Ձեր վստահելի աղբյուրը

«Որոշ պարզունակ մտածողների թվում է, թե ԿԳՄՍ գործող նախարարի հրաժարականով այդ խնդիրը կլուծվի, սակայն այն շատ ավելի տարողունակ է»,-գրում է  «Ազգային օրակարգ» կուսակցության համահիմնադիր Ավետիք Չալաբյանը՝ անդրադառնալով նախօրեին ԱՕԿ խորհրդի նախաձեռնությամբ  կազմակերպված  հանրակրթական չափորոշիչների և առարկայական ծրագրերի վերաբերյալ կոնֆերանս-քննարկմանը։

Չալաբյանն ընդգծում է, որ այս խնդիրը հսկայական հանրային արձագանք է ստացել վերջին շրջանում, և բացահայտել թե մեր կրթական համակարգի բացերը, և թե մեր պետության խոցելի կողմերը, երբ դրսից գործող պատվիրատուները հնարավորություն են ձեռք բերել իրենց ճաշակով մեզ կրթական բովանդակություն և նպատակներ պարտադրել։

«Որոշ պարզունակ մտածողների թվում է, թե ԿԳՄՍ գործող նախարարի հրաժարականով այդ խնդիրը կլուծվի, սակայն այն շատ ավելի տարողունակ է, և ի վերջո հանգում է մեր, որպես առանձին ազգային-քաղաքակրթական միավորի, կարողությանը՝ կայացնել և շարունակաբար զարգացնել ինքնաբավ և դինամիկ կրթական համակարգ, որն ընդունակ է մրցակցել աշխարհի այլ զարգացած կրթական համակարգերի հետ, միաժամանակ համագործակցել և փորձի արդյունավետ փոխանաակում իրականացնել նրանց հետ՝ պահպանելով սեփական ազգային-մշակույթային հենքը։

Այս և բազմաթիվ այլ հարցերին էր նվիրված երեկ տեղի ունեցած քննարկումը, որին մասնակցեցին ոլորտի մի շարք հեղինակավոր մասնագետներ, հասարակական գործիչներ և լրագրողներ։ Մենք նախատեսում ենք այս խնդիրները պահել մեր ուշադրության կենտրոնում, և հետևողականորեն նպաստել մեր ազգային կրթական համակարգի արդիականացմանը և ամրապնդմանը։ Մինչ այդ, ես ցանկանում եմ իմ խորին շնորհակալությունը հայտնել երեկվա կոնֆերանսի բոլոր մասնակիցներին՝ նրանց վաստակի, սկզբունքային քաղաքացիական դիրքորոշման և այս կարևորագույն ոլորտում նախանձախնդիր գործունեության համար»,-գրել է նա։