Ձեր վստահելի աղբյուրը

Սահմանադրական դատարանի նորընտիր անդամ Երվանդ Խունդկարյանն  այս պահի դրությամբ ոչ առաջադրման, ոչ չառաջադրման  մասին դեռևս որոշում չունի։ Նա նաև որոշում չունի այլ դատավորի թեկնածությունը ՍԴ նախագահի պաշտոնում առաջադրելու հարցում։ Այս մասին նա ասաց լրագրողներին։

Հիշեցնենք, որ այսօր Սահմանադրական դատարանում տեղի կունենա աշխատակարգային նիստ, որի օրակարգում է Սահմանադրական դատարանի նախագահի ընտրության հարցը: ՍԴ 9 անդամներից յուրաքանչյուրը կարող է և ինքնառաջադրվել, և առաջադրել այլ թեկնածուի:

Նա նշեց, որ ՍԴ նախագահի թեկնածուի հարցի հետ կապված որևէ քննարկում չի եղել, աշխատակարգային նիստում կլինի քննարկում։ 

Հարցին՝ եթե  Հրայր Թովմասյանի  թեկնածությունն առաջադրվի, ըստ ձեզ կշարունակի՞  ՍԴ ճգնաժամի խնդիրը մնալ, Ե. Խունդկարյանը պատասախանեց. «Այն անձը, ով կընտրվի աշխատակարգային նիստով՝ փակ, գաղտնի քվեարկությամբ, ուրեմն լուծումը կլինի լրիվ օրենքի պահանջներին համապատասխան»։

Պատասխանելով հարցին, թե լուրեր, ենթադրություններ կան, որ Վճռաբեկ դատարանի նախագահի  պաշտոնը թողել եք և ՍԴ եք եկել այն երաշխիքով, որ պետք է դառնաք ՍԴ նախագահ, այդպիսի երաշխիքներ ստացե՞լ եք, նա ասաց, որ չի կարող երբևէ նման երաշխիքներ լինել և նման քննարկում չի եղել։

«Ինչո՞ւ։ Որպեսզի  դատական ատյանի որևէ  դատավոր դառնա ՍԴ դատավոր, նախ  պետք է դատավորների ընդհանուր ժողովն ընտրեր, պետք է ԱԺ ընտրեր, պետք է ՍԴ դատավորներն ընտրեին։ Որևէ մեկը նման երաշխիք չէր կարող տալ, որևէ մեկը նման երաշխիք չի տվել»։

Ինչ վերաբերում հարցին, թե ինչո՞ւ թողեցիք  Վճռաբեկ դատարանի նախագահի պաշտոնը, ավելի գրավի՞չ  է Սահմանադրական դատարանը,  Երվանդ Խունդկարյանն ասաց, որ ինքը պաշտոնները չի գնահատում, իր համար ավելի արժեքավոր է դատավորի արդարադատական գործառույթ իրականացնելը, իսկ որևէ պաշտոն, այդ թվում Վճռաբեկ դատարանի նախագահի, որևէ դատարանի նախագահի, ժամանակավոր երևույթներ են։

Նա նաև անհրաժետ գտավ նշել. «Ցանկացած անձի կարող են ցանկացած իշխանության հետ կապել։ Ես  Գերագույն դատարան աշխատանքի եմ անցել Հանրապետության առաջին նախագահի օրոք, աշխատանքս փոխել եմ և տնտեսական դատարանում եմ որպես դատավոր աշխատել երկրորդ նախագահի օրոք։ Վճռաբակ  դատարան՝ թե դատավոր, թե պալատի նախագահ  նշանակվել եմ երրորդ նախագահի օրոք։ Վճռաբեկ  դատարանի նախագահ ընտրվել եմ 2018 թվականի ապրիլյան հեղափոխությունից հետ, 2018-ի սեպտեմբերին, երբ որևէ  մեկ կուսակցության դոմինանատ կարծիք չէր կարող ազդել ընտրության վրա։ ՍԴ անդամ եմ ընտրվել 2020 թվականին։

Խնդրում եմ հայտնեք՝ ես ո՞ր իշխանության մարդն եմ»։