Ձեր վստահելի աղբյուրը

«Նախատեսում ենք որոշակի հողային տարածքների համար պահպանել մինչև 2021 թվականը եղած շուկայական արժեքները»,- ԱԺ տնտեսական հարցերի մշտական հանձնաժողովի նիստում ասաց Կադաստրի կոմիտեի նախագահի տեղակալ Արման Պողոսյանը՝ ներկայացնելով «Անշարժ գույքի հարկով հարկման նպատակով անշարժ գույքի շուկայական արժեքին մոտարկված կադաստրային գնահատման կարգը սահմանելու մասին» օրենքում լրացում կատարելու մասին օրենքի նախագիծը։

Նրա խոսքով, վերոնշյալ առաջարկը վերաբերում է այն հողերին, որոնք օրենքի ուժով սեփականության իրավունքով անհատույց փոխանցվել են ֆիզիկական և իրավաբանական անձանց. այդ հողամասերի օտարման համար պետք է կադաստրային վճար մուծվի։

Նշենք, որ ընդհանուր առմամբ, 8000 հա հողատարածքի մասին է խոսքը։

«Մինչ այս այդ հողերի համար վճարվել են 2003 թվականից սահմանված արժեքները, և փոփոխությամբ առաջարկվում է այդ արժեքները պահպանել 2021 թվականի հունվարի 1-ից ևս: Հիշեցնեմ, որ 2021 թվականից կադաստրային արժեքները բարձրանում են»,- ներկայացրեց Արման Պողոսյանը։

ԱԺ տնտեսական հարցերի մշտական հանձնաժողովի նախագահ Բաբկեն Թունյանը տեղեկացրեց, որ ամենամեծ հողատարածքի սեփականատերը 360 հա հողատարածք ունի, որի կադաստրային արժեքը 6.9 մլրդ դրամ է։ Երկրորդ տեղում մի ընկերություն է՝ 116 հեկտար հողատարածքով, որի արժեքը 5.2 մլրդ դրամ է։ Երևանում կա 104 հա հողատարածք՝ 4.7 մլրդ դրամ կադաստրային արժեքով։

«Ցանկում նայում եմ, կան հայտնի ընկերություններ, որոնք գումար տալու խնդիր չունեն, կան ընկերություններ, որոնք գրավադրված են, բայց ինձ մոտ տպավորություն է, որ իրենք այդ հողատարածքը ժամանակին վերցրել են, գրավադրել են բանկում, շուկայական արժեքին համապատասխան գրավ են ստացել, դա օգտագործել են իրենց բիզնեսի մեջ։ Հիմա մենք, իրենց այս հնարավորությունը տալով, պիտի հասկանանք՝ ինչ խնդիր ենք լուծում։  Այստեղ կան առանձին մարդիկ, որոնց արտոնություն տալուց առաջ պետք է հասկանանք՝ արժի՞ թե ոչ։ Ընկերություն կա, որ հիմա պետք է վճարի 5.2 մլրդ դրամ, նոր օրենքով այդ գումարը 15-20 մլրդ դրամ է կազմելու»,- ներկայացրեց պատգամավորը։

Նրա խոսքով, կան հողատարածքներ, որոնք ձեռք են բերվել, սակայն պարզ չէ՝ ինչ նպատակով, իսկ գույքահարկի շեմի բարձրացումից հետո այդ հողատարածքների տերերը ստիպված են լինելու կամ օգտագործել դրանք, կամ՝ վաճառել.

«Հիմա նշված հողատարածքների կադաստրային արժեքը 200 մլրդ դրամ է, բայց 2021-ին մոտավորապես 600-800 մլրդ դրամ է դառնալու, այսինքն՝ պետությունը մոտ 600 մլրդ դրամ զիջման է գնալու։ Մենք պետք է հասկանանք՝ դրա դիմաց ինչ է արվելու։ Մենք պետք է մեզ հետաքրքրող կազմակերպությունների ցանկը տանք Կառավարությանը, որպեսզի հստակ ինֆորմացիա ստանանք»։

Բաբկեն Թունյանը, որպես օրինակ, ներկայացրեց «Գազպրոմ Արմենիա» ընկերությունը, որը 400 մլն դրամից ավելի կադաստրային արժեքով հողի համար չի վճարել։ Նա նշեց, որ էլի ընկերություններ կան, որոնք վճարունակ են, բայց հողի կադաստրային արժեքները չեն ներկայացրել, և պետք է հստակ հասկանալ՝ ինչո՞ւ։

«Բոլորին մեկ աչքով նայելը սխալ է»,- շեշտեց պատգամավորը։

ԱԺ «Լուսավոր Հայաստան» խմբակցության պատգամավոր Արկադի Խաչատրյանն էլ հետաքրքրվեց, թե արդյոք նախագծի իմաստն այն է, որ նախկինում օտարված հողատարածքների համար պետք է կադաստրային արժեքը վճարվի։

Պատասխանելով պատգամավորի հարցին՝ Արման Պողոսյանն ասաց, որ նախագիծը վերաբերում է դեպքերին, երբ շենք-շինությունները պատկանել են սեփականության իրավունքով, իսկ հողամասերը՝ վարձակալության։

«Հողամասերը եղել են վարձակալությամբ վերցված, իսկ շենքերը՝ սեփականացված։  «Հողային օրենսգրքի» 2005 թվականի փոփոխությունից հետո ասվել է՝ այն հողամասերը, որոնք կարող են օտարվել և սեփականացվել քաղաքացիների կողմից, օրենքի ուժով, անհատույց տրամադրվում են այդ շենք-շինությունների սեփականատերերին։ Բայց պայման է դրվել, որ եթե շինության սեփականատերը ինչ-որ պահի որոշի օտարել հողատարածքը, պետք է վճարի դրա կադաստրային արժեքը՝ այդ պահին գործող գներով»,- տեղեկացրեց կադաստրի կոմիտեի նախագահի տեղակալը։