Ձեր վստահելի աղբյուրը

«Որոշ ընդդիմադիր և «Իմ քայլը» խմբակցության պատգամավորներ փորձում են օգտագործել համայնքին դիվիդենտներ քաղելու համար: Ներկայացնում են՝ իբր համայնքի բնակիչները դեմ են հանքի շահագործմանը»,- հայտարարեց ԱԺ-ի դիմաց ցույց անող Գնդեվազ գյուղի բնակիչներից մեկը՝ Նարեկ Հովհաննիսյանը:  Նա կոչ արեց պատգամավորներին չխանգարել հանքի աշխատանքների վերսկսմանը:

Գյուղի մյուս բնակիչը Վիրաբ Հովհաննիսյանը պատգամավորներին կոչ արեց, որ եթե գալիս են Ամուլսար, ապա  միայն ցուցարարների հետ չհանդիպեն, այլ նաև մտնեն գյուղ, տեսնեն գյուղացու՝ աշխատող մարդու հետ ինչ է կատարվում:

«Իսկ եթե նրանք ցանկանում են ձայն հավաքեն, ապա դրանով չեն կարա, քանի որ ձայն տվողն աշխատող մարդն է՝  մենք ենք, որ 1000 աշխատող ենք»,- հայտարարեց Վիրաբ Հովհաննիսյանը: Վերջինս նկատեց, որ պատգամավորները նաև ֆինանսավորում են Ամուլսարի ճանապարհը փակողներին՝ փաստելով, որ ինքն աշխատելով հանքում արդեն 3 մլն դրամի պարտք ունի, իսկ ճանապարհը փակողները չաշխատելով կարողանում են ընտանիք պահել:

Նարեկ Հովհաննիսյանը նկատեց, որ անօրինական գործողություններ իրականացնողներին, որոնք փակել են հանք տանող ճանապարհը, փորձում են իրենց ներկայացնել համայնք և նրանց կոչ արեց չներկայանալ և չասել, որ Ամուլսարի հարակից բնակավայրերի բնակիչները դեմ է հանքին: Գնդեվազի բնակիչը հայտնեց, որ Ամուլսարում արդեն սկսվել են աշխատանքները,  որոնցում ընդգրկված է հարակից բնակավայրերի 100 բնակիչ: Նրա խոսքով, այս փուլում իրականացվելու են ներքին հարդարման աշխատանքերը,  հետագայում աշխատողների թիվը կբազմապատկվի և հավելեց, որ պատրաստ են ընդունել աշխատանքի յուրաքանչյուրին, ով կկանգնի իրենց կողքին:

Հանքի հարակից համայնքի բնակիչ, կենսաբան Մխիթար Արշակյանը, որը նաև «Լիդիան Արմենիա» ընկերության աշխատակից է, ստահոդ որակեց տեղեկությունները, թե հանքի տարածքում 74 տոննա ուրան կա: Վերջինս հավաստիացրեց, որ հանքում բնապահպանական խնդիր չկա, այլապես 400 հազար դոլարով ուսումնասիրություն անցկացրած «Էլլարդ» ընկերությունը դրանք կարձանագրեր:

Ցուցարարները նկատեցին, որ ոչինչ չեն կարող ասել հանքի շահագործման դեմ հավաքած 12 հազար ստորագրության մասին, իրենք ներկայացրել են հանքի հարակից բնակավայրերի բնակիչների 3000 ստորագրությունը, որոնք կողմ են շահագործմանը:

Նշենք, որ այն, որ գյուղացիները իրենց միակ ապրուստը կապում են Ամուլսարի հանքի շահագործման հետ՝ կառավարության բացթողումն է։ Հենց սա այն հարցերից մեկն է, որ թեժացնում է Ամուլսարի շուրջ իրադարձությունները։ Այնինչ՝  ոչ միայն ՀՀ քաղաքացիները, այլև գիտնականները բազմիցս ու միարժեք արտահայտվել Ամուլսարի հանքի գործարկման վտանգների մասին, ինչը կանդրադառնա ամբողջ հանրապետության վրա։