղի ստեղծման իրավական հիմքերն անխոցելի են, Ղարաբաղի անկախության փաստն առկա է։ Հետ պտտել անիվն ու գնալ անցյալ չի կարելի, Ղարաբաղում արդեն երկու սերունդ է մեծացել այն համոզմունքով, որ իրենք նոր պետություն են կառուցել ու նրանք այդ երկրի քաղաքացիներ են։ Քանի դեռ Ադրբեջանը այս պարզ ճշմարտությունը չհասկանա, առաջ գնալու տարբերակ չի լինի։ Մենք պետք է համարենք, որ սա երկարատև գործընթաց է, և մեր կյանքը պետք է կազմակերպենք՝ այս իրողությունից ելնելով։ Եթե ստացվի ավելի շուտ լուծում գտնել, շատ բարի, շատ լավ, բոլորս կուրախանանք, բայց մեր մեկնարկային մոտեցումը պետք է հենց սա լինի»։

Ռոբերտ Քոչարյանն ընդգծել է, որ Ադրբեջանը պետք է հասկանա՝ խնդրին ռազմական լուծում չի լինելու, իսկ դրա համար պետք է ունենանք հզոր բանակ, տնտեսությունը պետք է դինամիկ զարգանա, ազգային կոմպոնենտը մեր ինքնության մեջ պետք է հզոր լինի։

«Եթե այս գործոնները լինեն, մենք որևէ խնդիր չենք ունենա»,- ասել է նա։

Երիտասարդների հետ զրույցն ամբողջությամբ՝ տեսանյութում։