Ձեր վստահելի աղբյուրը

Սահմանադրական կարգի ենթադրյալ տապալման գործով անցնող Սեյրան Օհանյանի պաշտպան Կարեն Մեժլումյանը դատական նիստին հանդես եկավ միջնորդությամբ՝ նախաքննության մարմնից պահանջել մայր գործի նյութերն ու պատճեներն ամբողջությամբ:

Նա նշեց, որ այս գործով նախաքննական մարմինը որպես մեղադրանքը հիմնավորող ապացույցներ դատարան է ուղարկել 79 հատոր գործ և 3 հատոր կազմող մեղադրական եզրակացություն այն դեպքում, երբ, իր տեղեկություններով, մայր քրեական գործն ավելի քան 500 հատոր է կազմել, որոնցում բազմաթիվ ապացույցներ, դատավարական փաստաթղթեր կան այն մասին, որ հավաքները որոշակի ժամանահատավածում եղել են ոչ խաղաղ բնույթի, զանգվածային անկարգություններ են տեղի ունեցել:

«Դատարան ուղարկած 79 հատորում, ամենայն հավանականությամբ,  այդ ապացույցները կամ մեծամասնությունը չեն ներառվել, նախաքննության մարմնի կողմից թաքցվել են այն դեպքում, երբ դրանք կարող են էական նշանակություն ունենալ գործով օբյեկտիվ իրականությունը բացահայտելու և  պարոն Օհանյանի պաշտպանությունն արդյունավետ իրականացնելու համար, քանի որ կհերքի  մեղադրանքի այն պնդումը, ըստ որի, խաղաղ հավաքները ցրելու, անզեն  ցուցարարներին փողոցներից հեռացնելու համար են զինված ուժերի, ոստիկանության ստորաբաժանումները  Երևանի կենտրոնական փողոցներում գործողություններ իրականացրել: 

Իմ գնահատմամբ, այսօրվա դրությամբ, մեր ձեռքի տակ եղած ապացույցներից ամբաստանյալներին արդարացնող ամենաարժեքավոր ապացույցներից է քննիչի 2009 թվականի մարտի 24-ի որոշումը Նիկոլ Փաշինյանին առաջադրված մեղադրանքը փոխելու և նոր մեղադրանք առաջադրելու մասին»,- ասաց պաշտպանը:

Կ. Մեժլումյանը վստահություն հայտնեց, որ ավելի քան 500 հատար կազմող մայր գործի նյութերում պաշտպանական կողմի համար բազմաթիվ, ոչ պակաս արժեքավոր ապացույցներ կան, որոնք քննիչը ևս այս 79 հատորի հետ չի ուղարկել դատարան, քանի որ արդարացնող ապացույց են:

«Առանց մայր գործի նյութերի ողջ ծավալի հնարավոր չէ արդյունավետ պաշտպանել մեր պաշտպանյալներին, իմ պաշտպանյալ Սեյրան Օհանյանին: Միջնորդում եմ նախաքննության մարմնից պահանջել  մայր գործի նյութերն ու պատճեներն ամբողջությամբ: Վստահ ենք, որ գործի նյութերում բազմաթիվ ապացույցներ կան, որոնցով իրականում հերքվում է մեղադրանքը, որոնցով կհաստատվի մեր պաշտպանյալների անմեղությունը վերագրվող արարքում»,- ասաց Կ.Մեժլումյանը:

Նմանատիպ բովանդակություն ունեցող միջնորդությամբ հանդես եկավ նաև ՀՀ երկրորդ նախագահ Ռոբերտ Քոչարյանի պաշտպաններից Հովհաննես Խուդոյանը՝ նշելով, որ միանում է գործընկերոջ միջնորդությանը, առանձին միջնորդում է նախաքննության մարմնից պահանջել մայր գործի նյութերի ամբողջ ծավալը պաշտպանական կողմին տրամադրելու նպատակով:

Նա նշեց, որ այդ ապացույցներն ուղիղ համեմատական կապի մեջ են, փոխլրացնում են իրար, անհրաժեշտ պայման է անձի իրավունքների լիարժեք իրացման:

«Պաշտպանական կողմին  չեն տրամադրվել քրեական գործով առկա բոլոր նյութերը, ինչը  բացառում է քրեադատավարական երաշխիքների լիարժեք իրացման հնարավորությունները»,- ասաց նա:

Հ.Խուդոյանը նշեց, որ հնարավոր չէ փակ աչքերով գործի միջից առանձնացնել առանձին տվյալներ, ստեղծել մեղադրանք, անտեսել մնացած գործը:

«Պաշտպանության կողմը պահանջում է տրամադրել քրեական գործի նյութերը սկսած հարուցման պահից մինչև այն պահը, երբ այդ գործից նյութերն առանձնացվել են: Նախաքննական մարմինն ուղղակիորեն նշում է, որ մեղադրանքը հիմնավորող նյութերն արդեն իսկ տրամադրված են: Ավելի քան ողջամիտ է այն պնդումը, որ չտրամադրված նյութերում  կարող են առկա լինել  պաշտպանության կողմի փաստարակները վերահաստատող կամ նոր փաստական հանգամանքներ:

Այսպիսով, քննարկվող քրեական գործի շրջանակներում միջդատական վարույթի փուլից սկսած մինչև դատական քննության փուլ անտեսվում են ինչպես Ռոբերտ Քոչարյանի պաշտպանության իրավունքը, այնպես էլ մրցակցության սկզբունքի դրույթները՝ դատավարությունը վերածելով  ինկվիզիցիոն գործընթացի, որի պայմաններում անձը հասանելիություն չունի իրեն վերաբերող քրեական գործում առկա նյութերին, անհնարին է դառնում դատավարական իրավունքների ամբողջական իրացումը»,- ասաց Հ.Խուդոյանը: 

Դատավարությանը ներկա ՀՀ երկրորդ նախագահ Ռոբերտ Քոչարյանը նշեց՝ այն խորհրդակցությունը, որն արել է փետրվարի  23-ին նախագահականում, հետևանք էր «Երկրապահ» կամավորականի գործընթացներին: 

«Բայց այն, ինչ կատարվում էր «Երկրապահ» կամավորական ընկերությունում, մեկ փաստաթուղթ չկա այս քրեական գործում: Հետևանքը, որը քննարկվում էր, դրա մասին կար, բայց ինչի համար էր այդ խորհրդակցությունը եղել, չկա: Ո՞նց հավատանք, որ այդպիսի նյութեր ընդհանրապես չեն եղել:

80 հատորի մեջ ԱԱԾ-ից, եթե չեմ սխալվում, կա 3 նամակ: Հավատո՞ւմ եք՝ կարող է այդպիս իրադարձությունների պարագայում ԱԱԾ-ում լինել զրոյական փաստաթուղթ։

Դուք փաստեր էիք ուզում, ես դրանք ձեզ եմ ներկայացնում, դրանք շատ են: Կարող եմ ևս շարունակել: Երբ որ նույն իրադարձության ժամանակը մեկը հարցաքննվում է, հետը եղած մյուս մարդը, գիտենք հարցաքննվել է, բայց տվյալ գործում այդ հարցաքննությունը չկա»,- ասաց Ռ.Քոչարյանը:

Նա ընդգծեց, որ ներկայացված միջնորդությունն ավելի քան հիմնավոր է: 

«Ծաղկաքաղ են արել, իրենց ուզած ձևով ներկայացրել են: Ծաղկաքաղի արդյունքում ձևավորված քրեական գործ է»,- ասաց ՀՀ երկրորդ նախագահը: