Ձեր վստահելի աղբյուրը

Սահմանադրական դատարանի նախընտիր դատավոր Արթուր Վաղարշյանը չի ասում՝ արդյոք ինքնաառաջադրվելու է կամ ՍԴ դատավորներից ում թեկնածությունը կառաջադրի ՍԴ նախագահի պաշտոնում:

«Առայժմ գաղտնիք է: Թե ով կառաջադրվի, այսօր կերևա, ես չեմ կարող ենթադրություններ անել»,- ՍԴ-ի մոտ լրագրողների հետ զրույցում ասաց Արթուր Վաղարշյանը:

Նա նշեց, որ նախընտրած թեկնածու առայժմ չունի, պետք է լսի թեկնածուին ու նրա խոսքը, տեսլականը ՍԴ ապագայի մասին, նոր ընտրությունը կատարի:

«Ես տեսլականի ընտրություն եմ կատարելու, ոչ թե անձի»,- ընդգծեց ՍԴ դատավորը:

Երեկ  Սահմանադրական դատարանում կայացել է  աշխատակարգային նիստ, որի օրակարգում էր Սահմանադրական դատարանի նախագահի ընտրության հարցը: Սակայն աշխատանքային օրվա ավարտով պայմանավորված՝ նիստը չէր ավարտվել: ՍԴ դատավորներն ասում են, որ երեկվա նիստում ընթացակարգային հարցեր են քննարկել, թեկնածություններին չեն անդրադարձել:
Նիստը կշարունակվի նաև այսօր:ՍԴ 9 անդամներից յուրաքանչյուրը կարող էր և ինքնառաջադրվել, և առաջադրել այլ թեկնածուի: «Սահմանադրական դատարանի մասին» ՀՀ օրենքի 19-րդ հոդվածի համաձայն՝ Սահմանադրական դատարանի կազմից նախագահ կարող է ընտրվել այն թեկնածուն, որը ստացել է դատավորների ընդհանուր թվի ձայների երկու երրորդը, որը կազմում է 6 ձայն։ Իսկ այն դեպքում, երբ առաջադրվել է մեկ թեկնածու, ընտրվում է դատավորների ընդհանուր թվի ձայների մեծամասնությամբ՝ 5 ձայնով:Քվեարկությունը փակ է։