Ձեր վստահելի աղբյուրը

Միացյալ Նահանգների գործող նախագահ Դոնալդ Թրամփն իր դեմոկրատական հակառակորդ Ջո Բայդենի հետ առաջիկա բանավեճում առավել շահեկան դիրքերում գտնվող գործիչ է, գրում է «ՌԻԱ Նովոստի»-ն՝ ներկայացնելով քաղաքական փորձագետ Վալերի Գարբուզովի խոսքը։

ԱՄՆ-ի նախագահական ընտրությունները տեղի կունենան նոյեմբերի 3-ին, Թրամփը հավակնում է նախագահության երկրորդ ժամկետի և պայքարելու է Բայդենի դեմ: Նախագահի թեկնածուների առաջին բանավեճը նշանակված է սեպտեմբերի 29-ին: Երկրորդ և երրորդ փուլերը նախատեսված են համապատասխանաբար հոկտեմբերի 7-ին և 15-ին:

Կորոնավիրուսի հետ կապված՝ բանավեճերի ձևաչափը դեռ ամբողջությամբ հաստատված չէ: Մասնավորապես, հայտնի չէ՝ դահլիճում հանդիսատես կլինի՞, թե՞՝ ոչ,  և արդյո՞ք մրցակիցները կլինեն նույն բեմում:

Գարբուզովի խոսքով, բանավեճը 1980 թվականից ի վեր ամբողջ ամերիկյան նախընտրական արշավի բաղկացուցիչ մասն է և ԱՄՆ-ն երբեք չի հրաժարվել դրանից:

«Ի դեպ, շատերը կարծում են, որ հեռուստաբանավեճը այս ընտրություններում առանցքային և, թերևս, ամենանշանակալի տարրն է։ Հետևաբար, թեկնածուները մեծ ջանք են թափում՝ պատրաստվելու այդ բանավեճերին: Ինչ վերաբերում է գործակիցներին, իհարկե, Թրամփը հեռուստաբանավեճերում առավել շահող դեմք է: Ի վերջո, Թրամփը պահպանել է ընտրական զանգվածների հզոր մոբիլիզատոր լինելու իր կարողությունը: Նրա ելույթներից հետո շատ հաճախ փոխվում է ընտրություններում տատանվողների դիրքորոշումը», - ասել է Գարբուզովը:

Ավելի վաղ ԱՄՆ Ներկայացուցիչների պալատի խոսնակ Նենսի Փելոսին դեմ էր արտահայտվել Բայդենի ու Թրամփի բանավեճին: Բայց Բայդենը պատրաստակամություն է հայտնել նախագահ Թրամփի հետ բանավիճելու:

Ըստ Գարբուզովի, Փելոսին հակաթրամփական շարժման մասնակից է, և, կարծես, անձնական հակակրանք ունի ԱՄՆ ներկայիս նախագահի նկատմամբ:

«Ընդհանուր առմամբ,  Փելոսին ինտուիտիվորեն հասկանում է, որ Բայդենը կարող է պարզապես պարտվել», - ավելացրել է փորձագետը: