Ձեր վստահելի աղբյուրը

Բարձր միավորներ ստացած, բայց բուհեր չընդունված դիմորդների ներկայացուցիչը երկու հայցով դիմել է վարչական դատարան։ Ասուլիսում ասաց  բուհ չընդունված դիմորդների ներկայացուցիչ Ալեքսանդր Կոչուբաևը։ Նա նշեց, որ վարույթ է ընդունվել հայցերից մեկը,  որը վերաբերում է՝ անվավեր ճանաչել կառավարության որոշումը, որով սահմանվել է  ընդունելության նոր կարգ, այնտեղ կային անգրագտության հետ հատվող խնդիրներ։

«Մյուս հայցի դեպքում, չեմ կարող ասել, ճնշման  ազդեցություն է, թե իրականում դատավորի ներքին դիրքորոշում է, սակայն որոշակի խոչընդոտների ենք հանդիպում»,- ասաց փաստաբանը։

Այս հայցով պահանջվում է կառավարության որոշման կիրառումն անվավեր ճանաչել։

«Դատարանը հայցատեսակի հետ կապված խնդիրներ է տեսել, չնայած փաստաբանական թիմը չէր տեսել։ Սակայն վերաքննիչ դատարան չգնացինք՝ խնայելով դիմորդների ժանանակը։ Փոփոխեցինք հայցապահանջը, իսկ  դատարանը նոր պահանջ դրեց, որը ծայրահեղ  ոչ իրավաչափ է, ավելին՝ մեզ հիմք է տալիս եզրահանգելու, որ դատարանը գործում է  ճնշման տակ։ Դատարանը հայցը վարույթ չի ընդունում այն պատճառաբանությամբ, որ անհրաժեշտ է  դատարանին ներկայացնել ԿԳՄՍ նախարարին ուղղված «Պահանջատեր դիմորդների» հենց դիմումը, որը չունենք, քանի որ դիմորդներն ինքնաբուխ հավաքվել էին նախարարության դիմաց, ամեն մեկը ստորագրել ու ներկայացվել է։ Դատարանը կարող է պահանջել նախարարությունից, ոչ թե այս կարևոր փուլում ծանրաբեռնի դիմորդներին, հայցվորներին»,- ասաց Ալեքսանդր Կոչուբաևը։

Նա նշեց, որ եթե այս անգամ դատարանը որոշի ևս մեկ անգամ վարութ չընդունի, կդիմեն վերաքննիչ դատարան։

«Սա խոսում է  այն մասին, որ իշխանությունը զգայուն  գործերով  տրվում է գայթակղության և ճնշում է  դատարաններին։ Վառ ապացույցը հենց այդ գործն է, որը իշխանության համար չափազանց զգայուն է, այստեղ ի հայտ է գալու կառավարության թույլ տված անգրագիտությունը։ Կառավարությունը քողարկելու համար սեփական անգրագիտությունը սկսում է  ճնշել դատավորներին: Գործադիրը շարունակում է  թաթը պահել դատական իշխանության վրա, զգայուն գործերով ճնշել դատավորներին»,- ասաց նա։

Փաստաբանի խոսքով, իշխանությունը հետևողականորեն երիտասարդների ձայնը «ժխտում է, մերժում է ու փորձում է խեղդել»։ Ըստ նրա, կառավարությունը ժողովրդի հետ շփվելու խնդիր ունի, իսկ 18-20 տարեկան երեիտասարդներին կառավարությունը չի կարող երկար անտեսել, հստակ հասարակական-քաղաքական հետևանքներ կունենա։

«Պահանջատեր դիմորդ» նախաձեռնության անդամ, դիմորդ Հայկ Բաբալյանի խոսքով, ԿԳՄՍ նախարարությունն իր աշխատակամզի հետ միասին որդեգրել է քաղաքականություն, հիմնական դրույթն է  արհամարհանք, հենց պահանջատեր դիմորդների մասով է այդ վերաբերմունքը։

««Պահանջատեր դիմորդ» շարժումը ինչպես սկսել է իր աշխատանքները, նույնկերպ շարունակելու է։ Բուհերում գնում է համախմբվածության պրոցես, որից հետո անելու ենք մեր քայլերը։ Ամեն ինչ լինելու է հանրային»,- ասաց նա։

Հայկ Բաբալյանի խոսքով, այսօրվա իշխանության հռչակած արժեքներից է ժողովրդավարությունը, սակայն ԿԳՄՍ նախարար Արայիկ Հարությունյանի քայլերը ցույց են տալիս, որ նա այդ արժեքների կրողը չէ։

«Ամեն ինչ անելու ենք, որ Արայիկ Հարությունյանը հեռանա այդ  պաշտոնից»,- ասաց նա։ 

Հայկ Բաբալյանի կարծիքով, նախարարը իշխանության վստահությունը կրում է, քանի որ այդ իշխանության մասն է, սակայն հասարակության տարբեր շերտեր պահանջում են այդ մարդու  հրաժարականը և այդ ալիքը մի օր հասնելու է գագաթնակետին, այլ ելք չի մնալու, քան հրաժարականը։

Նա ասաց, որ նախարարի հետ հանդիպում վաղուց  չեն պահանջում։

«Ինչ հանդիպում պահանջեց մարդու հետ, որն իր սխալը չի ընդունում»,- ասաց Հայկ Բաբալյանը։

Դիմորդը նշեց, որ պահանջել են հանդիպում Նիկոլ Փաշինյանի հետ, սակայն կրկին մերժվել է։

«Անկեղծ ասած՝ Նիկոլ Փաշինյանից ակնկալիքներ չկան»,- ասաց Հայկ Բաբալյանը։