Ձեր վստահելի աղբյուրը

Կառավարության շենքի դիմաց «Ոչ վարկային թալանին» կարգախոսով բողոքի ակցիա իրականացնող քաղաքացիները նստել են  պետական կառույցի դիմաց ու սպասում են վարչապետ Նիկոլ Փաշինյան հետ հանդիպմանը: Նրանք  ավելի վաղ  հայտարարել էին, որ չեն հեռանա կառավարության մոտից, մինչև  չհանդիպեն վարչապետին:

Ակցիայի մասնակիցները հայտարարեցին, որ եթե  մինչև ժամը 18:00 –ն՝ աշխատանքային օրվա ավարտը, իրենց հետ չհանդիպեն, գնալու են Ն.Փաշինյանի տուն՝  փորձելով այնտեղից նրան դուրս բերել ու ստանալ իրենց հարցի լուծումը:

«Եթե Փաշինյանը չի գալիս, մենք կգնանք իր մոտ: Նիկոլ Փաշինյան, գալիս ենք քեզ հյուր, չես կարող փախնել, գալու ենք ձեր տուն, մտնելու ենք մեր տունը, որը տվել ենք ձեզ, ապրում եք մեր հաշվին, մեր փողերի հաշվին: Մենք ձեզ այդպիսի դաչա ենք նվեր տվել, կառավարական մեքենա ենք նվեր տվել,  այդ ամենը մենք ենք ձեզ նվեր տվել: Մտածում եք՝ կարող եք այդ ամենը վերցնել ու մեզ չլսե՞լ, չի ստացվելու»,- հայտարարեցին ակցիայի մասնակիցները:

Նշեցին, որ իրենց մարզերից մարդիկ են միանալու:

Ակցիայի նախաձեռնողներից Մանվել Մանուկյանն ասաց, որ ինքն անձամբ մասնակցել է հեղափոխությանը:

«Ընդդիմադիրները գալիս են այստեղ, իշխանավորներից ոչ մեկին չենք հանդիպել: Չեն համարձակվում գալ ու խոսել, գիտեն, որ մեր աչքերին չեն կարող նայել»,- նշեց նա: