Ձեր վստահելի աղբյուրը

«Մենք այսօր տեսնում ենք, որ Հայաստանի նկատմամբ տարվում է տեղեկատվական պատերազմ, այդ թվում Հայաստանի ներսում գտնվող՝ հիմա արդեն հայտնի շրջանակների միջոցով»,- Մատենադարանում «Մինչև 2050 թ. Հայաստանի վերափոխման ռազմավարությունը» ներկայացնելիս հայտնեց վարչապետ Նիկոլ Փաշինյանը:

Ըստ նրա, Հայատանի հանրությունը շատ խոցելի է. կարող է մեկը դրսից նպատակով ասել՝ Ղարաբաղը ծախել են և Հայաստանում փոթորիկներ կբարձրանան:

Վարչապետը ներկայացրեց նաև ռազմավարությամբ ձևակերպված 16 մեգանպատակները՝ առաջիկա 10 տարվա ընթացքում իրականացվելիք կարևորագույն համազգային գործերը.

«Առաջին մեգանպատակը կիրթ և կարողունակ քաղաքացի և ժողովուրդ ունենալն է:
Ներառական, նորարարական, հանրամատչելի զարգացման և յուրացման միջոցով ունենանք քաղաքակիրթ, ստեղծագործ, կարողունակ ու մրցունակ քաղաքացի, ում համար իրավունքների իրացումը նույնքան կարևոր է, որքան պարտականությունների և պարտավորությունների կատարումը»,- ասաց նա։

Երկրորդ՝պաշտպանված Հայաստան ունենալ

Պաշտպանված՝ արտաքին ազդեցություններից, ագրեսիայից, ռազմական և տեղեկատվական հարձակումներից: Այսօր մեր հանրությունը տեղեկատվայկան առումով շատ խոցելի է: 21-րդ դարում տեղեկատվական անվտանգությունը չպետք է անտեսել: Մենք տեսնում ենք, որ Հայաստանի նկատմամբ տարվում է տեղեկատվական պատերազմ, այդ թվում՝ Հայաստանի ներսում գտնվող հայտնի որոշակի շրջանակների կողմից:

Արդյունավետ և հաշվետու կառավարում

Պետական մարմինների գործունեությունը դարձնենք թափանցիկ, արդյունավետ, վերահսկելի, ինչպես նաև կերտենք նախաձեռնող, բարեվարքության բարձրագույն նորմերին համապատասխանող, արդյունքին միտված հանրային ծառայող: Մենք ունենք հանրային կառավարման բարեփոխումների փաթեթ, որտեղ մենք ամեն ինչ քայլ-քայլ պետք է նկարագրենք, թե ինչ գործողություններ ենք անելու: Պետական կառավարման համակարգում պետք է ներգրավել բարձրորակ մասնագետներ:

Առողջ և ապահով քաղաքացին, ժողովուրդ
Ստեղծենք անհրաժեշտ բոլոր պայմաններն առողջ ապրելակերպի, առողջության պահպանման, վերականգնման և արդյունավետ աշխատանքնային գործունեության համար, ինչպես նաև ապահովենք պետության լիարժեք հոգածություն երեխաների և անաշխատունակ խմբերի համար:

Բազմազավակ և բարեկեցիկ ընտանիք ունենալ

Երեք և ավելի երեխաներ ունեցող ընտանիքները դարձնենք համատարած: Ինչպե՞ս: Օրինակ, վերջերս կայացրել ենք որոշում, որը կապված է երեխա ունեցող ընտանիքների հիփոթեքային վարկի ձեռքբերման արտոնյալ պայմանների հետ: Որոշում ենք կայացրել, որ գյուղական համայնքներում նաև չաշխատող մայրերը կստանան նպաստ, իսկ աշխատող մայրերը կստանան կրկնակի:
Իրավական Հայաստանը:

Ապահովենք սահմանադրական մարմինների հավասարակշռված գործունեությունը և համընդհանուր վստահելիությունը, իրավունքի գերակայությունը, օրենքի առաջ բոլորի հավասարութունը և այլն»,- հայտարարեց վարչապետ Նիկոլ Փաշինայնը:

Վարչապետը թվարկեց նաև մշակված արտադրանքի զանգվածային արտահանման, մաքուր և կանաչ Հայաստանի, տարածքային խելամիտ զարգացման, արտադրողական և պատասխանատու ֆերմերության, մեծ հայրենադարձության և ինտեգրման, աշխարհի հետ կապված Հայաստանի, վերականգնվող և հանրամատչելի էներգիա ունենալու, գործարարների համար գրավիչ երկրի, գիտելիքահեն, ճանաչված, հարգված և հյուրընկալ Հայաստանի մեգանպատակների մասին:

Վարչապետը հայտնեց, որ առաջիկայում կստեղծվի ռազմավարության կայքը, որում այն հանրային քննարկման կդրվի: