Ձեր վստահելի աղբյուրը

Ռուսաստան մեկնել ցանկացող քաղաքացիները կրկին Կառավարության շենքի մոտ են, նրանց պահանջը նույնն է՝ հնարավորություն տալ ՀՀ քաղաքացիներին մեկնել ՌԴ։ Նրանցից շատերը, թեև ՀՀ քաղաքացի են, բայց տարիներ շարունակ բնակվել են ՌԴ-ում, անտեղ ընտանիք և աշխատանք ունեն։

Ակցիայի մասնակիցները պնդում են՝ ՀՀ վարչապետը պետք է բանակցի ռուս գործընկերների հետ, որպեսզի Հայաստանում մնացած քաղաքացիները թե՛ օդային և թե՛ ցամաքային ճանապարհով կարողանան մեկնել ՌԴ և հասնել իրենց ընտանիքներին։

«Մենք բազում սոցիալական խնդիրներ ունենք, մարդիկ կան, որ Երևանում բնակարաններ են վարձել, ու հիմա իրենց այդ տներից դուրս են հանում՝ վարձը չտալու պատճառով։ Կան ընտանիքներ, որոնք կիսվել են՝ կինը մի երեխայի հետ այստեղ է, անչափահաս երեխան և ամուսինը ՌԴ-ում։ Հիմա այդ ամուսինը անչափահաս երեխա պահի՞, թե՞ աշխատի, որ հա՛մ այնտեղ տան վարձ տա, հա՛մ ուղարկի ՀՀ, որ կինը այստեղ տուն վարձի և ապրի։ Սրա լուծումը ո՞նց կարող ենք ստանալ։

Նման լիքը խնդիրներ կան։ Կան դեպքեր, որ ամուսինն է ՀՀ-ում, կինն ու երեխաները՝ ՌԴ-ում։ Հիմա մարդիկ այստեղ արդեն վեց ամիս պարտքով ու վարկով ապրել են, էլ ի վիճակի չեն։ Կան նաև մարդիկ, որ տարիներ շարունակ Ռուսաստանում աշխատել են, տուն ստեղծել հիմա ընտանիքով այստեղ են, իսկ իրենց ստեղծածը այնտեղ վարձած բնակարաններից դուրս են հանում։ Խնդիրներն այնքան շատ են, որ մի ամբողջ օր կարող ենք խոսել»,-պատմեց ակցիայի մասնակիցներից մեկը։

Նշենք, որ ակցիային մասնակցում են նաև ՌԴ արտագնա աշխատանքի մեկնել ցանկացողները, որոնց ընտանիքներն այստեղ՝ Հայաստանում են։

Դիտարկմանը, որ սահմանների փակումից անմիջապես հետո ՀՀ վարչապետը նշեց, որ ամբողջ աշխարհում է իրավիճակն այսպիսին, և արտագնա աշխատանքի մեկնել ցանկացողներին առաջարկեց գյուղատնտեսությամբ զբաղվել, որևէ մեկը փորձե՞լ է այդ տարբերակը, ակցիայի մասնակիցները արձագանքեցին՝ այդ կոչերին լսողներ եղել են, հետևել են վարչապետի հորդորին, և երկու օր առաջ Մեյմանդարում իրենց  ամբողջ չարչարանքը թափել են գետնին ու հետ եկել. արտահանում չկա, արտաքին շուկա չկա.

«Ի՞նչ է նշանակում, որ մարդն ամբողջ տարին աշխատի և երեսուն դրամով չկարողանա բիբար վաճառել։ Իսկ երևանցին որտե՞ղ գյուղատնտեսությամբ զբաղվի, ասֆալտը քանդի մա՞րգ սարքի։ Ես երեք անչափահաս բալիկ ունեմ և շատ վարկեր ունեմ, ամսական 150 հազար դրամ վարկ եմ փակում, այստեղի աշխատավարձը կհերիքի՞, որ հա՛մ վարկ փակեմ, հա՛մ երեխաներին դպրոց ու մանկապարտեզ ուղարկեմ»։

Ակցիայի մասնակիցները նշում են՝ լավ օրից չէ, որ ուզում են ՌԴ գնալ։ Նրանք վստահեցնում են՝ եթե գումարի խնդիր չունենային, չէին թողնի երկիրը ու գնա։

«Միլիոններով վարկ ունենք, ո՞նց էստեղ ապրենք, 100 հազար դրամով ո՞նց անենք, ի՞նչ անենք»,- նեղսրտեց ակցիայի մասնակիցներից մեկը։

Մեկ այլ քաղաքացի էլ դժգոհեց, մարդիկ կան, որ ՌԴ-ում թողել են ամեն ինչ, եկել ՀՀ, որ այստեղ ինչ-որ ՍՊԸ բացեն, տենդեր շահեն ու շինարարություն անեն, բայց իրենց ասել են՝ գիտեք ինչ, պետք է ձեր հաշվին 100 հազար դոլար լինի. «Հիմա այդ մարդիկ ասում են՝ անիծվի այն օրը, որ ես եկա Հայաստան։ Նրան էլ արդեն չգիտեն՝ ինչ անել։ Այդ մարդիկ ևս ուզում են հետ գնալ»,- շեշտեց ակցիայի մասնակիցը։