Ձեր վստահելի աղբյուրը

Արարատի մարզի Շահումյան գյուղի բնակիչները փակել են մայրուղին, պատճառը խաղողի մթերման խնդիրն է. բերքի մթերման արժեքը մինչև 50 դրամով ցածրացել է, և մեկ կիլոգրամի դիմաց այժմ գյուղացուն առաջարկում են 100 դրամ գումար, շատերը՝ նույնիսկ այդ գնով չեն կարողանում մթերել։

«Մենք ո՞վ ենք մթերողների համար, որ մի հատ էլ գան մեզ հանդիպեն։ Ժողովուրդն իրենց չափ չկա, չեն գալիս, գոնե հանդիպեն։ Իրենց զավոդներն են խաղողի համար էդ գները հայտարարում, բայց չեն գալիս, որ մեզ լսեն, մեր հարցը լուծեն։ Վարկերով ենք ամեն ինչ արել, բայց հիմա վարկը մարելու համար գումար չենք ունենա, եթե իրենց սահմանած գնով ծախենք»,- նշեց է ակցիայի մասնակիցներից մեկը։

Ի հակադրում համագյուղացու, խաղող մթերողներից մեկն էլ ասաց, որ մթերող արտադրամասերը ոչ մի մեղք չունեն, քանի որ իրենք էլ իրենց հնարավորության չափով են մթերում. «Սա մարզպետի, կառավարության, նախարարների լուծելու հարցն է։ Կառավարությունը պետք է թելադրի։ Իսկ վարչապետն էլ ասում է՝ որոշողը ժողովուրդն է։ Դե ժողովո՞ւրդ է որոշողը, որոշում է մթերման գինը՝ 150 դրամ։ Լավ է, որ ավելի շատ չենք ուզում։ 150 դրամն էլ նորմալ չի, բայց էդ գնով վաճառելու դեպքում մարդիկ գոնե կարող են գոյատևել ու եկող տարի էլ այս գործը շարունակել»։

Իսկ ներկայիս առաջարկվող պայմաններում, ըստ գյուղացիների, հնարավոր չի լինի ապրել։ Նրանցից ոմանք հիշեցին, որ տարիներ առաջ մի անգամ վերացրել են խաղողի այգիները, քանի որ մթեման գինը մինչև 40 դրամ է եղել, ապա տարիներ անց նորից այգի են տնկել։

«Ռոբերտ Քոչարյանի նախագահության տարիներին խաղողի մթերման գները երեք անգամ բարձրացան, մարդուն բռնել կալանավորել են»,- ասաց ցուցարարներից մեկը:

Նա որոշեց, որ պետք է ճանապարհը փակ պահեն, որպեսզի մարզպետը մոտենա իրենց. «Էսօրվա դրությամբ սաղս պարտքերի մեջ թաղված ենք, եկեք շոշ փակենք։ Յոթ մլն դրամ վարկ եմ վերցրել, ո՞նց պիտի փակեմ։ Եկեք ավտոներով շոշը փակենք։ Ժողովրդի հետ էս ինչ են անում, մեր վրա էս ինչ են դրել։

Ցուցարարներից մեկն էլ նշեց, որ վարչապետը պետք է այս հարցին լուծում տա, քանի որ հենց այս մարդիկ են երկու տարի առաջ կանգնել իր կողքին։

«Երեսուն տոննա խաղող ունեն, ո՞նց հարյուր դրամով վաճառեմ։ Բանկերը թալանում են մեզ, որ եղած վարկերը փակեմ, պիտի «դաբավոչնի» փող վերցնեմ բանկից։ Ուսանող ունեմ, երեխա ունեմ, թոռ ունեմ։ Կերան, ծծեցին էս ժողովրդի կյանքը։ Հենա, մեզ ավտոյի տակ գցեք, պրծնենք։ Ո՞նց ապրեմ, մի հատ կլառնետի մուշտուկով են գրադուսը չափում։ Բացի այդ, քաշի մեջ են խաբում։ Փաշինյան, Փաշինյան, կերավ մեզ էդ Փաշինյանը, այ մարդ, կերավ։ Թող պետական զավոդ սարքի։ Կամ ո՞նց է լինում, որ Ծառուկյանը 150 դրամով է մթերում, իսկ Ալեքսանյանը՝ չի կարողանում։ Պիտի հասկանան, որ մեծ զավոդներն են գին որոշողը»,- ասաց նա։

Ակցիայի մասնակիցները նշեցին նաև, որ Սամվել Ալեքսանյանի գործարանը «սեղանի սորտ» խաղողը չի ընդունում, թեև գյուղացիների բերքի 80%-ը հենց այդ տեսակի խաղող է.

«Իմ ունեցածը այսպես է՝ 50% սեղանի սորտ, 50%՝ տեխնիկական։ Հիմա ի՞նչ անեմ այդ սեղանի սորտը։ Բա խի՞ էին անցած տարի ընդունում։ Մարդկանց բերքը մնացել, փչանում է, ի՞նչ անենք»։

Նրանք տեղեկացրին նաև, որ գործարանները մթերման ենթական խաղողների ցանկում այնպիսի անուններ են նշել, որ որևէ մեկին այդ տեսակը ծանոթ չէ. «Ամեն ինչ անում են, որ մեզ տուպիկ գցեն»։

Ի վերջո, բողոքի ակցիայի արդյունքում, Սամվել Ալեքսանյանին պատկանող գործարանը գյուղացիներին խնդրել է մինչև օգոստոսի 20-ը  սպասել։ Թեև խաղողագործներից ոմանք դեմ էին սպասելուն, քանի որ վստահ էին, որ այդ օրն էլ խնդրելու են մինչև օգոստոսի 25 սպասել, այնուամենայնիվ, իրենք համաձայնեցին բացել ճանապարհը։