Ձեր վստահելի աղբյուրը

«Հոկտեմբերի 8-ին երեկոյան ժամը 18.00-ին Ազատության հրապարակում հրավիրում ենք համապետական հանրահավաք»,-խորհրդարանական ճեպազրույցի ընթացքում ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը՝ անդրադառնալով հոկտեմբերի 8-ին կայանալիք հանրահավաքին, որն իրականացվելու է «Բարգավաճ Հայաստան», «Հայ հեղափոխական դաշնակցություն» և «Հայրենիք» կուսակցությունների կողմից։

Պատգամավորը հիշեցրեց, որ վերոնշյալ երեք ուժերը համատեղ քննարկումներ են ունենում և շատ ծրագրեր իրագործում, և այս հանրահավաքը ևս համատեղ իրականացվելիք ծրագրերի շարքում է։

«Մենք առիթ ունեցել ենք նշելու, որ նախորդ երկու տարիների ընթացքում հանրության լայն շերտերի հույսերն այդպես էլ իրականություն չեն դարձել, խոստումներն այդպես էլ կյանքի չեն կոչվել։ Եվ այսօր կա լայն դժգոհություն, ուստի մենք հրավիրում ենք հանրահավաք՝ հանրության ձայնը լսելի դարձնելու համար։ Հանրահավաքի օրակարգի, ինչպես նաև ելույթների մասին շուտով կծանուցենք։ Այս պահին արձանագրում ենք, որ կա հանրային մեծ դժգոհություն, և մենք հնարավորություն ենք ստեղծում՝ այն բարձրաձայնելու համար»,- նշեց պատգամավորը։

Ճեպազրույցի ընթացքում պատգամավորներ Իվետա Տոնոյանը և Արման Աբովյանը պատասխանեցին լրագրողների հարցերին։

Հարց- Ո՞ւմ կողմից է եղել համատեղ հանրահավաք իրականացնելու առաջարկը։ Արդյո՞ք ԲՀԿ-ն մտավախություն ուներ, որ իր մոտ չի հաջողվի միայնակ մեծ հանրահավաք կազմակերպել, և այդ ուժերը միացել են, որ ավելի շատ մարդ մասնակցի։

Ի. Տոնոյան- Բացարձակ նման մտավախություն չունենք, քանի որ ԲՀԿ-ն հանրային մեծ վստահություն վայելող քաղաքական ուժ է։ Անկախ նրանից, թե քանի ընտրող ենք ունեցել մենք, այսօր ամենատարբեր խմբերի կողմից ստանում ենք աջակցության ազդակներ։ Այս պահին վստահության պակասի հետ կապված որևէ մտավախություն և մտահոգություն ԲՀԿ-ն չունի։ Պարզապես մենք ունենք գործակցություն՝ եռյակի ձևաչափով, և նպատակահարմար ենք գտել բոլոր երեք գործընկերներով միասնաբար հանդես գալու, քանի որ մեր օրակարգը միասնական է, ինչի մասին խոսելու հնարավորություն ունեցել ենք։

Հարց- Օրերս Ադրբեջանի նախագահ Իլհամ Ալիևը հայտարարեց, որ բանակցությունները դադարեցվել են ՀՀ իշխանությունների մեղքով։ Արդյո՞ք այստեղ վտանգ չկա, ի՞նչ պետք է անի հայկական կողմը։

Ա. Աբովյան- Վերջին շրջանում Ադրբեջանի և Թուրքիայի նախագահներն ու արտգործնախարարները, ինչպես նաև ռազմական վերնախավը շատ ակտիվ տեղեկատվական նախապատրաստական աշխատանքներ են վարում այն առումով, որ հնարավոր է նոր ռազմական սադրանքների գնան։ Եվ այն հայտարարությունները, որոնք մենք լսում ենք վերջին օրերին՝ և՛ մտահոգիչ են և՛ զավեշտալի, բայց պետք է փաստել, որ դրանք նախապատրաստական աշխատանքների տրամաբանության մեջ են մտնում։ Եկեք հիշենք, որ օգոստոսին Թուրքիան և Ադրբեջանը լայնածավալ զորավարժություններ են արել, բայց մինչ օրս Նախիջևանի սահմանից որևէ զինտեխնիկա չի հանվել։ Նրանք, իրենց հրապարակումներում խոսում էին 16 կործանիչների և 10 անուն զինտեխնիկայի մասին։ Բացի այդ արաբական ու եվրոպական մամուլում նյութեր են գրվում, որոնք փաստում են՝ Թուրքիան իսլամիստական գրոհայինների է տեղակայում Ադրբեջանում։ Ըստ տեղեկությունների, շատ ակտիվ հավաքագրում է կատարվում։ Եվ դա փաստում է, որ Ադրբեջանը տարբեր ուղղություններով պատերազմի նախապատրաստական աշխատանքներ է տանում։

Եվ մենք առաջին հերթին պետք է բոլոր հնարավոր և անհնարին միջազգային հարթակներում բարձրացնենք այս հարցը։ Մենք ունենք ապացույցներ՝ Ադրբեջանի և Թուրքիայի քայլերը, նրանք փորձում  են ռազմական վիճակ գեներացնել տարածաշրջանում։ Մենք պետք է փորձենք միջազգային ասպարեզում առավել լավ առումով հետևողական և նաև ագրեսիվ լինենք։ Մեզ համար էլ է անհասկանալի, թե ինչի շուրջ են բանակցում կողմերը, բայց այստեղ շատ կարևոր է, որ ադրբեջանական կողմի հայտարարությունները բնավ կապ չունեն բանակցությունների հետ։ Դրանք ակտիվ են, թե պասիվ, մենք ներսից գոհ ենք, թե ոչ, դա պետք է դնել մի կողմ։ Ադրբեջանի ղեկավարությունն այսօր պատերազմ է հրահրում, և բացի հրահրելուց, տանում է շատ ակտիվ նախապատրաստական աշխատանքներ։ Երկու օր է՝ Ադրբեջանում պահեստազորայինների ակտիվ հավաքագրում է իրականացվում։ Թուրքիան էլ հայտարարում է, որ մասնակից է լինելու ակնկալվող սպասվելիք գործողություններին։

Հարց- Վաչպաետ Փաշինյանը երեկ ներկայացրեց մինչև 2050 թվականի ռազմավարությունը, ինչպե՞ս կմեկնաբանեք այն։

Ի. Տոնոյան-  Վարչապետի բարի ցանկությունները բավականին դրական էմոցիաներ և լիցքեր են հաղորդում, սակայն ես դադարել եմ հավատալ կենացների մակարդակով արվող մեկնաբանություններին և ենթադրություններին։ Իշխանություններին խորհուրդ կտայի ոչ վաղ անցյալում տված խոստումները կյանքի կոչեին՝ առաջիկա հինգ տասնամյակի ծրագիր ներկայացնելուց առաջ։ Այս դեպքում Գեբելսյան հայտնի ճշմարտության հետ գործ ունենք՝  որքան մեծ է սուտը, այդքան հեշտ է դրան հավատալ։