Արթուր Վաղարշյանին ընտրեցինք, քանի որ այս անգամ անկեղծ և անմիջական էր. Սիմոնյան
«Շատ լուրջ քննարկվել է պարոն Վաղարշյանի ելույթը, մոտեցումները, և մենք դրական բաներ ենք տեսել»,- խորհրդարանում լրագրողների հետ զրույցում ասաց ԱԺ փոխխոսնակ Ալեն Սիմոնյանը՝ անդրադառնալով Արթուր Վաղարշյանի՝ ՍԴ անդամ ընտրվելու հարցին։
Հիշեցնենք, որ նա մեկ անգամ մերժվել էր խորհրդարանի կողմից, և անգամ երեկ իմքայլական պատգամավորները զարմանք էին հայտնում, թե ինչո՞ւ է մերժվելուց հետո կրկին ներկայացվել նրա թեկնածությունը՝ որպես ՍԴ անդամ։
Հարցին, թե ի՞նչն է փոխվել Արթուր Վաղարշյանի մոտեցումներում, որ նախորդ անգամ մերժելուց հետո այս անգամ իշխանությունը նրան վստահության քվե է տվել, Ալեն Սիմոնյանը պատասխանեց՝ եթե նայեք պարոն Վաղարշյանի ելույթները, կտեսնեք՝ որքան անկեղծ է նրա ելույթն այս անգամ.
«Քվեարկությամբ մենք մեր կարծիքը տվել ենք։ Նրա ելույթները կարելի է համեմատել, և կտեսնեք՝ որքան անկեղծ, ազնիվ և անմիջական է նա, իսկ մասնագիտական որակների առումով մենք ոչ նախորդ և ոչ էլ այս անգամ կասկած չենք ունեցել»։
ԱԺ փոխխոսնակը նշեց, որ իշխանությունը խոստացել էր, որ լինելու է ՍԴ, որը չի լինելու խամաճիկային, և չի պատկանելու իշխանությանը։ Ըստ նրա, ԱԺ-ի խնդիրն է եղել ստեղծել սկզբունքային դատարան, ինչն էլ այսօր արվել է։
«Ում էլ բերեինք, հրապարակախոսները, պատգամավորները միշտ էլ իրենց պատկերացումներն են ունենալու, իրենց թեկնածուները։ Հիշո՞ւմ եք՝ տարբեր անուններ էին հնչում, և անգամ այդ անունների դեպքում քննադատություններ կային, թեև մենք հերքում էինք տվյալ մարդանց թեկնածությունը։ Այսինք՝ շատ բարդ է։ Ես կարծում եմ, որ շատ երկար ճանապարհ կա անցնելու, և մենք ունենք բավականին անելիքներ՝ ոչ միայն ՍԴ-ում, այլ նաև դատական համակարգում։ Դա փաստ է»,- ասաց նա։
Հարցին, թե ինչպե՞ս է ինքը գնահատում հանգամանքը, որ ընդդիմությունը չմասնակցեց ՍԴ անդամների ընտրությանը, Ալեն Սիմոնյանը պատասխանեց՝ իր համար դժվար է գնահատականներ տալ նման գործողություններին։
Դիտարկմանը, թե արդյո՞ք հավանական է, որ Հրայր Թովմասյանը նորից ընտրվի ՍԴ նախագահ, ԱԺ փոխխոսնակն արձագանքեց՝ նման հնարավորությունը գրեթե բացառում է.
«Կարծում եմ, որ ճգնաժամի հետևանքով մենք նոր դատավորներ ենք նշանակել։ Եվ մենք դեռ չենք քննարկել ՍԴ նախագահի հարցը։ Բայց ՍԴ-ում ճգնաժամ էր ստեղծվել նաև այն պատճառով, որ Հրայր Թովմասյանը հայտնվել էր ՍԴ նախագահի պաշտոնում»։
Հարցին, իսկ արդյո՞ք ՍԴ նորընտիր դատավորներն էլ են ՍԴ ճգնաժամը կապում Հրայր Թովմասյանի հետ, Ալեն Սիմոնյանը պատասխանեց՝ չգիտեմ։
«Այդ թեմայով քննարկում չի եղել»,- շեշտեց նա։
Հարակից հրապարակումներ`
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
