Ձեր վստահելի աղբյուրը

«Ժառանգները» սերիալը «Էմմի» մրցանակ է ստացել՝ «Լավագույն դրամատիկական սերիալ» անվանակարգում. 72-րդ մրցանակաբաշխությունն անցկացվել է ամերիկյան «ABC» հեռուստաալիքի ուղիղ եթերում, փոխանցում է «ՌԻԱ Նովոստի»-ն։

Այս տարի «Լավագույն դրամատիկական սերիալ» տիտղոսի համար ներկայացվել էին նաև «Թագ», «Ավելի լավ է, զանգեք Սոլին», «Աղախնի պատմությունը», «Օզարկ» և «Եվայի սպանությունը» սերիալները։

Ավելի վաղ հայտնի էր դարձել, որ «Լավագույն կատակերգական սերիալ» անվանակարգում «Էմմի» մրցանակ է ստացել «Շիթս Կրիկ» սերիալը։

«Էմմի» մրցանակը շնորհվում է Հեռուստատեսության արվեստի և գիտությունների ակադեմիայի կողմից, որը հիմնադրվել է 1946 թվականին, և համարվում է ամենահեղինակավոր մրցանակներից մեկը հեռուստատեսային էկրանին աշխատելու համար:

Մրցանակի տիտղոսակրին որոշում են հեռուստատեսային ակադեմիայի շուրջ 23 հազար անդամներ: «Էմմի» ոսկե արձանը թևավոր կնոջ տեսք ունի, որի ձեռքին խորհրդանշական ատոմ է. այն մարմնավորում է գիտության և արվեստի միասնությունը: