Արդարադատության նախարարի որոշումը կվիճարկենք դատարանում. Ամատունի Վիրաբյանի փաստաբան
«Ես անհիմն եմ համարում ինձ պաշտոնից ազատելը»,- այսօր լրագրողների հետ զրույցում ասաց Ազգային արխիվի նախկին տնօրեն Ամատունի Վիրաբյանն՝ անդրադառնալով Արդարադատության նախարարի՝ իրեն պաշտոնից ազատելու մասին որոշմանը։
Արդարադատության նախարարությունը Ամատունի Վիրաբյանին պաշտոնից ազատելը հիմնավորում է հանգամանքով, թե Ազգային արխիվը շահութահարկ չի վճարել։
Նա հիշեցրեց, որ արդեն 19 տարի ղեկավարել է Ազգային արխիվը, բայց երբեք չի մտածել, որ այդ պաշտոնին հավերժ ինքն է մնալու։
Բանախոսը նշեց, որ ինքը երկու օր էր ընտրել՝ պաշտոնից հեռանալու համար, դա կա՛մ 2020 թվականի նոյեմբերի 27-ն էր, երբ իր պայմանագրի ժամկետը լրանում է, կա՛մ էլ 2021 թվականի օգոստոսի 17-ը, երբ կլրանար իր 65 ամյակը։
Անդրադառնալով արդարադատության նախարարության հիմնավորմանը՝ Ամատունի Վիրաբյանն ասաց, որ, ըստ որոշման՝ պետական կազմակերպության կողմից վճարման ենթակա հարկերը կամ այլ վճարները իր մեղքով սահմանված ժամկետում չի վճարվել։
«Եթե այս տրամաբանությանը հետևենք, մինչև 2019 թվականն աշխատած բոլոր ՊՈԱԿ-ների տնօրենները պետք է հեռացվեն։ Օրենքը սահմանել է, որ ՊՈԱԿ-ները պետք է ԱԱՀ վճարեն, սակայն բյուջեով այդ գումարը չի նախատեսվել։ Բոլոր ՊՈԱԿ-ներում, որտեղ ՊԵԿ-ը ստուգումներ անցկացնի, նույն խնդիրն առաջանալու է։ Եթե այս տրամաբանությամբ առաջնորդվենք, պետք է բոլոր ՊՈԱԿ-ների տնօրեններն աշխատանքից ազատվեն։ Որևէ մեկը չի ազատվել, այս կետի համաձայն ազատվել եմ միայն ես»,- շեշտեց նա։
Արխիվի գլխավոր հաշվապահ Վահագն Աբիսողոմյանն էլ վստահեցրեց՝ իրենց ներկայացրած ստուգման ակտը որևէ մեկը չի կարդացել։ Նա պաշտոնապես հայտարարեց, որ ստուգված 3 տարի 7 ամսվա ընթացքում իրենց խախտումը հաշվաահության մեջ կազմել է 186 հազար դրամ։
«Նախարարի հրամանի հիմքում դրված է վերահսկողության պետ Դավիթ Գասպարյանի զեկուցագիրը, որտեղ նշված է, թե ստուգմամբ արձանագրվել է 742 մլն դրամ հարկային պարտավորություն։ Այս պարտավորությունն ամբողջությամբ պետության կողմից վճարվել և մարվել է։ Այս գումարից 721 մլն դրամը վերաբերում է ԱԱՀ-ին։
Նախարարի մամուլի խոսնակը հայտարարել է, թե ԱԱՀ գծով իրենք խնդիր չեն տեսնում, քանի որ բոլոր ՊՈԱԿ-ներն են այս խնդիրն ունեցել։ Սակայն 21 մլն 396 հազար դրամի շահութահարկի պարտավորություն կա ակտում, որն, ըստ իրենց տրամաբանության, առաջացել է պաշտոնատար անձի, այս դեպքում՝ իմ կամ Վիրաբյանի մեղքով», - ասաց նա։
Ամատունի Վիրաբյանի փաստաբան Տիգրան Գրիգորյանն էլ շեշտեց, որ իր մոտ տպավորություն է, թե արարադատության նախարարը կամ ամբողջական չի ուսումնասիրել նյութերը, կամ իրեն սխալ են զեկուցել։
Նա նշեց, որ նախկինում արխիվը գտնվում էր տարածքային կառավարման և զարգացման նախարարության հաշվեկշռում, այժմ՝ արդարադատության. «Ստացվում է, որ այն ժամանակ պաշտոնատար անձը, որն իրավասու էր դադարեցնելու պարոն Վիրաբյանի լիազորությունները, չի կայացրել նման որոշում, գտնելով, որ խախտում չկա։ Ստացվում է, որ արդարադատության ներկայիս նախարարը, չունենալով լիազորություն նախկին գործողությունների համար, կայացնում է ոչ իրավաչափ հրաման»։
Փաստաբանը տեղեկացրեց նաև, որ որոշումը վիճարկելու են դատական կարգով։ «Անհասկանալի է, սա անձի դեմ էր ուղղված, թե ուղղակի այդպիսի իրավական որոշում կար։ Սա ավելի նման է անձին ուղղված որոշումներին, քանի որ նույն իրավիճակն այլ ՊՈԱԿ-ներում է, և որևէ մեկին աշխատանքից չեն ազատել», - եզրափակեց խոսքը փաստաբանը։
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
