Կոռուպցիայի կանխարգելման հանձնաժողովը բացասական խորհրդատվական կարծիք է ներկայացրել Խունդկարյանի վերաբերյալ
«Չեմ էլ կարող դրան ծանոթ լինել, որովհետև այն գաղտնի է և տրամադրվում է միայն ընտրություն կատարող անձանց։ Դրան ծանոթ եմ միայն այնքան, որքան տեսել եմ մամուլում», - ԱԺ ճեպազրոյցների սրահում հայտնեց ՍԴ դատավորի թեկնածու Երվանդ Խունդկարյանը՝ պատասխանելով հարցին, թե արդյոք տեղյակ է Կոռուպցիայի կանխարգելման հանձնաժողովի ներկայացրած խորհրդատվական կարծիքին, որը վերաբերում է իրեն։
Խունդկարյանը հայտարարեց, որ այդ ենթադրյալ կարծիքի մասին կարող է եզրակացնել միայն այն կտորից, որը տեսել է մամուլում: Իսկ այդ տեղեկատվությունը, ըստ Խունդկարյանի, այնպիսին է, որ իր մոտ խիստ կասկածներ է առաջացնում, թե արդյոք Կոռուպցիայի կանխարգելման հանձնաժողովի կողմից կարող էր նման որակի վերլուծություն լինել։
Վերջինս նշեց, որ իրեն մեղադրում են «Ա1+» հեռուստաընկերության փակման մեջ և բերեց Եվրոպական դատարանի համապատասխան վճռի մի հատվածը, ըստ որի, արդար դատավարության որևէ խախտում իր կողմից տեղի չի ունեցել:
«Ընդհակառակը՝ դատավոր Խունդկարյանը, որը այդ ժամանակ աշխատել էր տնտեսական դատարանում, ստեղծել է համապատասխան միջավար, զենքերի հավասարություն է ստեղծել կողմերի համար՝ մրցակցելու տեսանկյունից»,- մեջբերեց ՍԴ դատավորի թեկանծուն և հավելոց, որ այդ եզրակացության մեջ նաև արձանագրված է, որ կողմերի ներկայացրած բոլոր միջնորդությունները քննության են առնվել և պատասխան են տրվել:
Լրագրողներից մեկը հայտնեց, որ Կոռուպցիայի կանխարգելման հանձնաժողովի եզրակացության մեջ նշված է, որ հեռուստաընկերությանը լիցենզիայի չտրամադրելը հանդիսացել է միջամտություն հեռուստատեսության տեղեկատվության և գաղափարների տարածման ազատությանը:
Խունդկարյանը նախ փորձեց իմանալ, թե լրագրողին որտեղից է հայտնի դարձել այդ մանրամասները, ապա չստանալով պատասխանը, վերջինս հայտարարեց, որ եթե պատգամավորները այդ եզրակացությունից հետո կգտնեն, որ այն խոչընդոտում է իրեն՝ ՍԴ անդամ ընտրելուն, դա իրենց իրավունքն է ինքը որևէ կերպ չի կարող ազդել այդ ընտրության վրա:
Լրագրողները նաև նկատեցին, որ Խունդկարյանի տասնյակ որոշումներով Մարդու իրավունքների եվրոպական դատարանը որոշում է կայացրել ընդդեմ Հայաստանի:
Դատավորի թեկնածուն նկատեց, որ խոսքը գնում էր հիմնականում Թեղուտի հանքավայրի խնդրին և եթե լրագրողները վերցնեն և կարդան այդ գործերի ցանկը, ապա կտեսնեն որ դրանց մի մասին ինքն ընդհանրապես մասնակցություն չի ունեցել, իսկ մյուսների դեպքում էլ պետք է վերլուծվի, թե ո՞ր ատյանի դատարաններում են տեղի ունեցել թերացումները:
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
