Ձեր վստահելի աղբյուրը

«Տեղյակ չեմ ո՛չ քրեական գործերից, ո՛չ էլ որևէ մանրամասնից, և ընդունելի չեմ համարում քրեական գործերին քաղաքական ենթատեքստ տալը»,- այսօր խորհրդարանում լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով «Բարգավաճ Հայաստան» խմբակցության պատգամավորների հայտարարություններին, թե իրենց դեմ «գործեր են կարվում»։

Նրա խոսքով, քաղաքական հարթության մեջ ընդդիմախոսների քաղաքական արձագանքը որևէ կապ չունի քրեական գործերի հետ։

Հարցին, թե Գագիկ Ծառուկյանին չկալանավորելուց հետո որևէ քաղաքական պայմանավորվածություն ձեռք չի՞ բերվել «ԲՀԿ»-ի և իշխանությունների միջև, Լիլիթ Մակունցը պատասխանեց՝ որևէ պայմանավորվածություն որևէ քաղաքական ուժի հետ չունենք.

«Քննարկումներ չեն եղել»։

Ստորև ներկայացնում ենք Լիլիթ Մակունցի ուղղված հարցերն ու դրանց պատասխանները։

Հարց։ Գագիկ Ծառուկյանը վերջին շրջանում քաղաքական շեշտադրումներն ավելի մեղմ է դարձրել և կառավարության  հրաժարականի փոխարեն այժմ առանձին անձանց հրաժարականների մասին է խոսում, ինչո՞վ է դա պայմանավորված։

Լ. Մակունց։ Չեմ կարող մեկնաբանել, գուցե իրենցից ճշտեք։ Ես որպես քաղաքական ուժի ղեկավար պաշտոնապես հայտարարում եմ, որ քաղաքական պայմանավորվածություններ չկան։

Հարց։ Կոռուպցիայի կանխարգելման հանձնաժողովը Գագիկ Ծառուկյանին մանդատից զրկելու հարցն է քննարկում, քանի որ, ըստ հանձնաժողովի, նա խախտել է սամանված կարգը, և զբաղվել է ձեռնարկատիրական գործունեությամբ։ Այս հարցի հետ կապված ի՞նչ նորություն ունեք, և սա ի՞նչ քաղաքական գործընթացի կարող է վերածվել։

Լ. Մակունց։  Քաղաքական ենթատեքստերից, կարծում եմ, պետք է զերծ մնալ։ Կոռուպցիայի կանխարգելման հանձնաժողովն անկախ գործող մարմին է, և որոշումներն ու եզրակացությունները, որոնք հանձնաժողովը տալիս է, անցնում են որոշակի ընթացակարգով։

Հարց։ Բայց քննությունը սկսվել է Արդարադատության նախարարության դիմումի հիման վրա։

Լ. Մակունց։ Ես այդ կապակցությամբ ի՞նչ կարող եմ ասել։ Խնդրում եմ դիմեք արդարադատության նախարարությանը, թե ինչ հիմքով են իրենք դիմում ներկայացրել։ Մենք այդ գործընթացի հետ որևէ կապ չունենք։

Հարց. Բայց այնուամենայնիվ, ԱԺ-ն պե՞տք է ՍԴ ուղարկի այդ հարցը, երբ կոռուպցիայի կանխարգելման հանձնաժողովը ներկայացնի իր եզրակացությունը։

Լ. Մակունց։ Երբ հարցի քննարկումը լինի ԱԺ տիրույթում, այդ ժամանակ մենք կարձագանքենք դրան։

Հարց։ ԱԺ-ն այսօր ՍԴ անդամներ կընտրի։ Բայց նախագահի կողմից ներկայացված թեկնածուն՝ Արթուր Վաղարշյանը, որ երկրորդ անգամ է ներկայացվել որպես ՍԴ անդամի թեկնածու, կարծես իշխանական որոշ պատգամավորների «սրտով չէ». նա մեկ անգամ արդեն մերժվել է իշխանությունների կողմից։  Արդյո՞ք խմբակցության դիրքորոշումը չի փոխվել։

Լ. Մակունց։ Բոլոր պատգամավորներն իրենց հուզող հարցերը հնչեցրել են, և նրանք այդ իրավունքն ունեն։ Պատգամավորների հարցերը ստացել են իրենց պատասխանները, և բավարարե՞լ է արդյոք դա իրենց, թե՞՝ ոչ, ես չեմ կարող ասել։ Ինչ վերաբերում է տպավորություններին, ապա քվեարկության արդյունքները պարզ կդարձնեն՝ արդյո՞ք որևէ տպավորություն փոխվել է, թե՞՝ ոչ։ Ես չեմ վիճարկում, որ նախագահն իրավունք ունի նույն թեկնածուին մի քանի անգամ ներկայացնել։

Մենք նպատակ ունենք թարմացնել և նորացնել ՍԴ-ը։ Թե՛ խնդիրների և թե՛ մեր պատկերացրած լուծումները մենք ներկայացրել ենք։

Հարց։ Գերագույն դատարանի ստեղծմանը դեմ լինելը կարո՞ղ է պատճառ դառնալ, որ Երվանդ Խունդկարյանը չընտրվի՝ որպես ՍԴ անդամ։

Լ. Մակունց։ Իրավաբանների մասնագիտական բանավեճի հետ կապված թույլ տվեք քաղաքական մեկնաբանություն չանել։

Հարց։ Ձեզ չի՞ մտահոգում, որ ընդդիմադիրները չեն մասնակցում ՍԴ անդամի ընտրությանը։

Լ. Մակունց։ Նրանք որևէ կերպ չեն ցանկանում փոփոխությունների հետ կապված իրենց որոշումն արտացոլել քվեարկությունում։ Դա իրենց որոշումն է, և սրանով մենք անում ենք ենթադրություններ, որ միգուցե ընդդիմադիրներին դուր է գալիս ստեղծված իրավիճակը։