Ձեր վստահելի աղբյուրը

ԱՄՆ նախագահ Դոնալդ Թրամփը երեքշաբթի օրն ասաց, որ կորոնավիրուսի դեմ պատվաստանյութը կարող է պատրաստ լինել մի քանի շաբաթից՝ չնայած արագացված ժամանակացույցի վերաբերյալ ԱՄՆ հանրային առողջապահության ոլորտի մի շարք պաշտոնյաների հնչեցրած նախազգուշացումներին։ Այս մասին գրում է Ամերիկայի Ձայնը։

Խոսելով Ֆիլադելֆիայում ABC News- ի կազմակերպած հանդիպում-միջոցառմանը՝ Թրամփը պաշտպանեց կորոնավիրուսային ճգնաժամի կարգավորմանն ուղղված իր վարչակազմի քաղաքականությունը՝ ընդգծելով, որ պատվաստանյութը կարող է պատրաստ լինել զանգվածային կիրառմանը նախքան նոյեմբերի 3-ի ԱՄՆ նախագահական ընտրությունները:

«Մենք շատ մոտ ենք պատվաստանյութի ստեղծմանը: Եթե ցանկանում եք իմանալ ճշմարտությունը, ապա նախկին վարչակազմին, թերևս, անհրաժեշտ կլինեին տարիներ պատվաստանյութ ստեղծելու համար FDA-ի և այլ հաստատումների պատճառով: Իսկ մեզ շաբաթներ են մնացել այն ստեղծելու համար: Մոտ երեք, չորս շաբաթ», - ասել է նախագահը:

Միջոցառմանը Թրամփն արձագանքել է մի շարք հարցերի` կապված համավարակի դեմ իր վարչակազմի պայքարին՝ նշելով, որ Չինաստանի և Եվրոպայի համար ԱՄՆ-ի սահմանների փակման իր որոշումը փրկել է հազարավոր, եթե ոչ միլիոնավոր կյանքեր: Նա կրկնել է համաճարակի սկզբում արած իր այն պնդումն, ըստ որի, վիրուսը կվերանա ինքնուրույն և հերքել հիվանդության սպառնալիքի թերագնահատման մասին կարծիքը, երբ հանդիպման մի մասնակից հարց հնչեցրեց, թե ինչու է նախագահը նվազեցնում համավարակի նշանակությունը, երբ այն մեծ հարված է հասցնում հատկապես ցածր եկամուտ ունեցող ընտանիքներին և փոքրամասնությունների համայնքներին: Նախագահի պատասխանն այսպիսին էր:

«Ես չեմ նսեմացրել դրա նշանակությունը: Իրականում, շատ առումներով, իմ գործողություններով ավելի շատ եմ կարևորել: Իմ գործողությունները շատ հստակ էին», - հայտարարեց նախագահ Թրամփը:

Նախագահն ընդգծեց, որ հասկանում է այն բոլոր մարդկանց ցավը, ովքեր կորցրել են հարազատներին այս համավարակի ընթացքում և կիսում դա:

«Ես ճանաչում էի մարդկանց, ովքեր հզոր, ուժեղ, լավ մարդիկ էին, սակայն այս հիվանդությունը նրանց չշրջանցեց, և նրանք մահացան»,- նշել է Թրամփը:

Թրամփը կրկին հույս հայտնեց, որ պատվաստանյութը շուտով պատրաստ կլինի, որը զգալիորեն կօգնի համավարակի դեմ պայքարին:

Չորեքշաբթի օրը դաշնային կառավարությունը տեղեկացրեց, որ կսկսի պատվաստանյութի բաշխման գործընթացը համապատասխան մարմինների կողմից հաստատում ստանալու հաջորդ օրը: Պատվաստանյութը կբաշխվի նահանգների միջև ըստ խոցելի բնակչության թվաքանակի, ում Հիվանդությունների վերահսկման և կանխարգելման կենտրոնը խորհուրդ է տալիս պատվաստել առաջին հերթին: Առաջնային պատվաստվողների թվում կլինեն նաև բուժաշխատողները:

Ըստ ԱՄՆ առողջապահության և պաշտպանության նախարարությունների տրամադրած փաստաթղթերի, COVID-19 պատվաստանյութերի սահմանափակ չափաբաժին կարող է հասանելի լինել արդեն մինչև 2020 թ. նոյեմբերի սկիզբը, եթե պատվաստանյութը մինչ այդ հաստատված և լիցենզավորված լինի FDA- ի կողմից: Չափաբաժինը կարող է զգալիորեն աճել 2021 թվականին: