Ձեր վստահելի աղբյուրը

«Հայկական բնապահպանական ճակատ» նախաձեռնության հիմնադիր Լևոն Գալստյանն ահազանգում է՝ Ամուլսարի խնդրով հարուցված քրեական գործի մասնագիտական նյութերը ՀՀ քննչական կոմիտեն հրաժարվում է տրամադրել շահագրգիռ հանրությանը։

Նա ընդգծում է, որ այդ նյութերը դեռ 2019թ-ի մայիսից ոչ միայն հասանելի են եղել հանքահանությամբ զբաղվելու ցանկություն ունեցող ընկերությանը, այլ նաև դրանց մասին իրենք ներկայացրել են կարծիքներ, առարկություններ ու տեղի ունեցել մի շարք քննարկումներ։

«Անհասկանալի են այս երկակի մոտեցումն ու ընդհանրապես հանքահենների հետ անկախ միջազգային փորձագիտական խմբի հետազոտությունների քննարկումը։ Եթե այդ նյութերը հասանելի են եղել մի շահագրգիռ կողմին՝ ուրեմն պետք է հասանելի լինիեն նաև մյուսներին։ ակառակ դեպքում առաջ են գալիս մի շարք լուրջ և հիմնավոր կասկածներ։

Մեր հարցումն ու պահանջած փաստաթղթերը սրանք էին.

«Ամուլսարի խնդրով ՀՀ քննչական կոմիտեի պատվիրած ուսումնասիրությունների վերջնական փաստաթղթից բացի, լիբանանյան «ԷԼԱՐԴ» և ամերիկյան «ԹիԱրՍի» ընկերությունների կողմից կազմվել են նաև նախնական զեկույցներ։ Հաշվի առնելով հարցի հանրային նշանակությունը և այս ողջ գործընթացի թափանցիկության անհրաժեշտությունը՝ քննչական կոմիտեն առնվազն պետք է հրապարակի նաև հետևյալ բոլոր փաստաթղթերը․

1․ 2019թ-ի մայիսի 31-ին ներկայացրած Անկախ գնահատման մասնակի նախնական զեկույցը։

2․ 2019թ-ի հունիսի 14-ին ներկայացրած Անկախ գնահատման նախնական զեկույցը։

3․ 2019թ-ի հունիսի 14-ին ներկայացրած Անկախ գնահատման նախնական զեկույցի վերաբերյալ Լիդիանի ներկայացրած մեկնաբանությունները, որոնք ստացել են հունիսի 28-ին և հուլիսի 4-ին։

4․ 2019թ-ի հուլիսի 3-ին ստացված Լիդիանի պատասխանները «ԷԼԱՐԴ» և «ԹիԱրՍի» թիմի 2019թ-ի հունիսի 28-ին առաջադրված հարցերին՝ երկրաքիմիական տվյալների և մեղմման միջոցառումների վերաբերյալ։

Խնդրում ենք տրամադրել մեզ կամ հրապարակել վերոնշյալ բոլոր փաստաթղթերը»,-գրել է Լ. Գալստյանը ֆեյսբուքյան իր էջում։