Ձեր վստահելի աղբյուրը

Արարատի մարզի Շահումյան գյուղի բնակիչները փակել են մայրուղին, պատճառը խաղողի մթերման խնդիրն է. բերքի մթերման արժեքը մինչև 50 դրամով ցածրացել է, և մեկ կիլոգրամի դիմաց այժմ գյուղացուն առաջարկում են 100 դրամ գումար, շատերը՝ նույնիսկ այդ գնով չեն կարողանում մթերել։

«Անցած տարի խաղողն ընդունել են 150 դրամով, իսկ այս տարի մի տեսակը դարձրել են 100, մյուսն էլ՝ 130 դրամ։ Դա գումար չի, որ մենք բերքը վաճառենք։ Պատերազմում վիրավորված երկու տղա ունեմ, ինչո՞վ պետք է պահեմ իրենց ընտանիքները, վարչապե՞տն է գալու պահի։ Գիտեք ինչ, ոչ մեկը մեզ համար ոչինչ չի անում։ Ու ոչ միայն վարչապետը..., պարոն Ծառուկյանի հետ էլ 20-30 տոննայի պայմանագիր ունենք, բայց ասում են 15 տոննա բերեք։ Ինչի՞ համար։ Խի՞ են պայմանագիր կապել, հիմա էլ քչացնում են, ասում են՝ հիվանդություն կա, չենք կարողանում մթերել»,- նեղսրտած նշեց խաղողագործներից մեկը։

Մյուսն էլ հակադարձեց՝ գիտեք ինչ, գոնե թող մյուսներն էլ Ծառուկյանի պես 150 դրամով մթերեն, դա էլ չեն անում։

«Այդ ոնց է, որ անցած տարի 150-ով են մթերել խաղողն ու տակ չեն տվել, հիմա չեն մթերում՝ ասելով, թե տակ կտանք։ Մենք չենք կարողանում մթերողներին տեսնել, որ մեր խնդիրը բարձրացնենք, այս տարբերակով գոնե հույս ունենք, որ մեր ձայնը կլսեն»,- հույս հայտնեց գյուղացիներից մեկը։

Մեկ ուրիշ խաղողագործ էլ տեղեկացրեց, որ Պռոշյանի գինու և կոնյակի գործարանն իր խանութն ունի, որտեղ մեկ շիշ կոնյակը 45-60 հազար դրամով է վաճառվում, և այժմ գյուղացուց այդ գնով մեկ տոննա խաղաղ են ուզում գնել. «Դա մարդկությո՞ւն է»։

Խաղողագործների մի մասը նշում է, եթե ՀՀ-ում պահանջարկ չկա, թող իշխանությունները բանակցեն, որ բերքն արտահանվի Վրաստան. այնտեղ մեծ պահանջարկ կա, մյուսն էլ՝ հավելեց՝ գյուղացու խնդիրը չէ, թե ուր կտանեն բերքը, կարևոր է, որ ստանդարտ գին սահմանվի, որպեսզի ժողովուրդն էլ հասկանա՝ ինչ անել։

«Ռուսաստան արտագնա աշխատանքի չենք գնացել, վարկ ենք վերցրել, խաղող մշակել, ու բնական է, որ բերքը շատ է։ Բայց եթե մենք վարկով ենք մշակել այս բերքը, հենց ինքնարժեքը գրեթե 100 դրամի է հասել, այդ դեպքում վարկը ո՞նց փակենք»,- ասաց խաղողագրծներից մեկը, մյուսն էլ, շարունակելով համագյուղացու միտքը, տեղեկացրեց, որ 1500 մետր այգի ունի, և միայն 80 հազար դրամ միջատների դեմ թույներ գնելու համար է ծախսել, 36 հազար դրամ էլ տվել է այգին «սրսկողին»։

Կամ եթե անգամ խաղողի ինքնարժեքի գումարը ստացան, ապա ինչո՞վ պետք է ապրեն. այս  հարցը ևս գյուղացիներին խիստ մտահոգում է։  Բոլոր գործարանները նրանց նույնն են ասել՝ ձետնո՞ւ է 100 դրամով, բերեք, ո՞չ՝ ուրեմն խաղողը չի մթերվի։

«Չգիտենք՝ ինչ կարգով, բայց թող պետությունն աջակցի գործարաններին, որ իրենք էլ կարողանան մթերել։ Չնայած, այդ գործարաններին երկու տարով անտոկոս վարկ են տրամադրել. դա նշանակում է, որ յուրաքանչյուր գործարան կարող է 150 դրամով 20 հազար տոննա խաղող մթերել»,- շեշտեց խաղողագործներից մեկը։