Ձեր վստահելի աղբյուրը

Սահմանադրական դատարանում նախագահի թեկնածուների առաջադրման գործընթացը  դեռ չի քննարկվել: Լրագրողների հետ զրույցում հայտարարեց ՍԴ դատավոր Էդգար Շաթիրյանը։

Նա նշեց, որ ժամը 11-ից մինչև այս պահին քննարկվում էր լրատվամիջոցների՝ նիստին մասնակցության-չմասնակցության հարցը: 

«Կարծես մոտենում ենք հարցի քննարկման ավարտական փուլին, թե ինչ արդյունք կլինի, չեմ ուզում ենթադրություններ անել», - ասաց Է. Շաթիրյանը:

ՍԴ դատավորն ասաց, որ երեկ այս հարցով որոշում չի ընդունվել ձայների հավասարության հանգամանքով պայմանավորված: 

Հարցին՝ եթե 9 հոգի են, ինչպե՞ս է հավասար եղել, նա պատասխանեց. «Թույլ տվեք այլ մեկնաբանություն չանեմ, եթե ասում եմ ձայների հավասարություն, բնականաբար...»: 

Նրա կարծիքով,  ընդմիջումի ավարտից հետո՝ 14։00-ին, կանցնեն թեկնածուների առաջադրմանը։ 

Երեկ  Սահմանադրական դատարանում կայացել է  աշխատակարգային նիստ, որի օրակարգում էր Սահմանադրական դատարանի նախագահի ընտրության հարցը: Սակայն աշխատանքային օրվա ավարտով պայմանավորված՝ նիստը չէր ավարտվել: ՍԴ դատավորներն ասում են, որ երեկվա նիստում ընթացակարգային հարցեր են քննարկել, թեկնածություններին չեն անդրադարձել:
Նիստը շարունակվում է այսօր:ՍԴ 9 անդամներից յուրաքանչյուրը կարող էր և ինքնառաջադրվել, և առաջադրել այլ թեկնածուի: «Սահմանադրական դատարանի մասին» ՀՀ օրենքի 19-րդ հոդվածի համաձայն՝ Սահմանադրական դատարանի կազմից նախագահ կարող է ընտրվել այն թեկնածուն, որը ստացել է դատավորների ընդհանուր թվի ձայների երկու երրորդը, որը կազմում է 6 ձայն։ Իսկ այն դեպքում, երբ առաջադրվել է մեկ թեկնածու, ընտրվում է դատավորների ընդհանուր թվի ձայների մեծամասնությամբ՝ 5 ձայնով:Քվեարկությունը փակ է։