Ձեր վստահելի աղբյուրը

ՌԴ մեկնել ցանկացող քաղաքացիները բողոքի ակցիա են անում Ազգային ժողովի դիմաց: Նրանց  պահանջն է  բացել ճանապարհը, մարդիկ կարողանան հասնել իրենց ընտանիքներին, գործին, բիզնեսին:

Նրանք արդեն  բողոքի ակցիաներ իրականացրել են կառավարության, ԱԳ նախարարության, ՀՀ-ում ՌԴ դեսպանության մոտ նույն պահանջով: Նշում են, որ որևէ մարմին իրենց հարցին լուծում չի տալիս: Նշում են, որ իրենց համար տարբերություն չկա՝ օդային, թե ցամաքային ճանապարհով կհասնան ՌԴ, կարևորը՝ հասնեն:

«Մտածում ենք՝  մեր ղեկավարությունը գուցե կմոտենան մեզ մարդկային ձևով, բանակցություններ կանի, կհասնենք մեր ընտանիքներին: Մարդիկ ամեն մեկը մի խնդիր ունի, որ ուզում է գնալ: Այնպես չէ, որ հաճույքի համար ենք ուզում գնալ»,- ասաց ակցիայի մասնակիցներից մեկը:

Նա նշեց, որ տեղյակ են՝ ՌԴ-ն թույլ չի տալիս այլ երկրի քաղաքացիների մուտքը իրենց երկրի տարածք, բայց պետք է խորհրդակցել, խորհրդակցելու դեպքում միգուցե հարցը լուծվի: Ըստ ակցիայի մասնակիցների, ամենադժվարն անորոշություն է, որ որևէ հստակ պատասխան իրենց չեն տալիս. «Եթե խորհրդակցում են, թող ասեն՝ այսքան սպասեք, բայց ոչ մեկ մեր հարցին չի պատասխանում»:

Ակցիայի մասնակիցներից մեկն ասաց, որ շարունակելու են իրենց պայքրաը մինչև վերջ. «Պետք լինի, կհրաժարվենք այստեղի քաղաքացիությունի, միայն թե թողնեն մեզ հասնենք մեր ընտանիքներին: Բոլոր ընտանիքները մասնատված են»: