Ձեր վստահելի աղբյուրը

Եվ, այնուամենայնիվ, չի բացառվում, որ ԵՄ գագաթնաժողովի հետաձգումը, որի ընթացքում տարաբնույթ հարցերի շրջանակում պետք է քննարկվեր Թուրքիայի դեմ պատժամիջոցների հարցը ևս, իր խորքում ունի նաև քաղաքական դրդապատճառներ։ Նպատակն ակտիվ զարգացման գործընթացում գտնվող ԵՄ-ի համար մի շարք կարևոր խնդիրների (ԵՄ բյուջեն, Brexit-ին առնչվող, ինչպես նաև Միջերկրական ծովում ստեղծված իրավիճակները և այլն) հետ կապված ժամանակ շահելն է։ Այս մասին գրել է արաբագետ Արմեն Պետրոսյանը։

«Վերոնշյալի համատեքստում առնվազն Թուրքիայի մասով հարկ է նշել, որ վերջին 2 շաբաթների ընթացքում Արևելյան Միջերկրականում, Էգեյան ծովում իրավիճակը զգալիորեն կայունացել է՝ հատկապես Անկարայի կողմից սեփական գործողությունների վերանայման պատճառով։ Թուրքիայի դեմ միավորված միջազգային ջանքերը, ըստ էության, միաժամանակ մի քանի տարածաշրջաններից, առանձին դերակատարների և կազմակերպությունների կողմից իրականացվող ահռելի ճնշումը ստիպեցին այդ երկրի իշխանություններին ընկրկել և վերադառնալ բանակցային հարթություն։
Եվ հետևաբար, կարելի է նաև ենթադրել, որ Բրյուսելն Անկարային ևս 1 շաբաթ ժամանակ է տվել՝ վերանայելու սեփական ագրեսիվ գործելաոճը, որը անշուշտ, կարող է իր ազդեցությունն ունենալ ԵՄ գագաթնաժողովի օրակարգի վրա»,-գրել է Արմեն Պետրոսյանը։

Հիշեցնենք, որ ԵՄ գագաթնաժողովը պետք է կայանար սեպտեմբերի 24-25-ին և նախնական հետաձգվել է մինչև հոկտեմբերի 2-ը, իսկ որպես պաշտոնական հիմնավորում նշվել է ԵՄ խորհրդի նախագահ Շառլ Միշելի ինքնամեկուսացման հանգամանքը։