Ձեր վստահելի աղբյուրը

Քաղաքագետ, քաղտեխնոլոգ Վիգեն Հակոբյանի տպավորությամբ՝ բարձր իշխանությունը ցանկություն ունի այս կամ այն ձևով Ամուլսարի հանքը բացել:

«Եթե հակառակը լիներ, իրենք շատ ավելի հեշտ կլուծեին: Կարծում եմ՝ ժամանակ առ ժամանակ այդ ցանկությունը կա, բայց երևի թե չկան հնարավորություններ կամ դուխը  չի հերիքում, որպեսզի վերջնական որևէ քաղաքական որոշում ընդունեն, քանի որ Ամուլսարի հարցը  վաղուց տնտեսական հարցից  վերածվել է սոցիալական, քաղաքական հարցերի»,- ասուլիսում ասաց  նա:

Ըստ նրա, այսօրվա իշխանություններն իրենց վարքագծով միշտ ցույց են տալիս, որ  քաղաքական ընդդիմախոսերի նկատմամբ բավականին աչալուրջ են, նույնիսկ փոքր ակցիան, ընդվզումը  որպես վտանգ են տեսնում  իրենց իշխանության համար:

«Արտաքինից ցույց են տալիս՝ հանգիստ են, ելույթների ժամանակ իշխանության ներկայացուցիչներն ասում են՝ իրենց ընդհանրապես չի մտահոգում որևէ ընդդիմադիր ակցիա, քաղաքական դեմքերի անուններ են տալիս ձեռք առնելով, բայց գործողությունները, որոնք անում է  իշխանությունը կասեցնելու այդ ակցիաները,  քաղաքական գործիչների ակտիվությունը, ցույց են տալիս, որ մտահոգություններ ունեն:  Հիմնականում փորձում են  օգտագործել քրեական հետապնդման մեխանիզմները»,- ասաց քաղտեխնոլոգը:

Վիգեն Հակոբյանի խոսքով, բողոքի թեմաներն անընդհատ ավելանում են, մարդիկ սկսել են հասկանալ, որ իրենց ձայնը լսելի չէ, իսկ խնդիրներին լուծում չտալով՝ դառնում են խրոնիկ:

«Ամեն անգամ բողոքող զանգվածներն ավելանում են, թեմաներն ավելանում են, ուշ թե շուտ, եթե լուծում չստանան, բոլորը քաղաքականացվելու են, որովհետև ընդդիմությունն է աստիճանաբար  ոտքի կանգնում,  դիրքավորվում դաշտում: Ընդդիմության գործառույթներից մեկը նման առիթները քաղաքական օրակարգ դարձնելն է»,- ասաց նա:

Ասուլիսին ներկա «Հանուն սոցիալական արդարության» կուսակցության նախագահ Արման Ղուկասյանն ասաց, որ  մոտ վեց ամիս Հայաստանն արտակարգ դրության մեջ էր, բայց կարելի է ենթադրություն անել, որ արտակարգ դրությունը  հիմնականում վերաբերում էր ՀՀ քաղաքացիներին, ոչ իշխանությանը:

«Ինչ կարևոր օրենքներ կային իրենց համար, բերեցին ու ընդունեցին՝ լավ իմանալով, որ եթե դժգոհություններ լինեն, քաղաքացիները չեն կարողանալու իրենց դժգոհությունը լիարժեք կերպով արտահայտել:

Խոսքն այն մասին է, որ  այսօրվա իշխանություններն արտակարգ դրությունը օգտագործել են  իրենց քաղաքական շահի համար, ինչն արդար չէ սեփական քաղաքացիների նկատմամբ»,- ասաց Ա.Ղուկասյանը:

Նրա խոսքով, կառավարության հակաճգնաժամային   քաղաքականությունը,  տրամադրվող միջոցները բավարար չեն, լիարժեք չեն եղել, երկարաժամկետ բնույթ չեն կրել, չեն կարողացել գոնե կես չափով լուծել քաղաքացիների խնդիրները, որոնք առաջացել էին կորոնավիրուսի պատճառով:  

«Կառավարությունը չի անում քայլեր, որոնք իսկապես թեթևացնեն մարդկանց բեռը, աջակցեն մարդկանց: Մեր երկրում ամենօրյա ռեժիմով մարդկանց կենցաղը, սոցիալական վիճակը  վատանում է: Ճգնաժամի ժամանակ թիվ մեկ պատասախանատուն կառավարությունն է»,- նշեց նա:

Ըստ Ա. Ղուկասյանի, եթե այսպես շարունակվի, մոտ ապագայում կլինի սոցիալական դժգոհությունների լուրջ ալիք: